Jeremia 48
48
Gɛ Korowii aa bol Moab harɛ wa
1Koranar Bwa Kooro, Israel tena aa dɛ tomɔ bol Moab harɛ wa men Jeremia be ŋɔ,
“Nɛbo tena, hé bwɛɛlɛ,
dɛkalkɛ he bwɛɛ la
dɛ ba chɔɡa.
Dɔma yo Kiriataim tena
dɛ pɔ ba nɛ,
o danjwɛkpeɡ
baa maa baro kuuɡo,
asɛ sihiih kpo ba.
2Moab harɛ nyanyini tonɔ.
Dɔma baa yo Hɛsbɔn tena
dɛ pɔ ba nɛ,
dɛɛ vɔrɔwe
kɛ bá ba chɔɡ Moab harɛ.
Nɛra haa lɔ bwɛɛ baa dɛ yerɔ
Madmen ɡe bwa hel,
dɛkalkɛ laa tena ɛɛ
ba yoo baa.
3Lɔŋɔre dɛ le Horonaim,
sibeɡra ne bwɛɛ chɔɡa wii.
4Ba chɔɡ Moab harɛ bwa,
hɛ́ɛ no bechale wii.
5Hɛ́ɛ no ba wii ɡbɔɡa
Luhit ŋwɛnɛ ta,
suna wii baa dɛ wi
Horonaim ŋwɛnɛ ta.
6Ba ŋɔ, ‘Hé ɛ warane,
dɛ́ chwa lɛ he nyuune.
Hé chwa kɛŋɔ kpɔɡ bini
keeɡo waa lɔ
pua hɛŋle ɡbo harɛ
ta ken.’
7Moab harɛ tena,
hé kpɔ he te dawɛ
he bokpeɡa
ne kondɔɔh ta,
kɛ ba dɛ ba heyaa yoi
dɛ́ pɔ he nɛ,
dɛ́ kpɔ voɡ Kemɔs kaa
harɛfale ta,
o ne o nomonome
ne o kerekpoŋra.
8Bwɛɛ bɛlbwa aa kae ba
dɛ́ le chɔɡa la nyoa,
fɛlembɔjena ne deŋɡarere
a dor aa chɔa kaa
bwa ɛɛ chɔɡoo.
Men Korowiirii bola.
9Hé paaɡe bwea a che tɛ
Moab harɛ,
dɛkalkɛ aa biɡri ba chɔɡo.
Moab bwɛɛre dɛ ba dimɡbia
bera, nomɛlbwa aa
belaa so kpa.”
10Kórowii taah nomɛlbwa
waa wola o toma ɛ
bambile bwa ne la!
Nomɛlbwa waa kwaa
o tokobi cheɡ
ŋɔ waa kpɔ kpo nɛn la,
Kórowii taahno!
11Korowii ŋɔ, “Moab tena
fa soɡe deŋnesɔɔhna ta,
ba ta ban lawɛ kaa
harɛfale ta bwa.
Ba fa do kɛŋɔ sen mun
a taa lɔ loŋ bini,
baa wola an fuɡe do
loŋfale bini ken.
A kpeɡri,
a sɔɔh ɡe ta charɛ bwa,
dɛ ta do ɡɛ aa doa
wubwa la.
12Anomanta, tɔpere bɛl dɛ ba
ásɛ men Korowii tomɛ nɛra
bá ba fuɡe Moab tena ta,
kɛŋɔ baa dɛ fuɡe sen
loŋa bini la ken.
Komɛlbwa aa a bini kae ba,
ásɛ ba paɡre a bwa.
13Sihiih ɛɛ kpo Moab tena
ba voɡ Kemɔs waa,
kɛŋɔ sihiih aa kpo
Israel tena
voɡ Bɛtel baa kpɔ
ba hwɛɡa dawɛ o nɛɛ la.
14Moab tena,
ɛrɛɛ hɛɛ ba wona ŋɔ,
‘Ya ɛ banyoola,
baala yaa kpeɡa
dɛ won laa yoi kohona ɔ?’
15Moab harɛ dɛ ba chɔɡa,
ásɛ o dɔma lɔ ba tɔ
o bwɛɛre ta.
Baa kpoo
o bonɔndɛɛɡa bwaa,
men Koranar Bwa Kooro
maa ɛ kooro laanee bola.
