Aesaya 52
52
Korowii ɛɛ lɛ Jerusalam tenaa
1Bwɛjen Jerusalam, ir! Ir nyu ne!
Kpɔ bokpeɡa tɔ he te kɛŋɔ
yal ken.
Jerusalam, Korowii bwɛɛ
waa do ɡoroŋ,
kpɔ he yadɛɛɡe tɔ
dɛ dɔ jirima.
Nɛra baa wola Korowii tomɛ,
dɛ kah doŋa te bɛlbwa,
aa won jo he bwɛɛ nɔ ta
kpa.#Wep 21:27
2Jerusalam haa do kɛ bitolo,
ir dɛ́ pee he bwara ta,
dɛ́ so he kookara ta.
Ásɛ dɛ laa jɔɡrɔre baa lawɛ
dɛ doe laa ta la foo.
3Kenii Nemenɛ Korowii ŋɔ he nɛra be.
“Ba ta heyaa yoɡe lɛ
komɛlbwa,
ɡɛɛ hɛɛ ba lɛɛ dɔe
haa wola komɛlbwaa bɔ.”
4Nemenɛ Korowii berɔ ŋɔ,
“N nɛra fa kaa so Ijipt harɛ
ta ka. Ban dɛɛ nyin
dɛ kaa.
Asɛ aa la sie Asiiria tena
laɡ ba kaa kpeɡri ne.
5Bɔkwa waa nɔ jaɔ?
Babelɔn tena lawɛ
n nɛra bwa kaa pɛɛpɛɛ,
ba ka do ba lɔɡa,
ba siwi sa ba.
Ba dɛ bol mɛ nɛnhɛlwobol
saŋ bɛlbwa.
6Anomanta, saŋ bɛl ɛɛ bao
n nɛra jemɛ ɡɛ maa doa,
dɛ́ jemɛ kɛŋɔ
menee Korowii.
Menee bola.”
7Hé na ɡɛ toroma baa kpoŋe
Amanesoma dɛ valɛ bwea
dor dɛɛ ba wa aa dɔ
nyokpoa ne,
dɛɛ bol deŋnesɔɔhna
ne Korowii lɛɛ wa!#Nee 1:15; Rom 10:15
Hé no ba bala wa aa,
he bambile ɛɛ sɔɔh heyaa
taeh.
O bol Saayɔn tena be ŋɔ,
“Korowii haa dɛ tomɔ
di kora!”
8Nɛra baa dɛ daah bwɛjen la
pɛo
dɛɛ do lɔŋɔre silɛɛ ne!
Ba na Korowii ba siwi ne
kɛ waa bera dɛɛ ba Saayɔn!
9Jerusalam tena, he bwɛjen
berɛ dimɡbia,
hé pɛ ɡo silɛɛ yela.
Korowii larawe o nɛra bwara,
dɛ lɛ Jerusalam ɡe.
10Wɛɛ ɡeloo harɛre nɛra bwa
na ɡɛ
o kpeɡri aa do ɡoroŋ.
Nɛra baa lɔ harɛ jaɡa bwa
ɛɛ na ɡɛ Korowii yaa dɛ
tomɔ aa wona lɛ yaa.
11Hé le Babelɔn harɛ!
Hé pere he te le
ba nɛɛ kwara!
He bɛ komɛlbwa
waa kah doŋa leɡe!
He nɛra haa cheɡɛ Korowii
Dea laala la, hé le
ba bini, dɛ́ do ɡoroŋ.#2Kɔ 6:17#Ɛsr 8:28
12Toola ne laa hɛɛ ba lee,
kɛɛ chwae laa hɛɛ ba
chwae le,
dɛ́ dɔ he nyu.
Korowii haa dɛ tomɔ la ɛɛ
tɔ he siee,
wɛɛ berɔ teŋɛ he nɛɛ
dɛ́ daah heya.
Korowii Bonɔɔ bonyɛɡa ne o jirima dɔe wa
13Korowii ŋɔ, “N bonɔɔ ɛɛ
won ɛ toma maa kpɔa
do o nɔn ta la tonɛ,
baa duuruu taeh,
dɛ́ ɡel o sɔn le.
14Nɛra warɔ dɛ nao
ba bwara yɔr,
ɡɛ baa ɛo, o siebɔr
ne o bwadabii
beɡre dɛ doŋ kohona la,
o ta nɛn leɛ kwaraa kpa.
15Kɛ taraken, harɛre nɛra
nyoa ɛɛ kpo o waa,
koranar hel, ba bwara yɔr.
Baa na waa baa wola ba be
bolɛ bwaa,
ásɛ anɔ la baa wola noɛ
bwa la, bá no a mun.”#Rom 15:21
Currently Selected:
Aesaya 52: mzw
Highlight
Share
Compare
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
