Jeremia 34

Kooro Sedekia jae wa

1Korowii bol waa men Jeremia be, ɡɛ saŋ Babelɔn Kooro Nebukadnesa ne o laa tena, ne harɛre nɛra, dɛ wobol bwa soo siwi nɛra baa lɔ o lɔɡa, aa pɛa dɛɛ yo Jerusalam ne bwɛɛre aa baro cheme. 2Korowii Israel tena aa dɛ tomɔ waa waa bol n be laanee kɛŋɔ, ń ir la ka ŋɔ Juda Kooro Sedekia be ŋɔ, o dɛ ba bwɛjen nɔ kpɔe do Babelɔn kooro nɔn ta, ásɛ o fuh o bwa. 3Kooro Sedekia aa bɔree dɔ chwa, baa lawɔɔ dɛ́ kpɔɔ ka do Kooro Nebukadnesa nɔn ta. O ne o sie ɛɛ ɡba dɔŋaa ba bol wa, ásɛ ba lawɔ kaa Babelɔn harɛ ta.

4Jeremia ŋɔ, “Juda Kooro Sedekia, cheɡ deŋne no waa Korowii aa ŋɔa ń bol he be. ‘Baa hen laa ta kpoe ba. 5Deŋnesɔɔhna taa hɛɛ ba sewa. Gɛ nɛra yon dɛɛ fuh daawiile ɡɛ saŋ ba yon dɛɛ huɡe koranar baa ɛ he naawa dɛ tɔ he sie la, ɡɛɛ baa ba daawiile fuih tɛ he ɡe. Baa wiu dɛɛ ŋɔ, “Akwe, ya kooro sewɔ.” ’ ”

6Belaa men Korowii keame Jeremia bol waa nɔ bwa Juda Kooro Sedekia be Jerusalam, 7ɡɛ saŋ Babelɔn kooro laa tena aa dɛ yo bwɛjen Jerusalam la. Dɛ laa tena la dɛ yo bwɛjena Lakes ne Aseka ɡe, dɛ a ɡboo ka bwɛjena baa ma danjwɛkpeɡa bara Juda harɛ ta.

Yoma nyu dii

8Korowii berɔ bol waa men Jeremia be, ɡɛ saŋ Kooro Sedekia ne Jerusalam tena bwa aa fɔwɛ fɔo, dɛ tɛ yoma bwa ŋwɛnɛ ŋɔ bá di ba nyu, 9yoma baa ɛ Hibru tena,#34:9 Hibru tena ne Juda tena bwa ɛ nɛmbeŋkpoŋ. haahna ne baala bwa, ɡɛ aa ɛ Juu te bɛlbwa bɛ o dɔŋ yom lawɛ. 10Anomanta, nɛra la ne ba nomonome bwa baa fɔwɛ fɔo la sɛoh ŋɔ, baa ɡel nɛra baa laɡ ba yoma laanee, ásɛ ba bɛlbwa di o nyu. Asɛ ba bwa sɛh dɛ ɡel bɛlbwa dɔ o te. 11Kɛ a habɔɔ, nɛra baa dɔ yoma dɛ ɡel ba di ba nyu la charɛ ba liire, ba ɛɡ ba dɛ ɛɛ ba yoma ja.

12Belaa Korowii bol men Jeremia be ŋɔ,#Mma 15:12 13“Waa Korowii Israel tena aa dɛ tomɔ aa dɛ bol laanee nɔ, ‘N ne he naawa fɔwɛ fɔo ɡɛ saŋ maa laɡ ba le Ijipt harɛ ta, bela baa do ba kɛŋɔ yoma la, kɛŋɔ 14bene anuanɛ bɛlbwa ta la, Hibru te bɛlbwa waa tomɛ o dɔɔ bene anumɛl la, a chɛ kɛ bá ɡelo ó di o nyu. Kɛ ane a bwa, he naawa ta deŋne cheɡɛ dɛ no n be. 15Dɛ ɛ tɔpera tamaa ane aa baa kaa, he charɛ he liire dɛ ɛ wa aa toɡra n sie, he bini bɛlbwa tɛ o dɔŋ waa ɛ yom ŋwɛnɛ o di o nyu. Hale dɛ fɔwɛ fɔo n sie, n Dea bonɔ haa dɛ tom mɛ. 16Kɛ he berɔ charɛ he liire dɛɛ chɔɡ n sɔn, bɛlbwa berɔ ka lawɛ baa kɛɛ haah o fa aa ɛ yom he lawɔ la. He berɔ ɛɡ ba dɛ ɛɛ ba yoma ja.

17Anomanta, men Korowii ŋɔ, he ta n waa la noɛ, he ta ɡelɛ he bala dɔ ba nyu di. Gɛ aa wera laanee kɛŋɔ, mɛɛ ɡeloo hé di he nyu, ásɛ laa ne weechɔɡa dɛ lɔr ɡe kpoo heya. Mɛɛ ɡeloo harɛre nɛra bwa bambile teŋe he wa. 18Baala baa wola n ne ba fɔo yaa fɔwa ta teŋɛ la, mɛɛ ɛɛ baa kɛŋɔ ba yon fɔwɛ fɔo dɛ́ pere nabale bini anɛ, ásɛ dɛ valɛ kpɔ o baah ta kaa la ken. 19Juda ne Jerusalam dɛ koodem nomonome, ne sɔfore dɛ harɛ la ta nɛra bwa n ne baa fɔwɛ fɔo ba valɛ kpɔ nabale baa pere o bini anɛ baah la, 20mɛɛ laɡ baa tɛ ba dɔma baa dɛ nyin ba dɛ kpoo laanee. Ásɛ ba ola berɛ kondikwa tɛ jumbii ne kpɔɡ bini ola.

21Mɛɛ lawɛ Juda Kooro Sedekia ne o nomonomee tɛ ba dɔma baa dɛ nyin ba dɛ́ kpoo laanee, dɛ Babelɔn kooro laa tena baa ŋɔa ŋɔ baa heya ba yo kpa la. 22Mɛɛ do baa ásɛ ba berɛ ba bwɛjen nɔ ta. Baa ba yo nɛra baa lɔ o taa dɛ́ laɡ ba, ásɛ dɛ fuh o bwa. Mɛɛ ɡeloo Juda harɛ bwɛɛre do kɛŋɔ pua hɛŋle ɡbo harɛ ta ken, nomɛlbwa aa won so a ta. Men Korowiirii bola.’ ”

Currently Selected:

Jeremia 34: mzw

Highlight

Copy

Compare