Jona 1
1
Jona ɛ Korowii deŋnekpeɡ
1Baa bɛl fa lole baa yerɔ Jona, o mɛɛ sɔne Amitai. Awola bɛl, Korowii ŋɔ Jona be ŋɔ,#2Ko 14:25 2“Le he harɛ ta, dɛ́ la bwɛjen Niniwe ta, dɛ́ ka di ba kasinteŋ ŋɔ ba wechɔɡa baa dɛ ɛ la le n mee.”#2Ko 19:36
3Anee Jona vɛh Korowii toma waa dɛ tomɔ Niniwe la, dɛ chwa dɛɛ kaa Taases. Anomanta, o la Jopa, bela stiimaere aa dɛ chuɡe, asɛ dɛ ka dɔ bɛl waa dɛ kaa Taases. O bɔ o suuɡa dɛ jo dɛ fe ɛɛ kaa Taases ásɛ Korowii bɛ on na.
4Anee Korowii ɡel peujen bɛl ta mpo la ta. Peu la nyoa kpeɡri kohona, dɛ ir nehɛma baa lɔ dɛɛ beɡre nee la, stiimae la fe ɛɛ ba pera. 5Aa ba ɡɛ la, ɔmee lawɛ nɛra baa lɔ stiimae la bini bwa, asɛ bɛlbwa wi dɛɛ yerɛ o voɡ waa dɛ tomɛ. Ba pa laala aa lɔ stiimae la bini la dɛɛ ta nee ta, ásɛ o do fɛɡre.
A ɡɛ waa nɔ bwa aa dɛ chiɡ la, jaah dɛ Jona te lɔ stiimae la lɔɡa bobɛl, dɛ te chɔ dom kwaraa. 6Nomoa waa dɛ nyiŋi stiimae la ta la, la Jona be dɛ ka na kɛŋɔ o chɔ dom kwaraa. Asɛ o chumu dɛ ŋɔ, “Bɔree he te dɔ dɛ chɔ aa? Ir, dɛ́ wi yerɛ he voɡ haa dɛ tomɔ, o ken ɛɛ na ya sumii, dɛ́ lɛ yaa le waa nɔ nyoa, ásɛ ya dɔ ya nyu.”
7Asɛ nɛra la bwa baa lɔ stiimae la bini la ŋɔ, “Hɛ́ ɡel ya bil daa, dɛ́ na naate aa cheɡɛ o nɛɛ ɡɛ waa nɔ ba ya nɛɛ nɔ.” Ba bil daa la, asɛ a lawɛ Jona.
8Anee ba bɔɔro ŋɔ, “Baɡle nɛn aa cheɡɛ o nɛɛ wekpeɡa nɔ ba ya nɛɛ nɔ.” Ba berɔ bɔɔro ŋɔ, “Tombesoo hɛɛ ɛɔ? Bwɛ besoo taa he leɔ? Harɛ besoo ta nɛnee hen ɔ? Wobobesoo tee hen ɔ?”
9Asɛ Jona ŋɔ, “Hibru tee men, Korowii Waa Dɛ Di Kora Nyundua waa ta nyundua ne harɛ ne mpo laanee mɛɛ tomɛ.”
10Ate, dɛ ɔmee tenten lawɛ nɛra la bwa. Asɛ ba berɛ bɔɔro ja ŋɔ, “Ɛrɛɛ he ɛ ɡɛ nɔɔ?” dɛkalkɛŋɔ, o ŋɔ ba be ŋɔ Korowii tomɔ asɛ o vɛh dɛɛ chwa.
11Dɛ nae peu la nyoa na dɛɛ do kpeɡri mpo la ta kwara. Asɛ ba bɔɔ Jona ŋɔ, “Ɛrɛɛ yá ɛ peu nɔ ɡel tae ásɛ nee nɔ nyoa sɔɔh tɛ yaa ɔ?”
12Belaa o ŋɔ, “Hé ɡɔɔ mɛ ta nee ta, o nyoa ɛɛ sɔɔhnoo. N ɡbabir nao kɛŋɔ n nɛɛ a che ɡɛ peukpeɡ nɔ ɛɛ ta nɔ.”
13Ba ne o ɡɔɔra dɛ ta nee ta la, ba takapɔ kɛŋɔ ba kaa stiimae la ne ka chuɡe baŋ, kɛ ba ta wone, dɛkalkɛ dɛ nae peu la ne mpo nehɛma la na dɛɛ do kpeɡri kohona ɡwaa wubwa la kwara. 14Belaa ba wi yerɛ Korowii ŋɔ, “N Naa Korowii, anɔ bwa haa ɡela a chiɡ nɔ ɛ he tetoora. Ya dɛ soŋe, yaa dɛ ba baa nɔ kpɔe dɛ́ viɡri mpo ta nɔ, bɛ yaa ba kpoo.” 15Ate, ba ɡɔɔ Jona viɡri nee ta ken tuuu. Buɡ la ta, mpo la hel kerker ken. 16Asɛ ɔmee lawɛ nɛra la bwa kohona Korowii wa, ba kpo kwaa ɛ saraha tɛo, dɛ baɡɔ nyoa ŋɔ baa tomɔɔ.
17Dɛ Korowii te le pɛŋejen bɛl ó ba kpɔ Jona lile, asɛ o do o tea bini tɔpebire atoro, chɔɔ ne jwaana.#Mat 12:40; Luk 11:29-30
Currently Selected:
Jona 1: mzw
Highlight
Copy
Compare
Share
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
