Aesaya 58
58
Nyoa vɔwa tenten
1Korowii ŋɔ,
“Kpɔ takpeɡ bol wa,
bɛ hel!
Gel he taa le kohona
kɛŋɔ bɛla!
Ŋɔ n nɛra Israel tena be
ba deŋnekpeɡ ne ba
wechɔɡa
baa ɛɛ mɛ la wa.
2Ba dɛ tom mɛ tɔpere bɛlbwa,
dɛɛ nyin n ŋwɛnɛre
dɛ jemɛ,
dɛɛ ɛ kɛŋɔ ba waa toɡrɔ,
á do kɛŋɔ ba ta Korowii
Mmarare vɛɛh.
Ba dɛ soŋe waa aa toɡra
n be,
dɛɛ nyin kɛ n bɛn ba.”
3Ba dɛ ŋɔ, “Ɛrɛɛ ya vɔwɛ
nyoa Korowii aa wola na,
dɛɛ pwɛr ya te
waa wola jemɛ nɔɔ?”
Korowii ŋɔ,
“Haa vɔwɛ nyoa la,
he ɡbo nɛɛ he sie lɛ dɛ yon
dɛɛ ɛ he tom-ɛɛra hɔhɔrɔwa.
4He nyoa vɔwa habɔɔ he ɡarɔ
dɛɛ yo.
He dɛ lɔɔ dɔŋa nɔŋɡuŋe ne.
He dɛ lii kɛŋɔ ɡɛ nɔɔ dɛ́ ɡel
n no he wesoŋa kɛɛ?
5Kenii hɛɛ yerɛ nyoa vɔwa
nɔ naa?
He kpɔ tɔpebeŋkpoŋ
dɛ pwɛr he te,
kɛɛ he ɡure nyu su kɛŋɔ
kpɔɡ, dɛ kpɔ lweyale tɔ
dɛ so tɔɔ ta naa,
dɛ anee nyoa vɔwa aa?
He dɛ lii kɛŋɔ men Korowii
sie dɛ lɛ ɡɛ ta kɛɛ?
6Nyoa vɔwa maa dɛ nyin
laanee kɛŋɔ,
hé foo nɛra baa wola
wobɛlbwa ɛɛ
ba do ba dea la ta.
Hé lɛ nɛra baa dɛ fiɡ ba
ásɛ ba dɔ ba te.#Mat 25:35-36
7Ane ɡee kɛŋɔ, dɛ lɔr dɛ kpo
nomɛl aa, tɛo kwaa ó di.
Nomɛl nyao, o ta bɔr dɔe
dɛ́ chɔ aa,
kpɔɔ kaa he dem.
Dɛ nomɛl ɡe ta yal dɔe
dɛ́ tɔ aa,
tɛo bɛl, ásɛ dɛ bɛ sie laa kpɔ
he lolanar ɡe nɛ.
8Anee dɛɛ ba ɡela n sie lɛ he
nɛ, ásɛ he chaah
kɛŋɔ wechɛn ken,
ásɛ he weela bwa kaa
warane,
he wedɛɛɡa tɔ he sie,
ásɛ n jirima tɔ he nɛ.
9Asɛ name dɛ he soŋ mɛ naa
ń no, he do lɔŋɔ
yer mɛ naa, ń sɛh ŋɔ,
‘Men nɔ.’
Dɛ he ɡel nɛra hɔhɔrɔwa ɛɛ,
dɛ ɡel waa kpɔe dɛ daɡ ba,
dɛ ɡel wobochɔɡa bola,
10dɛ tɛ nɛn waa chɔ lɔr
kondikwa,
dɛ tɛ nɛn waa dɛ
na wahala
o konnyini aa,
ate, biro ɛɛ berɛ
bochaahnee tɛ heya.
11Dɛ he ɛ ɡɛ naa, anee dɛ́ ɡel
men Korowii baɡle heya
ŋwɛnɛ saŋ bɛlbwa dɛɛ la,
dɛ́ berɛ tɛ heya kondɛɛɡa
pua hɛŋle ɡbo harɛ
ta he di, dɛ́ do kpeɡri.
Dɛ́ berɛ ɡel he do kɛŋɔ
bodɛɛɡe haa du daa
sɔn do o ta saŋ bɛlbwa ken,
kɛɛ bule waa wola hweeh
bwa la.
12Ásɛ he nɛra won berɛ
kwaa vɔrɔwe saŋ la
bwɛɛre aa paɡra,
dɛ berɛ dimɡbeeni la cheɡ
a buɡ ta.
Baa yerɛ heyaa nɛra haa won
danjwɛɛre aa kuuɡa
kwaaraa,
ne nɛra haa won deene
aa choɡla mae.”
Ona Tɔpere dii kembɔr
13Korowii berɔ ŋɔ,
“Dɛ he nyiŋi Ona Tɔpere la ta
o do ɡoroŋ tɛ heya,
he ta he ɡbaɡba we-ɛɛla ɛɛ,
dɛ liiru kɛŋɔ o ɛ men Korowii
tɔpere baa dɛ onɛ o ta,
haa wola kpɔe valɛ
he ɡbaɡba ŋwɛnɛ,
kɛɛ dɛ ɛ he toma
dɛ bol wobochɔɡa aa,
14ate, mɛɛ ɡeloo he dɔ
silɛɛ toma
haa dɛ tom mɛ la wa.
Mɛɛ berɔ ɡel he dɔ duure
harɛ ta bobɛlbwa, dɛ́ berɛ
na som harɛ maa kpɔa tɛ
he nabaa Jekɔb la ta.#Yel 37:4
Men Korowiirii bola.”
Currently Selected:
Aesaya 58: mzw
Highlight
Share
Compare
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
