Aesaya 29
29
Kooro Devid Bwɛjen wenaale wa
1Jerusalam#29:1 Jerusalam sɔn bɛl ɡee Areɛl. tena hé bwɛɛlɛ!
He bwɛjen Kooro Devid aa
soɡe o ta la ɛɛ chɔɡoo.
Bena bɛlbwaa he teŋɛ
dɛɛ di he tɔpejena,
2kɛ Korowii ŋɔ wɛɛ ɡeloo he
Jerusalam tena bwara nyɛɡ
heya, ásɛ hɛɛ wi
dɛɛ dooɡe lɔŋɔre.
He bwɛjen la bwa ɛɛ ɛ
chalee,
kɛŋɔ kon baa kpoo kwaa
dɛɛ ɛ saraha o ta.#29:2 Hibru tena wobol ta Areɛl mun bɛl ɡeekon baa kpoo kwaa dɛɛ ɛ saraha o ta.
3Wɛɛ ɡeloo he dɔma bar heyaa
cheme dɛ́ tɔ heyaa do.
Baa ma konjaŋaa pɛl
danjwɛɛ waa bar bwɛɛ la,
dɛ́ che a ta jo.
4Wɛɛ lɔ heyaa bil harɛ,
he chɔ dɛɛ bol wa,
he taa ɛɛ le
tama tama ken.
He wobol ɛɛ doo kɛŋɔ
lale wobol
dɛɛ le harɛ bini,
aa baŋee le kohona.
5Kɛ he dɔma baa wara
ɛɛ berɔɔ ɛ kɛŋɔ bomboɡ
mohooh ken,
ásɛ peu kpɔ kaa,
nɛnlaa ba nyu bini aa
kpeɡa he nɛɛ ɛ
kɛŋɔ mea pɛɡa peu
yon kpɔa ir kaa la.
Aa ɛo warane wɔrɔbe nɛ,
6Koranar Bwa Kooro
ɛɛ ba lɛ heyaa
bwaala kɔɡra nee,
harɛ jiɡri, ɡbɔɡa tɔ kohona,
peukpeɡ ta,
bwaalachɔɡe nɛ,
nii chɔɡ kwa.
7Harɛre nɛra baa wara,
dɛ pu Jerusalam dɛɛ yo,
dɛ ka kuuɡi o dekpeɡa,
dɛ baro dɛ tɔ o nɛra do la,
ba bwa waa ɛɛ kaaloo kɛŋɔ,
haa na waane
dɛ deera jwaana ken.
8Aa ɛo kɛŋɔ lɔr aa dɛ kpoe,
asɛ he chɔ dee dɛɛ di kwa,
kɛ haa ba jar ir la,
dɛ lɔr ta dɛ kpoe la ken.
Kɛɛ nyɔɡre aa dɛ kpoe he dee,
dɛ na kɛ he dɛ nyɔ ne,
dɛ jar ir dɛ nyɔɡre la ta
dɛ kpoe la ken.
Gɛɛ aa ba doe dɛ tɛ harɛre
nɛra baa wara dɛ yo
Saayɔn Bwejen la.
9Jerusalam tena nyoa ta
kpoe yaa?
He bwara ta yɔraa?
He mwaalo ne,
a ɡel he nyoŋe,
he ta sen nyɔe kɛ dɛ ɡe dɛɛ,
he dɛ yɛɛɡe, kɛ he ta
seŋkpeɡa nyɔe.
10Korowii kpɔ dom ta he nɛ,
hɛɛ ba dom chɔe ka ɡarɛ,
dɛ tɔɔɡe keamere la sibie,
dