Matiu 17

Yeesu beɡra wa

(Mak 9:2-13; Luk 9:28-36)

1Aa di tɔpera anumɛl la, Yeesu tɔ Pita ne Jems ne o nime Jɔn sie ba ka teeh bwejen bɛl, dɛ ɡbo ka so o doa bobɛl. 2Baa soɡa la, dɛ Yeesu beɡrɔ, o siebɔr do kɛŋɔ wee ken, asɛ o laala waa doa la ɡe to dɛɛ nyɛɡle al-al ken.#Kaa 34:29 3O habɔteŋra batoro la berɛ ŋɔ ba nyiŋi, dɛ Mosis ne Elaeja ja Yeesu nɛɛ baa bol wa.

4Anee Pita ŋɔ Yeesu be ŋɔ, “N Dɔɔ, a wer taeh kɛ yaa lɔ bonɔ nɔ! Dɛ he dɛ nyin aa, mɛɛ do kukure atoroo cheɡ bonɔ, ásɛ he kpɔ bɛl, Mosis kpɔ bɛl, ásɛ Elaeja ɡe kpɔ bɛl.”

5O nyoa taa lɔ waa ta wɛɛ bol la, dɛ bampoŋ bɛl denɔ ba tɔ ba nɛ, asɛ ba no taa bɛl bam la bini kɛ, “N Bie maa dɛ nyinu o wa ɛɛ su n siwii nɔ. Hé cheɡ deŋne dɛ́ no o be.”#2Pi 1:17-18 6Yeesu habɔteŋra la aa no taa la la, ɔmee laɡ ba kohona ba ɡuŋi dɛ kpɔ ba sie piiɡi harɛ. 7Asɛ Yeesu ba, dɛ ba kpɔ nɔn lɔ ba dɛ ŋɔ, “Hé ir che. He bɛ ɔmɛ.” 8Ba laa ba nyuune ir dɛ nyiŋi, dɛ nomɛlbwa toole ka ja ba ne Yeesu nɛ.

9Baa le bwejen la doa dɛɛ ba la, Yeesu ja ba ŋɔ, “He bɛ waa nɔ haa naa nɔ taa baɡle nomɛlbwa bwa, dɛ́ ka tel ɡɛ saŋ Korowii aa ɡel Men Nɛn Bie ir seo ta mɔɔ.”#Mat 16:20

10Anee o habɔteŋra la pɛɛro ŋɔ, “Aah ɛrɛ waa Tɔnjerema la ɛɛ chaɡle ŋɔ, a chɛ kɛŋɔ Elaeja tɔ sie ba mɔɔ Kristo la Korowii aa baɡɛ nyoa ŋɔ wɛɛ tomɔɔ ó ba lɛ yaa la ɡe ba nɔɔ?”#Mal 4:5-6

11Asɛ Yeesu chaŋ ba ŋɔ, “Elaejaa dɛ́ tɔ sie ba kpela, dɛ́ ba kwaa ŋwɛnɛ mɔɔ. 12Kɛ kasinteŋ, Elaeja balɔ dɛ kaa. Waa bala la, ba ta on jemɛ dɛ ɛo ɡɛ bɛlbwa aa too ba tea. Weweele la tenten baa kpɔa ɛo laanee baa ba kpɔe ɛ Men Nɛn Bie ɡe.” 13Asɛ mɔɔ o habɔteŋra la ta jemɛ kɛŋɔ Jɔn o fa aa dɛ sɔ nɛra Korowii nee la waa wɛɛ bol la.

Yeesu chah bibaa bɛl waa dɛ chole ɡbuŋɡbuŋri

(Mak 9:14-29; Luk 9:37-43)

14Gɛ saŋ baa le bwejen la doa dɛ tu la, ba kaa pu nɛnlaa bane. Baa bɛl den ba ɡuŋi Yeesu sie 15dɛ ŋɔ, “N Dɔɔ, na n bibaa nɔ sum tɛ mɛ! O dɛ chole ɡbuŋɡbuŋri. A iraa, aa were kwaraa. Tɔpebɛla a iraa, a ɡelɔ wɛɛ chole nii ta, asɛ tɔpebɛla ɡe a ɡel wɛɛ chole nee ta. 16N kpɔɔ ba he habɔteŋra nɔ be, kɛ ba ta wone chaoh.”