16Moab wenaale telo tonɛ,
o chɔɡa dɛ ba bala warane.
17Bwɛɛre haa soɡa baro bwa
nɛra hé wi tɛo,
hé nɛra haa na
o jirima bwa ŋɔ,
‘Hé na ɡɛ kooro faahna
waa kpeɡa
dɛ dɔ jirima la aa kua.’
18Debɔn tena, hé le he soŋnibɔr
waa dɔ jirima ba,
dɛ́ ba so harɛ bomboɡ ta.
Nɛn waa ba chɔɡ Moab la balɔ
dɛ́ ba kuuɡi
danjwɛjen waa baro la.
19Arowa tena, hé che ŋwɛnɛ
nyoa dɛɛ kpa.
Hé nyiŋi haahna ne baala
baa chwaa dɛɛ kaa,
dɛ́ bɔɔ ba waa aa chiɡa.
20Sihiih kpo Moab tena,
dɛkalkɛ
ba harɛ la bwa chɔɡɔ.
Hé wi dɛɛ do lɔŋɔre.
Hé ɡel Aanɔn Moo nyoa tena
no kɛŋɔ ba chɔɡ Moab.
21Bwɛjena aa chɔ deŋɡare
doa harɛ waa chɔa kaa ta
waa bola dɛ́ pa bole telo,
anee Holon ne Jaasa
dɛ Mɛfaat,
22dɛ kaa Debɔn ne Nɛbo
dɛ Bɛt Diblataim,
23dɛ kaa Kiriataim ne
Bɛt Gamul dɛ Bɛt Meɔn,
24ne Kereɔt ne Bosra,
dɛ Moab bwɛɛre
aa lɔ bojaŋ
ne anɔ la aa bɛna bwa ta.
25Moab tena kpeɡri bwa tonɔ,
baa won yo kpa.
Men Korowiirii bola.”
26Korowii ŋɔ,
“Hé tɛ Moab tena sen bá
nyɔ dɛɛ kohona, dɛkalkɛ ba
ɛ men Korowii deŋnekpeɡ.
Hé ɡel ba chɔ dɛɛ ɡbaɡre
ba chwɛɛra ta,
dɛ́ berɛ akwekwe nɛra.
27Moab tena, Israel tena laa fa
berɛ he akwekwe nɛra
la aa?
Saŋ bɛlbwa he dɛ bol ba wa,
a do kɛŋɔ he na ba ne
ŋwɛɛra aa dɛ bɔ ken.
28Moab tena, hé chwa le
he bwɛɛre ta
dɛ́ ka so bwea dor.
Hé ka sɔh
he kɔne bwebɔɔne nyoo,
kɛŋɔ borɔnomare ken.
29Ya no Moab tena mbarafo
wa, ba dɛ na ba nyu,
dɛɛ ɡɔɔ ba te kohona.
Mbarafo ne deŋnekpeɡ
ɡboo su ba bambili.
30N jemɛ deŋnekpeɡ
baa dɛ ɛ wa,
mbarafo baa dɛ ɛ la ta
tɔnɔ bɛlbwa dɔe,
a bwa ɛɛ ba a jaɡaa.
Men Korowiirii bola.
31Anomanta, n wio dɛɛ tɛ
Moab tena,
ba ɡbosoro waa mɛɛ wi.
N wio dɛɛ tɛ
Kir Haresɛt baala.
32N wio dɛ tɛ Sibma tena
dɛ ɡwaa kɛ maa wi tɛ
Jasa tena,
Bwɛjen Sibma,
he do kɛ ɡrepo da,
he ta kpala dɛ ɡale Yar Mpo
hale dɛ kpoŋe kaa
Jasa Mpo nyoa bwa.
Kɛ taraken, nɛnchɔɡe baa
chɔɡ he bɔwɔb saŋ nɔna
ne he ɡrepo nɔna.
33Silɛɛ ne hɛɡra bɛlbwa toole
Moab harɛpare ondɛɛɡe ne
kooni ta kpa.
N ɡelɔ sen toole bɔra baa dɛ
harama,
nɛra toole dɛ́ tiɡri a ta.
Baa mooluu,
kɛ silɛɛ moola laa.
