Aesaya 54
54
Korowii nyina waa dɔa tɛ Israel tena
1Korowii ŋɔ, “Jerusalam haa do kɛŋɔ hambara,
ɡel he sie lɛ hɛɛ moo,
dɛkalkɛŋɔ haah o jaa aa
chwao la
ɛɛ ba dɔ biirii ɡwaa onɔ la
o jaa aa wola on chwae.#Gal 4:27
2Paɡri he tɛnte dea
kɛrɛdɛ ó do kan.
Gel o ŋwɛɛra do jaŋne,
dɛ́ kpaa daa haa kpɔa
baŋro la, á kaa bini.
3Hɛɛ paɡri he harɛ jwɛhree
a kaa sie diɡ ne ɡal,
ásɛ he naanar berɛ
lɛ harɛre nɛra bane
aa soɡe a ta taraken nɔ,
dɛ́ so a ta.
Bwɛjena aa chɔ pɛɛ
taraken la,
he nɛra ɛɛ warɔɔ
dɛ́ berɛ ba so a ta.
4Bɛ ɔmɛ, sihiih aa he kpoe ba
kpa, nɛra aa ɡel he fɛɡre.
Hɛɛ soh he toli saŋ sihiih
waa bwaa,
haa ɡɛ saŋ haa do kɛŋɔ
luhaah laanee lii kpa.
5Naate waa tae laanee
dɛ́ do kɛ he jaa,
o sɔne Nemenɛ Korowii.
Israel Nɛŋɡoroŋ laanee
he Lɛɛ,
onee harɛ nɔ bwa Dɔɔ.
6He do kɛŋɔ bitolo
o jaa aa vɛoh
aa we o nɛɛ kohona.”
Kɛ Korowii yerɛ ŋɔ
he ba o be, dɛ ŋɔ,
7“Tamaa kenii n ɡele,
kɛ n tea ɛɛ domɛ he nɛɛ
kohona, dɛ́ berɛ ba he ne.
8Bandia kohonaa ɡela n laa
sie kpɔ he nɛɛ tama,
kɛ n nyina aa wola jaɡa
dɔe nomanta,
mɛɛ dɔ tedomaa tɛɛ.
Men Korowii
maa ɛ he Lɛɛ bola.
9A do kɛŋɔ Nowa ber saŋ ken
n be,
ɡɛ maa ŋwɛɛra kɛ maa ɡel
nee su bɔle
harɛ bwa kpa la.#Mum 8:21
Gɛɛ taraken mɛɛ ŋwɛɛ kɛŋɔ
n baah aa he nɛɛ di
ń tɛr he deŋne kpa.
10Hale bwejena jiɡro le
a buɡ ta,
asɛ deŋɡarere chuɡri aa,
n nyina aa wola jaɡa dɔe
la te ɛɛ do lee,
n ne he deŋnesɔɔhna fɔo la
ɡe aa jaɡa dɔe ba bwa.
Men Korowii maa dɔ
tedoma tɛɛ laanee bola.
11Jerusalam, wahala bwɛjen
peuchɔɡa aa taa dɛ chɔɡe,
nomɛlbwa aa wola toole
dɛ́ larawe he bwara,
mɛɛ kpɔ bwedɛɛɡa a yoɡ
aa kpeɡa
dɛ́ berɛ kwaa mae.
12Mɛɛ kpɔ bwedɛɛɡa
a yoɡ aa kpeɡa bwa
soo siwi baa yera rubii
ma he dejaŋa.
He doonyoo ɡberjena ne
danjwɛɛre ɡe,
anɔ la aa dɛ nyɛɡle
ne anɔ la aa jaa bwa nee
mɛɛ ba a ɛɛ.
13Men Korowiirii
dɛ́ baɡle he bii wa,
dɛ́ ɡel a chiɡ ba kɛrɛdɛ,
bá dɔ deŋnesɔɔhna.
14Waa aa toɡra taa aa ba
cheɡa he won che kɛrɛdɛ,
he ne nyubinikpeɡ tena
baah ɛɛ do jaŋnee,
komɛlbwa toole he ɔmɛ.
15Nomɛlbwa nyini naɡra aa,
n be laa a le.
Bɛlbwa waa kpɔ yoi ba
pui la aa hen wo.
16Menee ta loɡre,
o yon kpɔ nii do hɔla ta dɛ́
lɔa a hɔ, dɛ́ kpɔ buni do
dɛ́ loɡɛ dɔmkwa.
Menee ta laa tena ɡe,
ba kpɔ dɔmkwaa yo dɛɛ
chɔɡ kwa.
17Dɔmkon bɛlbwa toole bá
won kpɔ che
he nɛɛ á maɡre.
Nomɛlbwa waa kpɔ
waa dawɛ he nɛɛ la,
wɛɛ di bolchɔɡee.
Mɛɛ che n bonɔɔna habɔɔ,
bá di bole ba dɔma nɛ.
Men Korowiirii bola.”
Currently Selected:
Aesaya 54: mzw
Highlight
Share
Compare
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
