Jeremia 36
36
Baruk kure Korowii tɔn o Dea
1Juda Kooro Josia bibaa Jehoiakim aa di kora bene anaarɛ ta la, Korowii bol waa men Jeremia be ŋɔ, 2“Ir dɛ kpɔ tɔn chwerɛ Israel ne Juda tena, dɛ harɛre aa jaa waa maa bol he be, dɛ́ le Kooro Josia bere saŋ ba le fini. 3Dɛ Juda tena no wekpeɡa maa dɛ nyin n kpɔ ba ta ba nɛɛ nɔ naa, ba ken ɛɛ charɛ ba liiree le ba wechɔɡa ta, ásɛ n kpɔ ba nyubinikpeɡ we-ɛɛla ne ba wechɔɡa kɛ ba.”
4Anomanta, men Jeremia yerɛ Nɛrea bibaa Baruk, dɛ kpɔ waa bwa Korowii aa bol n be la tɛo ó chwerɛ. Asɛ Baruk chwerɛ a bwa do tɔn bini. 5Asɛ n ŋɔ Baruk be ŋɔ, “Ba ta men ŋwɛnɛ tɛɛ n won jo Korowii Dea, 6anomanta, ir la bela awola tɔpere baa dɛɛ vɔwɛ nyoa la, ásɛ dɛ kure tɔn la bini waa maa ɡela he chwerɛ do tɔn bini la bwa baɡle ba. Kura baɡle Juda tena baa le ba bwɛɛre ta ba la bwa. 7Ba ken ɛɛ soŋe Korowii, ásɛ dɛ charɛ ba liire le ba wechɔɡa ta, dɛkalkɛ Korowii kpɔ o bandia waa do ɔma kohona la dɛɛ ba ba ta ba nɛ.”
8Gɛɛ a do Baruk kure Korowii waa waa chwera do tɔn bini la Korowii Dea bela, ɡɛ maa bol o be la. 9Juda Kooro Josia bibaa Jehoiakim aa di kora Juda harɛ bene anue, korobie anuanaarɛ ta la, nɛra baa lɔ Jerusalam ne Juda bwɛɛre ta nɛra bwa vɔwɛ nyoa ba waa dɔ nyɛl Korowii be. 10Gemaria mɛɛ Safan waa ɛ koodem karake dea belaa Baruk che dɛ kure waa bwa maa bol o be o chwerɛ do tɔn bini la. O dea la lɔ nyunduabɔr dɛ bɛne Korowii Dea doonyoa bɛl baa dɛ yerɔ Doonyofale la bɔr.
Baruk kure Korowii tɔn bini waa baɡle nomonome
11Mikaya waa ɛ Gemaria bibaa dɛ ɛ Safan naa, no Korowii waa bwa aa lɔ tɔn la bini, 12ate o ir la koodem karake la dea bela, dɛ nomonome la bwa soɡo. Banee koodem karake Elisama, ne Sɛmaya bibaa Delaya, ne Akbɔ bibaa Ɛl Netan, ne Safan bibaa Gemaria, ne Hanania bibaa Sedekia, dɛ nomonome baa kaa bwa. 13Mikaya aa bol waa bwa waa noa Baruk kure le tɔn la bini baɡle nɛra la tonɛ la, 14nomonome la bwa tomɛ Nɛtanea bibaa Jehudi, o nabaa sɔne Sɛlɛmia, asɛ Sɛlɛmia ɡe mɛɛ sɔne Kusi. Jehudi laŋɔ ka ŋɔ Baruk be ŋɔ, “Kpɔ tɔn haa kure o bini waa baɡle nɛra la ba.” Anomanta, Baruk iro kpɔ tɔn la kpoŋe kaa ba be. 15Anee nomonome la ŋɔ Baruk be ŋɔ, “Ya dɛ soŋe, so harɛ ásɛ dɛ kure baɡle ya ɡe.”
Ate, Baruk kuro baɡ ba. 16Baa no tɔn la bini waa la, ba nyiŋi dɔŋa sie bochela ne dɛ ŋɔ Baruk be ŋɔ, “A chɛ kɛ yá bol waa nɔ bwa baɡle kooro.” 17Ate, ba berɛ bɔɔ Baruk ŋɔ, “Baɡle yaa ɡɛ haa ɛa dɛ won chwerɛ ɡɛ waa nɔ bwa. Jeremiaa bola baɡle he chwerɛ kɛɛ?”
