Aesaya 6
6
Korowii yerɛ Aesaya ŋɔ ó ɛ o keame
1A bena Kooro Ussia aa sewa, men Aesaya na Korowii chaahna ta, dɛ o soɡe kookara waa daŋa dɛ ɡwaa komɛlbwa ta, asɛ o laala tɔ Korowii Dea bela harɛ bwa.#2Ko 15:7; 2We 26:16-23 2N berɔ na hweera kwaa ane aa dɛ lawɛ nii dɛ baro cheme baa yera Serafim. A bɛlbwa dɔ kena anumɛl. A kpɔ a kena la bini anɛ dɛɛ tɔ a siebɔr, dɛ kpɔ anɛ dɛɛ tɔ a nakpale ta, asɛ dɛ kpɔ anɛ aa kaa la ɡe dɛɛ ir.#Wep 4:8 3Asɛ a bini bɛlbwa ɛɛ ŋɔ o dɔŋ be ŋɔ,
“Koranar Bwa Kooro do ɡoroŋ,
o do ɡoroŋ kɛrɛdɛ.
O jirima su harɛ nɔ
bwa ta.”
4Asɛ a taa ɡel Korowii Dea la doonyoo ɡbeni daa la ne a doonyojoo bwa ɛɛ jiɡri, chuu tɔ Dea bela bwa.
5Anee n ŋɔ, “Akwe! N na wa. Wechɔɡa ɡboo n nyoa wobol bwa, asɛ n so nɛra wechɔɡa aa lɔ ba nyoo baah ta, dɛ berɛ na Koojen, Nemenɛ Korowii nɔ.”
6Belaa Serafim la bɛl kpɔ nyɛwa, dɛ kpɔ ka nyɛwɛ nihɔl le kon baa ɛ saraha o ta dɛɛ tɛ Korowii la ta, dɛ kpɔ ir ba n be, 7dɛ ba kpɔ tɔrɛ n nyoa dɛ ŋɔ, “Na, nihɔl nɔ aa tɔre he nyotɔn nɔ, he bolchɔɡ bwa le he nɛ. Korowii kpɔ he wechɔɡa kɛɛ.”#Yel 65:3; Jer 1:9
8Asɛ men Aesaya berɛ no kɛ Korowii aa ŋɔa ŋɔ, “Umee ń tomɔɔ? Umee dɛ́ la tɛ yaɔ?”
Anee n sɛh ŋɔ, “Mɛɛ lao, tom mɛ.”
9O ŋɔ, “La dɛ́ ka ŋɔ Jerusalam tena be ŋɔ,
‘Hɛ́ɛ no n waa kohonaa,
kɛ haa a mun noe ba,
hɛɛ nyiŋi a bini kohonaa,
kɛ haa waa aa dɛ ba chiɡa
jema ba.’ ”#Weɛ 28:26-27
10Korowii berɔ ŋɔ n be ŋɔ,
“Ka ɡel nɛra nɔ bambile do
kpeɡri,
tɔɔɡe ba deŋna,
dɛ tɔɔɡe ba sibie ɡe.
A waa laa aa, ba sie fe ɛɛ
nao,
ásɛ ba deŋna no,
ba bambile lawa,
bá berɛ ba n be ń lɛɛ ba.”
11Anee n ŋɔ, “N Naa Korowii,
dɛ ka tel saŋ besoo?”
O chaŋe ŋɔ,
“Dɛ ka tel kɛŋɔ bwɛjena la
aa berɛ dimɡbia,
nomɛlbwa aa wola a taa so,
ásɛ deremi aa lɔ a ta la chɔ
pɛɛ, kooni bwa berɛ pua.
12Mɛɛ doŋi nɛra laanee
kaa bojaŋ,
dɛ́ ɡel harɛ la bwa chɔ pɛɛ.
13Dɛ nɛn beŋkpoŋ kwaraa
ka harɛ la ta kwaraa naa,
mɛɛ chɔɡ o ɡbaa.
Wɛɛ ɛo kɛŋɔ ba yon teŋe daa
a ka o muŋkpul che dɛɛ
moɡɛ la.”
Daa la muŋkpul la cheɡɔ tɛ
n nɛra baa ba ka harɛ la
ta la.
Currently Selected:
Aesaya 6: mzw
Highlight
Share
Compare
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
