Matiu 11

Yeesu ne Jɔn waa dɛ sɔ nɛra Korowii nee wa

(Luk 7:18-35)

1Yeesu aa bol waa nɔ baɡle o habɔteŋra fi dɛ banɛ la tonɛ la, o le bela dɛ kaa bwɛɛre aa bɛne bela la ta, dɛ kaa bol Korowii Waa dɛɛ baɡ ba.

2Dɛ ba do Jɔn waa dɛ sɔ nɛra Korowii nee la dea, o chɔ bela dɛ no waa Yeesu Kristo aa dɛ ɛ la, asɛ o tomɛ o habɔteŋra bane o be 3ŋɔ bá ka pɛɛro ŋɔ, “Henee nɛn Korowii aa baɡɛ nyoa ŋɔ wɛɛ ɡeloo o ba la aa, kɛɛ he laa, ásɛ yaa nyiŋi naate habɔɔ?”

4Anee Yeesu ŋɔ, “Hé berɛ kaa, dɛ́ ka ŋɔ Jɔn be waa haa baa na dɛ no la. 5Hé ŋɔ o be ŋɔ nyoŋa dɛ na bɔr, boobie ɛɛ valɛ, asɛ nɛra weechɔɡa aa chɔɡ ba bwadabii la ɡe bwara kwaa. Hé ŋɔ o be ŋɔ amumure dɛ no wa, lala ir seo ta, asɛ nyaara ɡe dɔ Amanesoma la dɛɛ no.#Aes 35:5-6 6Nomɛlbwa haa wola men tɔŋle la, he na som.”

7Jɔn habɔteŋra la aa dɛ kaa la, Yeesu bol Jɔn waa dɛɛ baɡle nɛnlaa la ŋɔ, “Haa la Jɔn be pua hɛŋle ɡbo harɛ la ta la, dɛ bɔkwaa he fe ɛɛ nyin kɛ he na nɔ? Kpɔɡ bɛl peu aa dɛ ta wɛɛ yiiɡi la kɛɛ? 8Dɛ ɡɛ laa ɡe aa, dɛ bɔkwa tenee he ka nyiŋi ɔ? Nɛn waa do laaladɛɛɡaa he ka nyiŋi kɛɛ? Nɛra baa dɛ do laaladɛɛɡa la, kooderemii ba do. 9Hé baɡ mɛ, bɔkwa tenee he la bela ka nyiŋi ɔ? Korowii keamee kɛɛ? Kasinteŋ, Korowii keamee he na la, kɛ o ɡwaa Korowii keame kwara, 10dɛkalkɛ Jɔn nɔ waa ba chwerɛ ŋɔ,

‘Korowii ŋɔ, “Mɛɛ tomɛ n toromee ó tɔ he sie

dɛ́ kwaa ŋwɛnɛ tɛɛ” ’ la.#Mal 3:1

11Kasinteŋ, ba lolɛ nɛnjena harɛ nɔ ta, kɛ Jɔn waa dɛ sɔ nɛra Korowii nee nɔ ɡwaa ba bwa. Kɛ nomɛlbwa waa ɛ bechala Korowii Kora la ta te berɔ ɡwaa Jɔn. 12Dɛ le saŋ la Jɔn aa lea dɛɛ bol Korowii Kora nɔ waa la, nɛra sie beɡrɔ ba kpɔ sibeɡra dɛɛ nyin dɛ́ ja o Kora la ta. 13Korowii keamere la bwa ne Mosis tɔ sie bol Korowii Kora la waa dɛ ba tel ɡɛ saŋ Jɔn aa bala. 14Kɛ dɛ hɛɛ yarada n waa maa dɛ bol nɔɔ te naa, Elaeja la baa bol o waa ŋɔ wɛɛ bao la, onee a ɡɛ Jɔn nɔ.#Mal 4:5-6 15Nomɛlbwa waa no la, ó no.

16Bɔkwa konee mɛɛ ba fini nɛra nɔ kpɔe dɛ maɡɔɔ? Ba do kɛŋɔ bechale bane aa dɛ hɛlɛ fɔɡbaah, asɛ bane ŋɔ ba bala be ŋɔ,

17‘Ɛrɛɛ ya ɡo silɛɛ yela,

he sie ta lɛɛ he sa,

ya berɛ ta wiile ɡe,

he loo ta kui he wi nɔɔ?’