18Ate, Baruk chaŋe ŋɔ, “Jeremiaa bol wobɛlbwa n be, asɛ n ɡe chwera do tɔn nɔ bini.”
19Belaa ba ŋɔ o be ŋɔ, “He ne Jeremia bwa ka nyin bɔr sɔh. He bɛ ɡel bɛlbwa jemɛ bela haa lole.”
Kooro fuh tɔn la
20Nomonome la kpɔ tɔn la ka bil koodem karake Elisama dea, asɛ dɛ la kooro be o dembaah dɛ ka bol wobɛlbwa baɡlo. 21Belaa kooro tomɛ Jehudi ŋɔ ó ka kpɔ tɔn la ba. Asɛ o la Elisama dea ka kpɔ ba, dɛ ba kure baɡle kooro ne nomonome baa cheɡa baro la bwa. 22Dɛ waa saŋee, asɛ kooro so o koodem baŋ bɛl, dɛɛ ŋwee nii koropɔɔto ta. 23Jehudi aa kure tɔn la baŋne atoro kɛɛ anaarɛ tonɛ la, kooro la kpɔ kerejeɡa teŋe tɔn la bini, dɛ paa ta koropɔɔto la bini, ka tel kɛŋɔ tɔn la bwa aa fuah. 24Kɛ ane a bwa, kooro ne nɛra baa ja o nɛɛ dɛ no waa nɔ la, ta ɔmɛ, a ba ɛ kɛ baa tea bini ɛɛ chɔɡoo. 25A lole kɛŋɔ Ɛl Netan ne Delaya dɛ Gemaria soŋe kooro la ŋɔ o bɛ tɔn la fuh, kɛ o ta ba be noɛ. 26Ate, Kooro la do o bibaa Jeramiil, ne Asriel bibaa Seraya dɛ Abdeel bibaa Sɛlɛmia ŋɔ bá ba lawɛ Baruk ne men Korowii keame Jeremia ba tɛo. Kɛ Korowii lawɛ yaa sɔh.
27Kooro Jehoiakim aa fuh tɔn maa bol o bini waa baɡle Baruk tonɛ la, Korowii bol waa men Jeremia be ŋɔ, 28ń kpɔ tɔnfale dɛ́ chwerɛ waa aa lɔ loɡle tɔn Kooro Jehoiakim aa fuuh la do o ta. 29Korowii berɔ ŋɔ ń bol Juda Kooro Jehoiakim be ŋɔ, “He fuh tɔn la, dɛɛ bɔɔ Jeremia ɡɛ aa ɛa o chwerɛ ŋɔ Babelɔn kooro ɛɛ bao ba chɔɡ he harɛ nɔ, dɛ́ kpoo nɛra ne kondɛɛra bwa aa lɔ o ta. 30Anomanta, waa men Korowii aa dɛ bol hen Kooro Jehoiakim be laanee kɛŋɔ, ‘He naa bɛlbwa aa kara Kooro Devid aa soɡe o ta la dii ba bwa. He dɛ ba sewa ba kpɔ he chɔɔ ka ta, ásɛ wee lɔ he nɛɛ webaŋa, jwaana ɡe la mɛn lee he nɛ. 31Mɛɛ tɛr he ne he naanar dɛ he nomonome deŋnee, he wechɔɡa haa ɛa dɛ jo n nɛɛ la wa. He ne Jerusalam kɛɛ Juda tena bɛlbwa ta deŋne cheɡɛ dɛ no waa maa dɛ kah heyaa la, anomanta, mɛɛ kpɔ wekpeɡa maa ŋɔa mɛɛ kpɔɔ ba ta he nɛɛ laanee ba.’ ”
32Anomanta, men Jeremia kpɔ tɔnfale tɛ Nɛrea bibaa Baruk waa ɛ n karake la. Asɛ o chwerɛ wobɛlbwa a fa aa lɔ loɡle tɔn la bini dɛ anɔ la bwa aa jaa n kpɔ tɛo la.
Currently Selected:
Jeremia 36: mzw
Highlight
Copy
Compare
Share
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
