Matiu 10

Yeesu aa tomɛ o toroma fi dɛ banɛ wa

(Mak 3:13-19; Luk 6:12-16)

1Yeesu yerɛ o toroma fi dɛ banɛ la cheme dɛ tɛɛ ba kpeɡri báa kpɔ doŋi kwaa aa dɛ ir nɛra nɛ, ásɛ dɛ won chah weela bɛlbwa ɡe.

2Yeesu toroma fi dɛ banɛ la waa kpɔ ba laanee nɔ. Seemɔn waa pa o sɔn Pita la ne o nime Andriu, ne Jems ne o nime Jɔn baa ɛ Sebedii bii la,#Weɛ 1:13 3Felep ne Batolomeo, ne Tɔmas ne Matiu o fa aa dɛ lɛ toɔ la, ne Jems waa ɛ Alfeɔs bie la dɛ Tadeɔs, 4ne Seemɔn Sɛlɔt la dɛ Judas Eskareɔt waa le Yeesu tɛ ba kpoo la.

5Yeesu aa dɛ tomɛ a ɡɛ nɛra fi dɛ banɛ nɔ la, o do ba ŋɔ, “He bɛ nɛra baa wola Juu tena ɛɛ la harɛ ta la, he bɛ Samaria bwɛɛ bɛlbwa ta la.#Mak 13:9-13; Luk 21:12-17 6Hé kaa Israel tena baa do kɛŋɔ peera aa nyoɡra la be, 7dɛ́ ka bol ba be ŋɔ Korowii Kora puu ba tonɛ. 8Hé chah weela tena, dɛ́ chum nɛra baa serewa. Hé chah weela bwa aa dɛ chɔɡ nɛn bwadabi, dɛ́ doŋi kwaa a yon dɛɛ ir nɛra nɛɛ la le ba nɛ. N kpɔ kpeɡri nɔ kɛ heyaa pɛɛpɛɛ. Hé ɡe kpɔ chaah ba pɛɛpɛɛ. 9He bɛ suuɡa te bɛlbwa kpɔ. 10Ŋwɛnɛ haa dɛ ba kaala la, he bɛlbwa bɛ pur kpɔ, dɛ bɛ batakaani bele anɛ kpɔ, dɛ bɛ naŋɡawa bele anɛ ne daŋɡbala kpɔ, dɛkalkɛ tom-ɛɛ kembɔr chɛo.

11Bwɛɛ bɛlbwa haa tel o ta la, hé nyiŋi nɛndɛɛɡe, ásɛ dɛ so o be dɛ́ ka tel ɡɛ saŋ haa le bela. 12He kaa jo dem bɛlbwa ta naa, hé ŋɔ ba be ŋɔ, ‘Kórowii tɛ heyaa bosɔɔhna.’ 13Dɛ dem bela tena lɛ heyaa silɛɛ ne naa, baa dɔ bosɔɔhna dem belaa. Kɛ dɛ ba ta heyaa lɛɛ silɛɛ ne naa, baa bosɔɔhna dɔe ba. 14Dɛ dem bɛl kɛɛ bwɛɛ bɛl tena ŋɔ baa heyaa lɛ, baa he waa la ɡee no aa, hé pee he nakpale teera ta bela, ásɛ a baɡle kɛŋɔ he kpɔ Korowii Waa ba ba be ba vɛah, ásɛ dɛ le bela.#Neh 5:13 15Kasinteŋ, awola Korowii aa ba pa nomɛlbwa bole la, waa Sodom ne Gomoora tena aa naa la ɡba ɛɛ bɔ a ɡɛ bwɛɛ la tena waa.”

Gɛ nɛra aa dɛ ba Yeesu toroma nɛɛ cheɡa

(Mak 13:9-13; Luk 21:12-17)

16Yeesu berɔ ŋɔ, “Hɛ́ɛ no! N dɛ tomɛ heyaa kɛŋɔ peera hé ka koo he dɔma baa do kɛ ɡboli baah ta. Hé ɡel he sie pili hɛɛ do dɛɛɡɔ kɛ harɛkwa, ásɛ dɛ do pwɛre dɛ́ man kɛ borɔnomare. 17Hɛ́ɛ nyiŋi kɛrɛdɛ, dɛkalkɛ baa lawɛ heyaa ka cheme nomonome sie, dɛ́ lɔɔ heyaa chweremi ne cheremi deene ta.#Mat 24:9 18Baa koh n waa yerɛ heyaa cheme Abane nomonome ne koranar siee, dɛ́ ŋɔ hé ba bol Amanesoma la baɡle ba ne nɛra baa wola Juu tena ɛɛ la.#Weɛ 24:24 19Dɛ ba baa lawɛ heyaa dɛ la he ne ba sie naa, he bɛ ɡel waa haa dɛ ba bola, ne ɡɛ haa bol dɛ́ lɛ he te hiah heya. A baa tel kɛŋɔ hé bol wa aa, hɛɛ jemɛ waa haa dɛ ba bolaa. 20Waa haa dɛ ba bola la aa he bee le. Korowii Domadɛɛɡe laanee dɛɛ ba he nɛɛ cheɡa dɛ́ bol wa.