17Asɛ Yeesu chaŋe ŋɔ, “Oo! Fini nɔ nɛra wechɔɡa aa lɔ he nɛɛ nɔ, he ta yarada dɔe! Tɔpera aŋwɛnɛɛ hɛɛ nyin kɛ ń lawɛ bambile, dɛ́ so he be mɔɔ he yarada Korowii ɔ? Maa tɔpere bɛl dii ba he be kpa oo! Hé kpɔ bie la ba tɛ mɛ!” 18Yeesu kɔr kwaa aa ɡela ɡbuŋɡbuŋri la ɛɛ ir bie la nɛɛ la, asɛ a le o nɛɛ kaa. Buɡ la ta, bie la den dɔ bokpeɡa.

19Anee Yeesu habɔteŋra la la o be bokɛre, dɛ ka pɛɛro ŋɔ, “Ɛrɛ waa ya te ta wone doŋi kwaa la le bie la nɛɛ nɔɔ?”

20Anee Yeesu ŋɔ, “He yarada aa wola kanɛ waa. Kasinteŋ, dɛ he yarada fe kan kɛŋɔ sipon ɡba aa, hé fe ɛɛ wonoo ŋɔ bwejen nɔ be ŋɔ ó huɡri kaa bela haa dɛ nyin, ásɛ o kaa. Hé fe ɛɛ wonoo ɛ komɛlbwa. 21A ɡɛ kwaa nɔ konsoo la, nyoa vɔwa ne Korowii soŋa ɡboo dɛɛ ba wona doŋa.”

Yeesu bol o seo waa ja

(Mak 9:30-32; Luk 9:43-45)

22Yeesu habɔteŋra la bwa aa baa cheme Galilia harɛ la, o ŋɔ ba be ŋɔ, “Ba dɛ ba Men Nɛn Bie lee do nɛra nɔn ta. 23Baa kpo mɛɛ, ásɛ tɔpera atoro ń berɛ ir seo ta.” Ate, dɛ o habɔteŋra la bwa loo kuu.

Korowii Dea toɔ bɔe wa

24Yeesu ne o habɔteŋra la la Kapeeneɔm. Asɛ Korowii Dea toɔ lɛɛra baa pɛɛ Pita ŋɔ, “He Dɔɔ nɔ dɛ bɔ Korowii Dea toɔ aa?”#Kaa 30:13

25Anee Pita ŋɔ, “Ɔɔh, o dɛ bɔ.”

Pita aa jo dem bini la, Yeesu den tɔ sie pɛɛro, “Seemɔn, bamewaa bɔ toɔ dɛɛ tɛ harɛ nɔ ta koranar ɔ? Ba ɡbaɡba bii kɛɛ hɔɔhra ɔ? Ɛrɛɛ he na nɔ?”

26Anee Pita ŋɔ, “Hɔɔhraa dɛɛ bɔ.”

Asɛ Yeesu ŋɔ, “Gɛɛ te naa, amɔ te a ta chɛɛ kɛŋɔ bá lɛ koobii toɔ. 27Kɛ maa wola nyin kɛ yá jo ba nɛɛ nomanta, la moo ta, dɛ́ ka ta ɡoŋa. Pɛŋe bɛlbwa waa tɔ sie ba tɛr ɡoŋa la, lɔɔ le baŋ dɛ́ nyiŋi o nyoa bini. Hɛɛ na suuɡa bwe waa tel n ne he bwa toɔ laanee, ásɛ he kpɔ ka bɔ tɛ ya bwa.”

Currently Selected:

Matiu 17: mzw

Highlight

Copy