34Hɛsbɔn ne Eleale tena
lɔŋɔre dɛ le,
hale aa tel Jahas tena be.
A tel Soar tena be,
dɛ kpoŋe kaa Horonaim
ne Eɡlat Sɛleseya.
Hale neerare aa lɔ
Nimrim nenabɔɔ bwa
hweehrɔ.
35Moab harɛ taa mɛɛ ba nɛra
baa dɛ ɛ sarahare
deŋɡarere dor,
dɛɛ fuh daawiile
dɛɛ tɛ ba voɡare la kpoora.
Men Korowiirii bola.
36N wio dɛɛ tɛ Moab ne
Kir Haresɛt tena,
kɛŋɔ baa dɛ hoh kalipe
dɛɛ ɡo lweyela ken.
Ba kondɔɔh baa dɔa bwa
le ba nɔn ta.
37Ba bwa fonɛ ba nyuune,
dɛ fonɛ ba tampona ɡe,
asɛ dɛ mɔne ba nɔɔra keri ne,
bɛlbwa kpɔ lweyal tɔ,
a bwa baɡle
kɛŋɔ ba lɔ lwe ta.
38Moab saldor ne
bɔra baa dɛ cheme bwa,
wobɛlbwa toole ka ja wii ta,
dɛkalkɛ n chɔɡ o bwa,
kɛŋɔ loŋ baa wola nyin
kpa la ken.
Men Korowiirii bola.
39Hé na ɡɛ Moab harɛ bwa
aa chɔɡa!
Hé na ɡɛ o nɛra aa dɛ wi!
Hé na ɡɛ sihiih aa kpo
Moab nɛra ba baŋa ɡole!
Moab bwa chɔɡɔ,
asɛ harɛre nɛra
baa soɡa baro bambile
teŋe baa mam ba.”
40Waa Korowii aa dɛ bol laanee nɔ.
“Hé na, mɛɛ ɡeloo dɔma
lɔ ba tɔ Moab harɛ ta,
kɛŋɔ kee yon le nyundua
dɛ́ paɡri kena dɛ́ ba ta
jal la ken.
41Baa pɔ bwɛjen Kereɔt nɛɛ,
dɛ́ chɔɡ ba dekpeɡa bwa.
Awola tɔpere la,
Moab banyoola ɛɛ ɔmɔɔ
kɛŋɔ haah loltea
aa lɔɔ ken.
42Baa chɔɡ Moab harɛ nɛra
bwaa, dɛkalkɛ ba vɛh
men Korowii.
43He nɛra haa lɔ
Moab harɛ,
ɔmee kohona ne bɔɔne,
dɛ bela baa haraa
dɛ́ chɔ kpa heya.
Men Korowiirii bola.
44Nomɛlbwa koh ɔmee kohona
la waa chwa dɛɛ kaa laa,
wɛɛ le bɔɔ binii.
Bɛlbwa ɡe waa ŋɔ wɛɛ
leo la, belii dɛɛ ba o lawa,
dɛkalkɛ Moab tena deŋnetɛra
saŋ telo ń kpɔ ba ta ba nɛ.
Men Korowiirii bola.
45Nɛra baa koh laa waa chwa
ba bwɛjen Hɛsbɔn wilo,
dɛɛ nyin ba nyu,
dɛkalkɛ nii le Kooro Sihon
koodem dɛ fuh le Hɛsbɔn
o fa aa di kora o ta.
Nii la fuoh jo ba harɛ jwɛhre
bwa ta, hale dɛ ka tel
Moab tena baa dɛ nyin
yoi kohona la
harɛ bwejena dor.
46Moab tena, hé bwɛɛlɛ!
Nɛra haa dɛ tomɛ voɡ
Kemɔs la, he chɔɡɔ.
Ba lawɛ he bibaala
ne bihaahna bwa
kaa bojaŋ harɛfale ta.
47Kɛ tɔpera ane dɛ ba
ásɛ n berɛ ɡel Moab harɛ
do ɡɛ o fa aa doa ja.
Men Korowiirii bola.”
Bonɔɔ men Jeremia Korowii waa maa bola ŋɔ wɛɛ pa Moab tena bolchɔɡe la jaɡɛ.
