Jems 3
3
Waa nyondoŋe aa won ɛɛ
1Yabala, he bwa laa chɛ kɛ he ɡel he sie beɡre Korowii waa baɡla ta, dɛkalkɛ ɡɛ haa jema la, ya nɛra yaa dɛ baɡle Korowii waa la waa binii wɛɛ ba nyiŋa kɛrɛdɛ ɡwaa nɛra baa kaa la. 2Ya bwa dɛ koni saŋ bɛlbwa. Dɛ nɛn aa wobɛlbwa waa dɛ bol la ta koni aa, dɛ o ɛ nɛn o wa a toɡra tenten. Nɛn waa won o wobol nyiŋa la, o won o te lawa wobɛlbwa ta.
3Ya kpɔ bune dɛɛ do jaɡre nyoo asɛ aa no ya wa, asɛ ya won a bera dɛɛ kaa bela bwa yaa dɛ nyin. 4Yá ta sie na ɡɛ stiimae aa kana, asɛ peukpeɡ yon ta dɛ kpɔɔ dɛɛ kaa, kɛ dajeɡa bɛlee lɔ o ta ba kpɔ dɛɛ menɛ o sie asɛ wɛɛ kaa bela bwa baa dɛ nyin. 5Gɛɛ nyondoŋe do jeɡaa nɛn bini, kɛ dɛ won wejena ɛɛ. Hé na ɡɛ kɔr aa doa asɛ nihɔl won o fuih. 6Nyondoŋe do kɛŋɔ nihɔl ken, dɛ won wechɔɡa ɛɛ taeh ya bini, dɛ won yaa chɔɡa ya soɡa bini bwa. Bɔnsam niinii dɛɛ choŋu.
7Kpɔɡ bini ola ne olchɔɡa ne jumbii ne kwaa aa dɛ huuh, dɛ mpo bini pɛŋa bwa, nɛn won a dɛɛra á do pwɛre. 8Kɛ nyondoŋe te, nomɛlbwa toole dɛ won o nyiŋa. O ɛ konchɔɡe haa wola won toɡro. O dɛ kpo kɛŋɔ tɛɡchɔɡa ken.
9O nee yaa jam Korowii waa ɛ ya Naa ne ya Mɛɛ la, dɛ berɛ kpɔ o tenten dɛɛ taah ya dɔŋa Korowii aa ta ba kɛŋɔ o tenten la. 10Nyoa beŋkpoŋ la taa wobodɛɛɡa ne taahna bwa ɛɛ le. Yabala, a ta chɛ kɛŋɔ aa ba ɡɛ! 11Nenabɔɔ ɛɛ wonoo palɛ, o nee ane do som ásɛ ane ɡe do nyɛɡre aa? 12Yabala, fig da ɛɛ wonoo nɔnɛ sombie aa, kɛɛ bambi ɛɛ wonoo nɔnɛ fiɡ nɔna aa? Gɛ tentenee nenabɔɔ o nee aa do nyɛɡre la aa wola won berɛ do som buɡ ta tenten.
Wejema anɛ ane wa
13He bini umee ɛ wejereme dɛɛ no waa mun ɔ? Gel o pwɛr o te dɛɛ ɛ wedɛɛɡa, ásɛ o da baɡle kɛ o ɛ wejereme. 14Dɛ he dɛ nyin kɛ he ɡbo dɔ, dɛ dɔ bɔweela ne sibeɡra he bambile bini naa, amɔ he bɛ sɔn dɛ́ɛ nyin dɛ́ɛ ŋɔ he dɔ wejema. Dɛ he dɛ ɛ ɡɛ naa, dɛ he ta kasinteŋ dɔe. 15Gɛ wejema nɔ ta Korowii doa wejema ɛɛ, a ɛ harɛ ta kwa. Korowii Domadɛɛɡe toole a ta. Bɔnsam liiree. 16Anomanta, bela bɔweela ne n ɡbo dɔ aa lole la, belaa wesaɡasaɡare ne wedoŋa bwa do.
17Nɛn waa dɔ Korowii doa wejema la, kenii o da do, o waa do kaih, o waa dɔ deŋnesɔɔhna, o pwɛre, o dɛ no o dɔŋ wa, o dɛ na o dɔŋ sum, o ɛ nɛndɛɛɡe, o we-ɛɛla bwa wer, waa nɛra bane duure dɛɛ ɡwaa bane, o tea too. 18Nɛra baa dɛ nyin deŋnesɔɔhna la, nyopɛo nee baa ɛ ba wa, aa le wedɛɛɡa.#Aes 32:17
Currently Selected:
Jems 3: mzw
Highlight
Copy
Compare
Share
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