18Jɔn aa bala la, dɛ o dɛ vɔwɛ nyoa, waa sen ɡe nyɔ, asɛ nomɛlbwa ŋɔ kwaa dɛ ir o nɛ. 19Asɛ Men Nɛn Bie la te aa bala la, n di kwa, dɛ nyɔ sen ɡe, asɛ nomɛlbwa berɛ ŋɔ, ‘Hé na baa nɔ! Kondikondidii ne sennyɔɔree on. Toɔ lɛɛra baa dɛ bɔ nɛra apoo ne wechɔɡ-ɛɛraa ɛ o daamanar.’ ” Waa bol ɡɛ tonɛ la, anee o ŋɔ, “Wejereme bɛlbwa we-ɛɛla taa a che baa jemɛ kɛ o ɛ wejereme.”

Bwɛɛre a tena aa wola Yeesu yaradae wa

(Luk 10:13-15)

20Bwɛɛre Yeesu aa ɛ nyokpowaa a ta warɛ la, a nɛra ta ba wechɔɡa ta leɛ. Anomanta, o ŋɔ, 21“Korasen tena, hé bwɛɛlɛ. Hɛɛ na waa taeh! Bɛtsaeda tena, hé ɡe bwɛɛlɛ. He ɡee na waa taeh! Nyokpowaa nɔ maa ɛa he bini nɔ, dɛ Taaya ne Sidonee n fee ɛa nɔ naa, ba fe charɛ ba liire le ba wechɔɡa ta biɡri, dɛ tɔ lweyale dɛ kpɔ tɔɔ fɔɡɛ ba bwara bwa. 22Kasinteŋ, awola Korowii aa ba dɛ́ ba bol nɛra bwa waa dɛ́ pa bole la, wɛɛ na Taaya ne Sidon tena sumii ɡwaa heya. 23Ásɛ he Kapeeneɔm tena ɡe, he fe dɛ nyin kɛ he ɡbaɡba ir kaa Korowii doa kɛɛ? Baa viɡri heyaa Bɔnsam nii taa. Nyokpowaa nɔ maa ɛa he bini nɔ, dɛ ba fe ɛa Sodom aa, Sodom fe ta lole ba le fini, Korowii fe ta on chɔɡɛ. 24Kasinteŋ, hé jemɛ kɛŋɔ awola Korowii aa ba bol nɛra bwa waa dɛ́ pa bole la, wɛɛ na Sodom tena sumii ɡwaa heya.”

Ona aa lole dɛ tɛ nɛra baa koah

(Luk 10:21-22)

25Belaa Yeesu kpɛɛ Korowii ŋɔ, “N Mɛɛ, nyundua ne harɛ bwa Dɔɔ! N dɛ jaame kɛ haa kpɔ he waa nɔ sɔh sipila tena ne wejerema, dɛ kpɔ baɡle nɛra baa wola wobɛlbwa jemɛ nɔ. 26Jam, n Mɛɛ. Gɛɛ wera he be.”

27Belaa Yeesu berɛ ŋɔ, “N Mɛɛ kpɔ wobɛlbwa do n nɔn ta. Nomɛlbwa aa men Korowii Bie jemɛ, nemenɛ n Mɛɛ la ɡbo. Gɛɛ nomɛlbwa ɡe aa wola n Mɛɛ la jemɛ, nemenɛ n ne nɛra maa dɛ nyin kɛ ń ɡel ba jemɔ la.

28He banɔ la he soɡa bini waa aa kana ɡwaa he nɛɛ la bwa, hé kpɔa ba n be ásɛ n lɛ heyaa he onɛ.#Aes 28:12 29Gɛ baa kpɔ daa dawɛ nae anɛ nɛ a pɛ dɛɛ ɛ toma la, hé ɡel n ne he pɛ ɛ ɡɛ, ásɛ he hweli le n be, dɛkalkɛ n pwɛre, maa mbarafo ɡe ɛ. He ɛ ɡɛ naa, haa koeh ba.#Fel 2:5 30N waa do toŋɡboŋ ken, bone maa kpɔ dawɛ he nɛɛ la ɡe fɛɡre.”

Currently Selected:

Matiu 11: mzw

Highlight

Copy