Jeremia 37
37
Jeremia lawa dɛ́ do dea
1Babelɔn Kooro Nebukadnesa lawɛ Josia bibaa Sedekia so kora ta Juda harɛ ta chiɡ Jehoiakim bibaa Jehoiachin naa ta.#2We 36:11-12 2Kɛ o ne o nomonome ne harɛ la ta nɛra bini bɛlbwa ta deŋne cheɡɛ, dɛ no waa Korowii aa cheɡɛ men Jeremia nɛɛ dɛ bol ba be la.
3Belaa Kooro Sedekia tomɛ Sɛlɛmia bibaa Jehukal, ne Maaseya bibaa sɔfo Sefania ŋɔ ń che ba naa ta soŋe Korowii yaa dɛ tomɔ la tɛ ya harɛ nɛra.
4Dɛ ba ta men Jeremia lawɛ do dea mɔɔ, asɛ n do nɛra la baah dɛɛ valɛ. 5Babelɔn laa tena yon ba bar Jerusalam cheme dɛɛ yoo ba, kɛ baa noa kɛŋɔ Ijipt kooro laa tena le Ijipt harɛ ta dɛɛ ba la, ba laa berɛ kaa.
6Belaa Korowii Israel tena aa dɛ tomɔ la bol waa n be ŋɔ, 7ń bol Juda Kooro Sedekia be ŋɔ, “Ijipt laa tena lɔ ŋwɛnɛ ta dɛɛ ba bá cha heya, kɛ baa berɔɔ kaa ba harɛ ta. 8Ásɛ Babelɔn laa tena la berɛ ba ja dɛ́ ba yo bwɛjen nɔ nɛra dɛ́ pɔ ba nɛ, ásɛ dɛ fuh o bwa ja.
9Men Korowii ŋɔ hɛ́ɛ berɛ he te neɡra dɛɛ lii kɛŋɔ Babelɔn tena ɛɛ ɡel heyaa. Baa ɡɛɛ ɛ! 10Hale dɛ he wono pɔ Babelɔn laa tena bwa nɛ, asɛ a ka banɔ la baa do ba bola ɡbo ba chɔ ba tɛnte deene bini kwaraa naa, baa iruu le dɛ́ ba fuh bwɛjen nɔ bwa.”
11Babelɔn laa tena berɔ le Jerusalam kaa, dɛkalkɛ Ijipt kooro laa tena dɛ ba. 12Ate, men Jeremia pa mun le bwɛjen Jerusalam ta dɛ́ kaa Bɛnjamen dea harɛ ta, dɛ́ ka lɛ n bɔr maa dɔ le n lolanar harɛ ta. 13Kɛ maa tel Bɛnjamen Doonyoa ta la, nomoa waa chɔ nɛra baa dɛ daah bela nyoa baa yerɔ Irija, o mɛɛ Sɛlɛmia, o nabaa ɡe sɔne Hanania, laɡ mɛ dɛ ŋɔ n be ŋɔ, “He chwao dɛɛ kaa Babelɔn tena be.”
14Anee n chaŋe ŋɔ, “Gɛ laa a do! Chwae laa n chwa dɛɛ kaa Babelɔn tena be.” Ane a bwa, Irija ta n be noɛ, o laɡ mɛ dɛ kpɔ mɛ kaa nomonome la be. 15Ba baah di n nɛɛ kɛrɛdɛ dɛ ŋɔ bá lɔɔ mɛ, dɛ kpɔ mɛ ka do koodem karake Jonatan dea. Dɛ ba beɡre o dea la dɛ lawɛ nɛra dɛɛ do o bini.
16Anomanta, ba laɡ mɛ do dea bɛl baa kwiu bɔɔ, biro tenten do o bini, asɛ n do bela biɡri. 17A habɔɔ la, Kooro Sedekia tomɔ ba ba yer mɛ ba o be koodem. Asɛ o bɔɔ mɛ bokɛre ŋɔ, “Waane lole dɛ le Korowii be tɛ yaa kɛɛ?”
Anee n chaŋe ŋɔ, “Waane lole, baa lawɛɛ tɛ Babelɔn kooro.”
18Belaa n bɔɔ Kooro Sedekia ŋɔ, “Wechɔɡa besoo n ɛ he ne he nomonome ne nɛra nɔ, asɛ he laɡ mɛ do dea nɔɔ? 19He keamere baa ŋɔa ŋɔ Babelɔn kooro aa he harɛ nɔɔ ba yo la bɔkwa waa puu baɔ? 20Taraken n naa kooro, cheɡ deŋne dɛ́ no waa maa dɛ ba he bɔɔra nɔ dɛ́ ɛ tɛ mɛ. N dɛ soŋe kɛ he bɛ men kpɔ ka do dea Jonatan dem bela kpa. He ɛ ɡɛ naa, sewaa chɛ kɛ n den sewɛ.”
21Anomanta, Kooro Sedekia ɡelɔ ba do mɛ dea o dembaah bela. N lɔ bela, asɛ tɔpere bɛlbwa nɛra baa dɛ wɔɔ paanoo ɛɛ tɛ mɛ paanoo beŋkpoŋ, ka tel kɛŋɔ paanoo aa baa tonɛ bwɛjen la bwa ta.
Currently Selected:
Jeremia 37: mzw
Highlight
Copy
Compare
Share
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