Currently Selected:
Jeremia 48: mzw
Highlight
Copy
Compare
Share
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
Jeremia 48
48
Gɛ Korowii aa bol Moab harɛ wa
1Koranar Bwa Kooro, Israel tena aa dɛ tomɔ bol Moab harɛ wa men Jeremia be ŋɔ,
“Nɛbo tena, hé bwɛɛlɛ,
dɛkalkɛ he bwɛɛ la
dɛ ba chɔɡa.
Dɔma yo Kiriataim tena
dɛ pɔ ba nɛ,
o danjwɛkpeɡ
baa maa baro kuuɡo,
asɛ sihiih kpo ba.
2Moab harɛ nyanyini tonɔ.
Dɔma baa yo Hɛsbɔn tena
dɛ pɔ ba nɛ,
dɛɛ vɔrɔwe
kɛ bá ba chɔɡ Moab harɛ.
Nɛra haa lɔ bwɛɛ baa dɛ yerɔ
Madmen ɡe bwa hel,
dɛkalkɛ laa tena ɛɛ
ba yoo baa.
3Lɔŋɔre dɛ le Horonaim,
sibeɡra ne bwɛɛ chɔɡa wii.
4Ba chɔɡ Moab harɛ bwa,
hɛ́ɛ no bechale wii.
5Hɛ́ɛ no ba wii ɡbɔɡa
Luhit ŋwɛnɛ ta,
suna wii baa dɛ wi
Horonaim ŋwɛnɛ ta.
6Ba ŋɔ, ‘Hé ɛ warane,
dɛ́ chwa lɛ he nyuune.
Hé chwa kɛŋɔ kpɔɡ bini
keeɡo waa lɔ
pua hɛŋle ɡbo harɛ
ta ken.’
7Moab harɛ tena,
hé kpɔ he te dawɛ
he bokpeɡa
ne kondɔɔh ta,
kɛ ba dɛ ba heyaa yoi
dɛ́ pɔ he nɛ,
dɛ́ kpɔ voɡ Kemɔs kaa
harɛfale ta,
o ne o nomonome
ne o kerekpoŋra.
8Bwɛɛ bɛlbwa aa kae ba
dɛ́ le chɔɡa la nyoa,
fɛlembɔjena ne deŋɡarere
a dor aa chɔa kaa
bwa ɛɛ chɔɡoo.
Men Korowiirii bola.
9Hé paaɡe bwea a che tɛ
Moab harɛ,
dɛkalkɛ aa biɡri ba chɔɡo.
Moab bwɛɛre dɛ ba dimɡbia
bera, nomɛlbwa aa
belaa so kpa.”
10Kórowii taah nomɛlbwa
waa wola o toma ɛ
bambile bwa ne la!
Nomɛlbwa waa kwaa
o tokobi cheɡ
ŋɔ waa kpɔ kpo nɛn la,
Kórowii taahno!
11Korowii ŋɔ, “Moab tena
fa soɡe deŋnesɔɔhna ta,
ba ta ban lawɛ kaa
harɛfale ta bwa.
Ba fa do kɛŋɔ sen mun
a taa lɔ loŋ bini,
baa wola an fuɡe do
loŋfale bini ken.
A kpeɡri,
a sɔɔh ɡe ta charɛ bwa,
dɛ ta do ɡɛ aa doa
wubwa la.
12Anomanta, tɔpere bɛl dɛ ba
ásɛ men Korowii tomɛ nɛra
bá ba fuɡe Moab tena ta,
kɛŋɔ baa dɛ fuɡe sen
loŋa bini la ken.
Komɛlbwa aa a bini kae ba,
ásɛ ba paɡre a bwa.
13Sihiih ɛɛ kpo Moab tena
ba voɡ Kemɔs waa,
kɛŋɔ sihiih aa kpo
Israel tena
voɡ Bɛtel baa kpɔ
ba hwɛɡa dawɛ o nɛɛ la.
14Moab tena,
ɛrɛɛ hɛɛ ba wona ŋɔ,
‘Ya ɛ banyoola,
baala yaa kpeɡa
dɛ won laa yoi kohona ɔ?’
15Moab harɛ dɛ ba chɔɡa,
ásɛ o dɔma lɔ ba tɔ
o bwɛɛre ta.
