Lewi Dea Tena 24

Ɔleve noo ne paanoo aa cheɡɛ Korowii sie

1Korowii ŋɔ Mosis be ŋɔ ó bol Israel tena la be ŋɔ, 2bá kpɔ ɔleve nodɛɛɡa baa harama kɛrɛdɛ ba tɛo ó kpɔ dɛɛ do kandea daa la bini, ásɛ o kandere che le dɛɛ hɔ dɛ bɛ dime bwa. 3Arɔn chɛ kɛ o che pateesan la sie Korowii Dea Cheremibɔr la bini, Korowii Ne Nɛwɛnyina Fɔo Daka la habɔɔ bela dɛɛ nyiŋi a ta. Aa che n sie bela jɔmɔraa dɛɛ hɔ tɔɔ ba per chɔɔ saŋ bɛlbwa. A ɛ waa aa chɔ le tɛ he ne he naanar baa ka ba bwa. 4Kandere aa lɔ kandea daa la baa kpɔ suuɡaswɛm ɡbo ɛo o che Korowii sie la chɛ kɛŋɔ bá nyiŋa aa hɔ tɔpere bɛlbwa.

5Kpɔ men aa kpera kɛrɛdɛ ɛ paanoo fi dɛ anɛ. Kuruware anɛɛ chɛ kɛ hé kpɔ ɛ paanoo la beŋkpoŋ bɛlbwa. 6Kpɔ paanoo la bil teebur waa cheɡɛ Korowii sie ba kpɔ suuɡaswɛm tenten ɛo la ta. A chɛ kɛ hé bila bɔre anɛ, anumɛl teŋɛ dɔŋa nɛ do baŋ bɛl, ásɛ anumɛl ɡe do baŋ bɛl ɡɛ tenten. 7Baŋ bɛlbwa ta la, ɛ daawiile a sɔɔh aa soma bil a jwɛh a ɛ saraha kwaa baa fuh cheɡ paanoo la naa ta tɛ Korowii. 8Arɔn che Israel tena naa ta, dɛ́ kpɔ paanoo la baa bil Korowii sie Ona Tɔpere bɛlbwa ta. Ó teŋɛ dɛ́ kpɔa baa bil Korowii sie ɡɛ, á ɛ fɔo Korowii ne Israel tena aa fɔwa o do n ne ba baah ta saŋ bɛlbwa dɛɛ la.#1We 9:31-32 9Paanoo la ɛ Arɔn ne o bibaala kwa aa chɛ kɛ bá dia bela waa do ɡoroŋ, dɛkalkɛ paanoo laanee ɛ saraha kwaa aa do ɡoroŋ kohona, dɛ le saraha kwaa baa fuah dɛɛ tɛ Korowii dɛ ɛ Arɔn ne o bibaala dibɔr la ta.

Nɛnhɛl we-ɛɛla te bwea foɡra

10Baa bɛl fa lole o mɛɛ ɛ Ijipt te, asɛ o nya ɡe le Israel. O iro awola bɛl, dɛ la bela Israel tena aa soɡa, asɛ yoi ka chole o ne Israel te bɛl baah. 11Dɛ o nya sɔne Sɛlomet, Dibri waa le Dan dea biee on. Sɛlomet bie la ɛ nɛnhɛlwa dɛ taah Korowii, asɛ ba lawɔ ba Mosis sie, 12dɛ lawɔ do dea dɛɛ kpa waa Korowii aa ŋɔ bá ɛo.

13Belaa Korowii ŋɔ Mosis be ŋɔ, 14“Hé lawɛ baa waa bol nɛnhɛlwobol la le kaa bela haa soɡa la dahara. Nomɛlbwa waa noa kɛŋɔ o bol mɛ nɛnhɛlwobol la, bá kpɔ nɔn dawɛ o nyu ta, ásɛ nɛra la bwa foɡro bwea kpo. 15Berɛ ŋɔ Israel tena be kɛŋɔ, ‘Nomɛlbwa waa taah men Korowii waa dɛ tom mɛ la chɛ kɛ ó dɔ deŋnetɛra. 16A chɛ kɛ bá kpo nomɛlbwa waa bol men Korowii nɛnhɛlwobol la. Israel tee kɛɛ nɛŋhɔɔhree yoo, a chɛ kɛŋɔ nɛra la bwa foɡre naate bwea kpo.

17Nomɛlbwa waa kpo o dɔŋ la chɛ kɛ bá kpo o ɡe, 18ásɛ nomɛlbwa ɡe waa kpo o dɔŋ kondɛɛre la chɛ kɛŋɔ ó nyin bɛl ba chiɡ o naa ta tɛ kon te. Kondɛɛre o siwi taa lolee chɛ kɛ ó lawɛ ba chiɡ onɔ la waa kpoo la naa ta. 19Nomɛlbwa waa do o dɔŋ bol la chɛ kɛŋɔ bá do o ɡe bol bɔ kem. 20Dɛ naate la hoɡii o ku aa, bá ku o ɡe kon, o siwi beŋkpoŋii o fome aa, bá fome o ɡe kon ɡɛ. O nyenee o fome aa, bá fome o ɡe nyen. Gɛ bwa naate aa do o dɔŋ bol laanee chɛ kɛ bá ɛ o ɡe bɔ kem.#Mat 5:38 21Nomɛlbwa waa kpo o dɔŋ kondɛɛre la chɛ kɛ ó nyin bɛl ba chiɡ o naa ta. Kɛ nomɛlbwa waa kpo o dɔŋ la te chɛ kɛ bá kpo o ɡe.#Kaa 21:12 22Mmara beŋkpoŋii chɛ kɛ ó chɔ le tɛ deela ne hɔɔhra bwa. Menee Korowii haa dɛ tom mɛ la.’ ”

23Mosis aa bol anɔ baɡle Israel tena la, ba kpɔ baa la le kaa bela baa soɡa la dahara, dɛ ka foɡro bwea kpo. Gɛɛ a do Israel tena la ɛ ɡɛ Korowii aa do Mosis la.

Currently Selected:

Lewi Dea Tena 24: mzw

Highlight

Copy