Aesaya 57
57
1Nɛra ba wa aa toɡra dɛ́ serewe,
dɛ nomɛlbwa waane laa,
hale nomɛlbwa aa a mun
jemɛ.
Ba serewaa, wenaale bɛlbwa
aa ba nɛɛ ba kpa.
2Nɛra baa ɛ nɛndɛɛɡa la,
ba serewaa, ba dɛ chɔ
sɔnɔnɔɔ deŋnesɔɔhna ta.
3Kɛ heya, sɔmmɔra bii,
nɛra baa dɛ chɔɡ yal ne
jwamane tena bii,
hé ba bonɔ!
4Ume loroo hɛɛ di nɔɔ?
Ume baahnee hɛɛ muɡli
dɛɛ mile he nyoo o nɛɛ nɔɔ?
Deŋnekpeɡ tena naanar ne
nyosonteŋna dwee laa
heyaa?
5Hé liire bwaa kɛŋɔ
hɛɛ di sɛm
he voɡa dajena#57:5 Dajena la sɔne oaks Borɔfo ta. A munee baa tomɛ voɡa. mune.
Hé dɛ kpoo he bii
dɛɛ ɛ sarahare
voɡa aa lɔ bwebɔɔne
aa bɛne nenabɔɔne ta.
6Bwea aa bwara aa loɡaa,
he kpɔ le nenabɔɔne
ta ɛ voɡa dɛɛ toma.
Anee he wee sen saraha
dɛɛ tɛa,
dɛɛ tɛa mea saraha ɡe.
Anɔ nɔ bwa, a chɛ kɛŋɔ,
n sie lɛ a ta naa?
7Bwejena doree he la
dɛ ka kpoo kwaa
dɛɛ ɛ saraha, dɛɛ di sɛm.
8Hale he kpɔ he voɡa cheɡ he
deremi dɛ tɔ ɡbeni a ta.
He chwa mɛ, dɛɛ tomɛ voɡa,
a do kɛŋɔ he ne aa dɛ chɔ
mpa ta dɛɛ di sɛm ken.
He bambile lawa taeh,
he yoɡ he te tɛa he ne a pɛ
dɛɛ ɛ wedoŋa.
9He dɛ fɔɡle ɔleve noo ne
nosɔɔhsoma kohona
dɛ kaa tomɛ he voɡ Molɛk.
He tomɛ nɛra bojaŋ,
hale lalabwɛ
dɛɛ nyin voɡfala.
10He chwao ti voɡa dɛ koh,
kɛ dɛ vɛh ɡela.
He berɔ kwaa dɔ bokpeɡfala
dɛɛ nyin voɡfala,
haa ɡwɛɡre.
11Korowii ŋɔ,
“Bɔkwa tenee voɡa hɛɛ ɔma
kohona dɛ le n habɔɔ,
dɛ soh n waa kwaraa
ɡɛ nɔɔ?
Maa mwaa he bwa ne saŋ la
bwa, waa ɡela haa wola
men ɔmɛ nɔ kɛɛ?
12He dɛ lii kɛŋɔ anɔ la haa
dɛ ɛ la toɡrɔ, kɛ mɛɛ le he
mun nee waa haa dɛ ɛ ta.
He voɡa aa tɔnɔ bɛlbwaa
dɔ tɛ heya.
13Dɛ waane pu heya aa,
hé do lɔŋɔ tɛ
he voɡdamanta la,
á ba lɛ heya.
Peu bɛlbwa ɛɛ won che
a bwa kaa.
Nyoa peu kwaraa ɛɛ won
kpɔa kaa.
Kɛ nomɛlbwa waa kpɔ
o te dawɛ n nɛɛ la te
ɛɛ so harɛ la taa,
dɛ́ tom mɛ N Dea
Jerusalam.”
Nɛra baa dɛ pwɛr ba te bolarawa
14Korowii ŋɔ,
“Kwaa ŋwɛnɛ, kwaa ŋwɛnɛ
tɛ n nɛra bá ba!
Laa komɛlbwa waa tɔ
bɔr la kpɔ ta.
15Menee dɔ sɔn dɛ ɡwaa
komɛlbwa
dɛ do ɡoroŋ, dɛ do le
saŋ bɛlbwa.
N soɡe n kookara waa
daŋa ta boɡoroŋ nyundua,
dɛ berɛ so nɛra ba tea bini
aa chɔɡa ba wechɔɡa wa.
Ba pwɛr ba te baah ta,
dɛ́ ɡel ba sie sɔɔh,
bá dɔ hwɛɡa ja.
16Maa teŋɛ dɛ kpɔ waa dawɛ
n nɛra nɛ, kɛɛ n baah di
ba nɛɛ saŋ bɛlbwa.
Dɛ ɡɛ laa aa, ba bwara
ɛɛ hwaoh n sie.
Menee ta ba,
dɛ tɛɛ ba mkpa.
17Ba wechɔɡa ne ba sibeɡra
waa nomanta, n baah fa di
ba nɛɛ taeh, asɛ n tɛr ba
deŋne dɛ laa sie kpɔ ba nɛ.
Kɛ ane a bwa ba deŋne
kpeɡri, dɛɛ ɛ waa
ba bambile aa lawa.
18N jemɛ ɡɛ ba wechɔɡa ɛɛ
aa chɔɡ ba kɛŋɔ weela,
kɛ mɛɛ chaah baa,
dɛ́ tɔ ba sie,
dɛ́ baɡ ba ŋwɛnɛ,
dɛ́ larawe banɔ la
baa dɛ wi bwara,
19ásɛ Israel tena wii berɛ kpɛɛra.
Banɔ la baa lɔ bojaŋa ne
sie bonɔ la, mɛɛ tɛɛ baa
deŋnesɔɔhna tentenee,
mɛɛ chaah baa.#Ɛfe 2:17
Men Korowiirii bola.
20Wechɔɡ-ɛɛra te do kɛŋɔ
mpo nehɛma aa wola
won bobeŋkpoŋ che,
dɛ yon che doŋa
bwa soo siwi baa ta la ken.
21Deŋnesɔɔhna toole tɛ
wechɔɡ-ɛɛra.”
Korowiirii bola.
Currently Selected:
Aesaya 57: mzw
Highlight
Share
Compare
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