Baa kpoo
o bonɔndɛɛɡa bwaa,
men Koranar Bwa Kooro
maa ɛ kooro laanee bola.
16Moab wenaale telo tonɛ,
o chɔɡa dɛ ba bala warane.
17Bwɛɛre haa soɡa baro bwa
nɛra hé wi tɛo,
hé nɛra haa na
o jirima bwa ŋɔ,
‘Hé na ɡɛ kooro faahna
waa kpeɡa
dɛ dɔ jirima la aa kua.’
18Debɔn tena, hé le he soŋnibɔr
waa dɔ jirima ba,
dɛ́ ba so harɛ bomboɡ ta.
Nɛn waa ba chɔɡ Moab la balɔ
dɛ́ ba kuuɡi
danjwɛjen waa baro la.
19Arowa tena, hé che ŋwɛnɛ
nyoa dɛɛ kpa.
Hé nyiŋi haahna ne baala
baa chwaa dɛɛ kaa,
dɛ́ bɔɔ ba waa aa chiɡa.
20Sihiih kpo Moab tena,
dɛkalkɛ
ba harɛ la bwa chɔɡɔ.
Hé wi dɛɛ do lɔŋɔre.
Hé ɡel Aanɔn Moo nyoa tena
no kɛŋɔ ba chɔɡ Moab.
21Bwɛjena aa chɔ deŋɡare
doa harɛ waa chɔa kaa ta
waa bola dɛ́ pa bole telo,
anee Holon ne Jaasa
dɛ Mɛfaat,
22dɛ kaa Debɔn ne Nɛbo
dɛ Bɛt Diblataim,
23dɛ kaa Kiriataim ne
Bɛt Gamul dɛ Bɛt Meɔn,
24ne Kereɔt ne Bosra,
dɛ Moab bwɛɛre
aa lɔ bojaŋ
ne anɔ la aa bɛna bwa ta.
25Moab tena kpeɡri bwa tonɔ,
baa won yo kpa.
Men Korowiirii bola.”
26Korowii ŋɔ,
“Hé tɛ Moab tena sen bá
nyɔ dɛɛ kohona, dɛkalkɛ ba
ɛ men Korowii deŋnekpeɡ.
Hé ɡel ba chɔ dɛɛ ɡbaɡre
ba chwɛɛra ta,
dɛ́ berɛ akwekwe nɛra.
27Moab tena, Israel tena laa fa
berɛ he akwekwe nɛra
la aa?
Saŋ bɛlbwa he dɛ bol ba wa,
a do kɛŋɔ he na ba ne
ŋwɛɛra aa dɛ bɔ ken.
28Moab tena, hé chwa le
he bwɛɛre ta
dɛ́ ka so bwea dor.
Hé ka sɔh
he kɔne bwebɔɔne nyoo,
kɛŋɔ borɔnomare ken.
29Ya no Moab tena mbarafo
wa, ba dɛ na ba nyu,
dɛɛ ɡɔɔ ba te kohona.
Mbarafo ne deŋnekpeɡ
ɡboo su ba bambili.
30N jemɛ deŋnekpeɡ
baa dɛ ɛ wa,
mbarafo baa dɛ ɛ la ta
tɔnɔ bɛlbwa dɔe,
a bwa ɛɛ ba a jaɡaa.
Men Korowiirii bola.
31Anomanta, n wio dɛɛ tɛ
Moab tena,
ba ɡbosoro waa mɛɛ wi.
N wio dɛɛ tɛ
Kir Haresɛt baala.
32N wio dɛ tɛ Sibma tena
dɛ ɡwaa kɛ maa wi tɛ
Jasa tena,
Bwɛjen Sibma,
he do kɛ ɡrepo da,
he ta kpala dɛ ɡale Yar Mpo
hale dɛ kpoŋe kaa
Jasa Mpo nyoa bwa.
Kɛ taraken, nɛnchɔɡe baa
chɔɡ he bɔwɔb saŋ nɔna
ne he ɡrepo nɔna.
33Silɛɛ ne hɛɡra bɛlbwa toole
Moab harɛpare ondɛɛɡe ne
kooni ta kpa.
N ɡelɔ sen toole bɔra baa dɛ
harama,
nɛra toole dɛ́ tiɡri a ta.
