Aesaya 61
61
Amanesoma aa dɛ ba ba lɛ nɛra
1Nemenɛ Korowii Doma la ir n nɛ,
dɛ lee mɛ ŋɔ ń ba bol
Amanesoma baɡle nyaara,
dɛ́ larawe nɛra ba bambile
aa chɔɡa bwara,
dɛ́ ŋɔ nɛra baa laɡ ba yoma,
ne nɛra baa do ba dea
be ŋɔ ba lɛɛ balɔ.#Luk 4:18-19
2O tom mɛ ń ɡel nɛra bwa jemɛ
kɛ tɔpere Korowii aa dɛ ba
o nɛra lɛɛ dɛ́ tɛr ba dɔma
deŋne telo,
dɛ́ larawe nɛra bwa
baa dɛ wi bwara.
3O tom mɛ ń larawe
Jerusalam tena ba bambile
aa chɔɡa baa wi la bwara,
ásɛ ba dɔ silɛɛ dɛ́ ɡel wii,
dɛ́ ɡo kpɛɛra yela,
dɛ́ ɡel suna dii.
Baa ɛo kɛŋɔ daa Korowii
ɡbaɡba aa dua.
Baa dɛɛ ɛ waa aa toɡraa,
ásɛ ba kpɛɛro o waa
waa ɛa wa.
4Baa berɔ kwaa vɔrɔwe saŋ
la bwɛjena aa paɡra la.
Bwɛɛre aa berɛ dimɡbia
dɛ chɔ le
saŋ la ba tel fini bwa.
5Nɛŋhɔɔhra ɛɛ tomɛ heyaa,
dɛɛ teɡɛ he peera,
dɛ berɛ dɛɛ parɛ he kooni
dɛɛ nyiŋi he daa kooni ta.
6Baa yerɛ heyaa Korowii
sɔforee, ne Korowii
haa dɛ tomɔ la bonɔɔna.
Harɛre nɛra kondɔɔh ɛɛ ɛ
he kwaa,
ásɛ he koh a waa dɛɛ ɛ mbarafo.
7He sihiih
ne ncho haa dia bwa tonɔ.
Hɛɛ so he ɡbaɡba harɛ taa
ásɛ he kondɔɔh warɛ kohona,
he silɛɛ aa jaɡaa dɔ.
8Korowii ŋɔ,
“N dɛ nyin waa bola
dɛ́ pa bole aŋwɛnɛ ta,
n kii ŋwɛɛ ne wechɔɡa ɛɛ.
Mɛɛ tɛ n nɛra kembɔree
kasinteŋ ta,
n ne ba fɔwɛ fɔo,
o do le saŋ bɛlbwa.
9Ba sɔn ɛɛ leo harɛre nɛra
bwa bini,
ásɛ nomɛlbwa waa na ba
jemɛ kɛŋɔ banee n swee
andɛɛɡa tɛ.”
10N dɛ hɛɡre kohona waa
Korowii maa dɛ tomɔ
aa ɛa nɔ wa.
O kpɔ laala ne waa aa toɡra ɛ
batakaare do mɛ dɛ lɛɛ mɛ.
N wer kɛŋɔ hanfale ne
o jaa aa kpɔ ba te kɛrɛdɛ
dɛɛ kaa
ba cheremibɔr ken.#Wep 19:7-8
11Gɛ konduuli yon pere
harɛ dɛ le, dɛ kpeɡ la,
ɡɛɛ Nemenɛ Korowii
ɛɛ ba o nɛra lɛɛ,
ásɛ harɛre nɛra bwa kpɛɛro.
Currently Selected:
Aesaya 61: mzw
Highlight
Share
Compare
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
