Lewi Dea Tena 20

Wechɔɡa deŋnetɛra wa

1Korowii berɔ ŋɔ Mosis be ŋɔ, 2ó bol Israel tena be ŋɔ, “He bini bɛlbwa kɛɛ hɔɔh bɛlbwa waa soɡe he bini, dɛ lawɛ o bie bɛlbwa ɛ saraha ba kpo tɛ voɡ Molɛk la chɛ kɛ bwɛɛ la ta tena foɡro bwea kpo. 3N sie ɛɛ beɡre naate nɛɛ dɛ́ pero le o nɛra bini, dɛkalkɛ lawa waa lawɛ o bie tɛ Molɛk la ɡelɔ o kpɔ doŋa kah n Dea, dɛ chɔɡ n sɔndɛɛɡe waa do ɡoroŋ la. 4Dɛ bwɛɛla ɡe na naate dɛ laa sie kpɔ ba ta on kpoe yaa, 5n ɡbabir ɛɛ kpɔ sibeɡraa ta naate la ne o lolanar bwa nɛɛ, dɛ́ pere ba ne ba nɛra baa ja o nɛɛ dɛ vɛh n toma dɛ kaa tomɛ Molɛk la bwa le ba nɛra bini.

6Nomɛlbwa waa vɛh n toma dɛɛ la nɛn waa dɔ daabii dɛɛ yerɛ lala be la, n sie ɛɛ beɡre o nɛɛ dɛ́ pero le o nɛra bini.

7Hé laa doŋa bɛlbwa kpɔ he nɛɛ dɛ́ do ɡoroŋ, dɛkalkɛ menee Korowii haa dɛ tom mɛ. 8Hé lawɛ me Mmarare bini kpoŋe dɛ́ɛ teŋɛ a bwa ta, dɛkalkɛ menee Korowii, menee ɡela he do ɡoroŋ.

9Nomɛlbwa waa taah o mɛɛ kɛɛ o nya la chɛ kɛ bá kpoo. Naate wechɔɡa ɡure o nyu ta.

10Dɛ baa nyin o dɔŋ haah naa, dɛ ba bwa bɔ jwamane, a chɛ kɛ bá kpo baa la ne haah la bwa.

11Nomɛlbwa waa lawɛ o mɛɛ haah o ne o chɔ la lawɛ o mɛɛ sie teɡɛ harɛ. Baa la ne haah la bwa chɛ kpoe. Ba sewɔ ɡe aa, ba wechɔɡa ɡure ba nyu ta.

12Baa bɛlbwa waa lawɛ o bie haah o ne o chɔ la chɛ kɛ bá kpo ba bwa. Ba ɛ waa aa wola were, ba sewɔ ɡe aa, ba wechɔɡa ɡure ba nyu ta.

13Dɛ baa lawɛ o bandɔŋ chɔ kɛŋɔ baa ne haah naa, a ɛ waa baa kia, a chɛ kɛ bá kpoo ba. Ba sewɔ ɡe aa, ba wechɔɡa ɡure ba nyu ta.

14Dɛ baa mo haah ne o nya bwa naa, a ɛ wedoŋa. Ba nɛra batoro la bwa chɛ kɛŋɔ bá fuuh ba, ásɛ a ɡɛ wedoŋa nɔ le he bini.

15Dɛ baa lawɛ ol chɔ kɛŋɔ baa ne haah naa, a chɛ kɛ bá kpo naate la dɛ́ kpo ol la ɡe.

16Dɛ haah ɡe kpɔ o te tɛ ol o ne o chɔ baa ne haa naa, a chɛ kɛ bá kpo o ne ol la bwa. Ba sewɔ ɡe aa, ba wechɔɡa ɡure ba nyu ta.

17Dɛ baa mo o nimambihaah o ne waa pɛ mɛɛ kɛɛ nya, kɛɛ o nimambihaah o ne waa pɛ mɛɛ ne nya bwa naa, a ɛ sihihwa tenten. A chɛ kɛ bá laɡ ba ka che nɛnfuuh baah ta, dɛ́ per ba le ba nɛra bini. O do o nimambie la sihiih dɛ chɛ deŋnetɛra.

18Baa lawɛ haah o bwara aa chɔɡa chɔ aa, ba nɛra banɛ la bwa chɛ kɛŋɔ bá doŋ ba le ba nɛra bini, dɛkalkɛ ba bwa chɔɡ me Mmarare aa chɔ le dɛ tɛ haah o ta aa lɔ o bochɔɡa saŋ ta aa wola chɛɛ kɛŋɔ o ne baa chɔ la.

19Dɛ baa lawɛ o nyawee kɛɛ nyajen kɛɛ o nyaana chɔ aa, a ɛ sihihwa dɛ chɔɡ lola, nɛra banɛ la bwa chɛ deŋnetɛra.

20Baa bɛlbwa waa lawɛ o naara kɛɛ o mɛnjen kɛɛ mɛnwee haah chɔ la, dɛ o lawɛ o lole la sie teɡɛ harɛ. Haah la ne baa la bwa chɛ deŋnetɛra, ba bɛlbwa ɡe aa bie ba dɔ ka tel ba serewe bena.

21Baa bɛlbwa waa kpɔ o dɔɔ kɛɛ o nime haah mo la ɛ waa aa wola were, dɛ lawɛ o dɔɔ kɛɛ o nime la sie teɡɛ harɛ. Ba bɛlbwa aa bie dɔ ka tel ba serewe bena.”

22Korowii berɔ ŋɔ, “Hɛ́ɛ teŋɛ me Mmarare ne waa maa dɛ do heyaa bwa ta, ásɛ harɛ maa kpɔ heyaa dɛɛ ba o ta ba soŋni nɔ bɛ heyaa ba le tɛ. 23He bɛ nɛra la maa dɛ ba doŋa he sie he kpɔ ba harɛ la da ba kpɔ, ba kpoŋe da waa wola were waa n kii ba. 24N baɡɛ heyaa nyoa ŋɔ mɛɛ kpɔ ba harɛɛ tɛ heya hé so o ta o den ɛ he kon, harɛpare ondɛɛɡe. Menee Korowii haa dɛ tom mɛ n le heyaa korɛ harɛre nɛra bwa bini la.

25Anomanta, hé pere ola ne jumbii aa wera dɛ chɛ kɛ he dia le anɔ la aa wola were ne dii ta. He bɛ ol bɛlbwa kɛɛ jumbie kɛɛ anɔ la aa dɛ tuuɡi tea ta, ne anɔ la aa dɛ huuh harɛ nɔ ta n lea cheɡ ŋɔ aa were ne dii la ba di dɛ́ kah doŋa. 26A chɛ kɛŋɔ hé do ɡoroŋ dɛ́ che tɛ mɛ, dɛkalkɛ men Korowii n do ɡoroŋ, asɛ dɛ le heyaa cheɡ harɛre nɛra bwa bini, dɛ kpɔ heyaa ɛ n nɛra.

27Baa kɛɛ haah bɛlbwa waa dɔ daabii dɛɛ bol waa lala be dɛ do he bini la chɛ kɛŋɔ hé foɡro bwea kpo. Naate seo ɡe dɛ ɡure o nyu ta.”

Currently Selected:

Lewi Dea Tena 20: mzw

Highlight

Copy