Baa mooluu,
kɛ silɛɛ moola laa.
34Hɛsbɔn ne Eleale tena
lɔŋɔre dɛ le,
hale aa tel Jahas tena be.
A tel Soar tena be,
dɛ kpoŋe kaa Horonaim
ne Eɡlat Sɛleseya.
Hale neerare aa lɔ
Nimrim nenabɔɔ bwa
hweehrɔ.
35Moab harɛ taa mɛɛ ba nɛra
baa dɛ ɛ sarahare
deŋɡarere dor,
dɛɛ fuh daawiile
dɛɛ tɛ ba voɡare la kpoora.
Men Korowiirii bola.
36N wio dɛɛ tɛ Moab ne
Kir Haresɛt tena,
kɛŋɔ baa dɛ hoh kalipe
dɛɛ ɡo lweyela ken.
Ba kondɔɔh baa dɔa bwa
le ba nɔn ta.
37Ba bwa fonɛ ba nyuune,
dɛ fonɛ ba tampona ɡe,
asɛ dɛ mɔne ba nɔɔra keri ne,
bɛlbwa kpɔ lweyal tɔ,
a bwa baɡle
kɛŋɔ ba lɔ lwe ta.
38Moab saldor ne
bɔra baa dɛ cheme bwa,
wobɛlbwa toole ka ja wii ta,
dɛkalkɛ n chɔɡ o bwa,
kɛŋɔ loŋ baa wola nyin
kpa la ken.
Men Korowiirii bola.
39Hé na ɡɛ Moab harɛ bwa
aa chɔɡa!
Hé na ɡɛ o nɛra aa dɛ wi!
Hé na ɡɛ sihiih aa kpo
Moab nɛra ba baŋa ɡole!
Moab bwa chɔɡɔ,
asɛ harɛre nɛra
baa soɡa baro bambile
teŋe baa mam ba.”
40Waa Korowii aa dɛ bol laanee nɔ.
“Hé na, mɛɛ ɡeloo dɔma
lɔ ba tɔ Moab harɛ ta,
kɛŋɔ kee yon le nyundua
dɛ́ paɡri kena dɛ́ ba ta
jal la ken.
41Baa pɔ bwɛjen Kereɔt nɛɛ,
dɛ́ chɔɡ ba dekpeɡa bwa.
Awola tɔpere la,
Moab banyoola ɛɛ ɔmɔɔ
kɛŋɔ haah loltea
aa lɔɔ ken.
42Baa chɔɡ Moab harɛ nɛra
bwaa, dɛkalkɛ ba vɛh
men Korowii.
43He nɛra haa lɔ
Moab harɛ,
ɔmee kohona ne bɔɔne,
dɛ bela baa haraa
dɛ́ chɔ kpa heya.
Men Korowiirii bola.
44Nomɛlbwa koh ɔmee kohona
la waa chwa dɛɛ kaa laa,
wɛɛ le bɔɔ binii.
Bɛlbwa ɡe waa ŋɔ wɛɛ
leo la, belii dɛɛ ba o lawa,
dɛkalkɛ Moab tena deŋnetɛra
saŋ telo ń kpɔ ba ta ba nɛ.
Men Korowiirii bola.
45Nɛra baa koh laa waa chwa
ba bwɛjen Hɛsbɔn wilo,
dɛɛ nyin ba nyu,
dɛkalkɛ nii le Kooro Sihon
koodem dɛ fuh le Hɛsbɔn
o fa aa di kora o ta.
Nii la fuoh jo ba harɛ jwɛhre
bwa ta, hale dɛ ka tel
Moab tena baa dɛ nyin
yoi kohona la
harɛ bwejena dor.
46Moab tena, hé bwɛɛlɛ!
Nɛra haa dɛ tomɛ voɡ
Kemɔs la, he chɔɡɔ.
Ba lawɛ he bibaala
ne bihaahna bwa
kaa bojaŋ harɛfale ta.
47Kɛ tɔpera ane dɛ ba
ásɛ n berɛ ɡel Moab harɛ
do ɡɛ o fa aa doa ja.
Men Korowiirii bola.”
Bonɔɔ men Jeremia Korowii waa maa bola ŋɔ wɛɛ pa Moab tena bolchɔɡe la jaɡɛ.
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.