Jems 2

Nɛra bini chala jae wa

1Yabala, haa dɛ yarada Yeesu Kristo waa ɛ jirima Dɔɔ nɔ, a ta chɛ kɛŋɔ he duu nɛra bane dɛ́ ɡwaa bane. 2Dɛ he ne he bala chemo dɛɛ tomɛ Korowii, nɛra banɛ ba jo he bini, bɛl do suuɡaswɛm kwaa dɛ tɔ yadɛɛɡe, bɛl ɡe tɔ yadoŋ, 3asɛ he tɛ onɔ la waa do suuɡaswɛm kwaa dɛ tɔ yadɛɛɡe la sobɔrdɛɛɡe, dɛ ŋɔ onɔ la waa tɔ yadoŋ la be ŋɔ, ó te che bela kɛɛ ó ba so harɛ he sie naa, 4amɔ dɛ he dɛ duu bane dɛ ɡwaa bane. Nɛra siebɔree hɛɛ nyiŋi dɛɛ duu bane dɛɛ nyiŋi bane nyubaahna. Haa kɛrɛdɛ ɛ.

5Yabala, hé no! Korowii we-ɛɛlaa kɛŋɔ ó le harɛ nɔ ta nyaara baa yaradao kɛrɛdɛ ásɛ ba yarada la ɛɛ ba kondɔɔh, ásɛ ba dɔ bɔr dɛ́ ja o Kora waa baɡɛ nyoa ŋɔ wɛɛ ɡeloo nɛra baa dɛ nyinu ja o ta la. 6Kɛ he te lawɛ nyaara sie teɡɛ harɛ. Dɔɔhna laa dɛɛ fiiɡi heya, dɛ lawɛ heyaa kaa che kɔɔto la aa? 7Gɛ nɛra nɔ laa dɛɛ bol wechɔɡa dɛɛ yaɡɛ Yeesu sɔndɛɛɡe nɔ baa kpɔa dawɛ heyaa la aa? Kɛ banee hɛɛ duu la!

8Dɛ he dɛ teŋɛ Korowii Kora Mmara baa chwera ŋɔ, “Nyin he dɔŋ kɛ he te ɡbaɡba la” ta naa, dɛ he dɛ ɛ kɛrɛdɛ. 9Kɛ dɛ he dɛ duu nɛra bane dɛ ɡwaa bane aa, dɛ he dɛ ɛ wechɔɡa. Mmara baɡlɔ kɛŋɔ he di bolchɔɡe. 10Nomɛlbwa waa teŋɛ Mmara la bwa ta kɛ dɛ koni o bini beŋkpoŋ la, dɛ o koni o bwa, dɛ di bolchɔɡe. 11Korowiirii baɡla ŋɔ, “Bɛ jwamane bɔ.” O tentenee bera baɡle kɛ “Bɛ nɛn kpo.” Dɛ he ta jwamane bɔe dɛ kpo nɛn aa, dɛ he ɛ nɛn haa koni Mmara la.

12Hé jemɛ kɛŋɔ Korowii dɛ ba ya waa bola o Kora Mmara waa kpɔa lɛ yaa asɛ ya dɔ ya te la ne. Anomanta, hé nyiŋi he nyoo wobol ne he we-ɛɛla ta kɛrɛdɛ, 13dɛkalkɛŋɔ Korowii aa naate waa wola o dɔŋ sum na la sumii na awola waa dɛɛ bol ya waa la. Naate waa dɛ na o dɔŋ sum la aa o waa bola ɔmɛ.

Yarada ne wedɛɛɡa ɛɛ

14Yabala, dɛ nomɛl ŋɔ o dɛ yarada Korowii, dɛ o ta o yarada kpɔe dɛɛ ɛ wedɛɛɡa aa, tɔnɔ besoo o yarada la dɔɔ? A ɡɛ yarada nɔ ɛɛ wonoo lɛo wa aa? 15He nao kɛŋɔ he dɔŋ baa kɛɛ haah dɛ chɔ waa, dɛɛ nyin yal dɛ́ tɔ, dɛɛ nyin kondikwaa ɡe dɛ́ di, 16asɛ he ŋɔ o be ŋɔ, “Kórowii tɛɛ bokpeɡa dɛ tɛɛ bosɔɔhna,” dɛ vɔmɔ kwaa aa tɛo bokpeɡa la te naa, dɛ tɔnɔ besoo lɔ waa haa bola tɛo la ta nɔ? 17Gɛɛ a do yarada ta kɛŋɔ dɛ nɛn ta wedɛɛɡa ɛɛ dɛɛ ja o yarada ta naa, dɛ o yarada la ɛ wepuu.

18Bɛl lole nomɛl ɛɛ ŋɔɔ yaradae ɡboo wɛɛ yarada Korowii, ásɛ bɛl ɡe ŋɔ wedɛɛɡaa o ɡee ɛ. Kɛ ɡɛ ɡe aa won maɡre. Ɛrɛɛ hɛɛ ba wona baɡ mɛ he yarada dɛ he ta wedɛɛɡa ɛɛ dɛɛ ja a ta nɔ? N te, mɛɛ che n wedɛɛɡa ɛɛ taa, ásɛ he jemɛ kɛ n dɛ yarada Korowii. 19He dɛ yarada kɛŋɔ Korowii beŋkpoŋii lole naa? A wer ɡa! Kɛ he ne Bɔnsam toromaa soɡe dabeŋkpoŋ ta. Ba ɡba dɛ yarada Korowii ɔmee ne bochela ne.

20Gɛne! He dɛ nyin n baɡle kɛŋɔ yarada wedɛɛɡa ɛɛ aa wola a ta jae la ɛ pɛɛpɛɛ aa? 21Ya naa Abraham fe aa dɛ ba o bie Aesek kpoe dɛ tɛ Korowii la, a ta laa a che Korowii ŋɔ o ɛ nɛndɛɛɡe o waa su o siwi la aa?#Mum 22:9 22He ta nae kɛŋɔ o yarada ne o wedɛɛɡa ɛɛ bwa aa pɛ aa? O wedɛɛɡa ɛɛ taa a che o yarada ɛ yarada kasinteŋ. 23Belaa Korowii Tɔn waa la ɛ kpela kɛŋɔ baa ŋɔa ŋɔ, “Abraham yarada Korowii, asɛ o yarada nomanta, Korowii ŋɔ o ɛ nɛndɛɛɡe o waa su o siwi” la. Dɛ ba dɛ yerɔ Korowii dam. 24Kɛ he nao kenɛ, nɛn wedɛɛɡa ɛɛ ne o yarada bwa taa a che wɛɛ ɛ nɛndɛɛɡe o wa ɛɛ su Korowii siwi, o yarada ɡbo ta laa.

25Gɛ tentenee a do hanjwamane baa dɛ yerɔ Rahab la ɡba nɛ. Israel tena toroma bane aa bala dɛ́ fe ba sɔh hweli o bwɛɛ harɛ waane dɛ́ ka taa ba bwɛɛ tena be la, o lɛɛ ba sɔh dɛ baɡ ba ŋwɛnɛfale ba chwa kaa. Gɛ wedɛɛɡa nɔ taa a che Korowii ŋɔ o ɡe ɛ nɛndɛɛɡe o waa su o siwi.#Jos 2:1-16 26Anomanta, ɡɛ nɛn ta hweera dɔe yaa dɛ o sewɔ la, ɡɛɛ yarada wedɛɛɡa ɛɛ aa wola a ta jae la ɛ yaradapuu.

Currently Selected:

Jems 2: mzw

Highlight

Copy

Compare