21Nɛra ɛɛ le ba ɡbaɡba lolanaree tɛ bá kpoo ba, baala le ba bii tɛ bá kpoo ba, ásɛ bechale ɡe ir che ba nyare ne mɛɛnanar nɛ, dɛ́ ɡel baa kpoo ba. 22Nɛra bwa ɛɛ koh n waa hah heya. Kɛ naate waa dɛ ba wona dɛ́ lawɛ bambile ka tonɛ la, wɛɛ dɔ o nyuu. 23Dɛ he la bwɛɛ bɛl ta baa ɛ heyaa hɔhɔrɔwa aa, hé chwa kaa bwɛfale ta. Kasinteŋ, haa won la Israel bwɛɛre nɔ bwa ta ka chiɡ mɔɔ Men Nɛn Bie ba.

24Nɛn waa dɛ hweli toma ta o dɔɔ ɡwaalɛ, bonɔɔ ɡe ta o nomoa ɡwaalɛ. 25Dɛ ba dɛ yerɛ dea nomoa Bɛlsebul waa ɛ sɔnchɔɡe aa, dea bii la te ta pɔeh yaa?

26Anomanta, he bɛ nɛra dɛɛ ɔmɛ. Wobɛlbwa baa tɔ a ta la ɛɛ le baŋee, ásɛ waa aa sɔah bwa ɡe le nɛra jemɛ. 27Waa maa dɛ bol he be biro ta la, hé bola webaŋa, ásɛ waa maa sɔah bol he be la, hé bola nɛnlaa baah. 28He bɛ nɛra baa dɛ ba wona kpo heya, baa wola won kpo he lileo la ɔmɛ, kɛ hɛ́ɛ ɔmɛ Korowii waa dɛ ba wona chɔɡ bwadabii ne lileo la bwa Bɔnsam nii ta la.#1Pi 3:14 29He nao kɛ pɛtoprɛ ta yoɡ dɔe, kɛ beŋkpoŋ ɡba aa harɛɛ le dɛ he Mɛɛ waa lɔ nyundua aa o waa jemɛ. 30He nyumpona kwara, o jemɛ a nyoa. 31Anomanta, he bɛ ɔmɛ. He ta pɛtoprɛre ɡwaalɛ wobɛlbwa ta naa?

32Nomɛlbwa waa won che nɛra baah ta, dɛ́ sɛh ŋɔ o ja n nɛɛ la, ɡɛɛ n ɡee ba naate sɔn yera n Mɛɛ waa lɔ nyundua la sie kɛ o ja n nɛ.#Luk 12:8-9 33Nomɛlbwa ɡe waa vɛɛh mɛ nɛra baah ta, dɛ ŋɔ o ta n nɛɛ jae la, ɡɛɛ n ɡee ba o vɛɛh n Mɛɛ waa lɔ nyundua la sie, dɛ́ ŋɔ n ne o laa.

34He bɛ dɛɛ lii kɛ n ba nyopɛo ne harɛ nɔ ta. Nyopɛo ne laa n ba, yoi nee n ba.#Luk 12:51-53; 14:26-27 35N balɔ ásɛ bibaa ne o

mɛɛ koh n waa dɔm,

bihaah ne o nya dɔm,

ásɛ bihaah ne o helahaah ɡe dɔm,

36ásɛ nɛn lolanar berɛ o dɔma.#Mae 7:6

37He naate haa dɛ nyin he nya ne he mɛɛ waa ɡwaa mɛ la ta chɛɛ kɛŋɔ he teŋɛ n nɛ, asɛ he naate ɡe haa dɛ nyin he bihaah ne he bibaa waa ɡwaa mɛ la ta chɛɛ kɛŋɔ he teŋɛ n nɛ. 38He naate haa wola he te kpɔe tɛ dɛ sɛh wahala nae ne seo bwa, dɛ baa teŋɛ n nɛ kɛŋɔ nɛn waa kpɔ daɡaɡre che bá ka kpaaro pɛl o ta la ta chɛɛ kɛŋɔ he teŋɛ n nɛ. 39Nomɛlbwa o sie aa swɛɛ harɛ nɔ ta silɛɛ kwaa ta la, wɛɛ paŋɛ o nyuu, ásɛ nomɛlbwa ɡe o sie aa wola harɛ nɔ ta silɛɛ kwaa ta lɛ la, wɛɛ dɔ o nyuu.

40Nomɛlbwa waa nyiŋi he nɛɛ la, menee o nyiŋi la. Asɛ nomɛlbwa waa nyiŋi n nɛɛ la, naate waa tom mɛ laanee o nyiŋi la.#Jɔn 12:44#Mak 9:41 41Nomɛlbwa waa nyiŋi Korowii keame nɛɛ o keamere ɛɛ nomanta la, wɛɛ dɔ Korowii keame kembɔree. Asɛ nomɛlbwa ɡe waa koh nɛndɛɛɡe dɛɡre waa dɛ nyiŋi o nɛɛ la, wɛɛ dɔ nɛndɛɛɡe kembɔree. 42Kasinteŋ, dɛ nomɛlbwa koh n wa, dɛ tɛ n habɔteŋra bechale nɔ bini bɛlbwa nesɔna o nyɔ aa, waa o kembɔr paŋa ba bwa.”

Currently Selected:

Matiu 10: mzw

Highlight

Copy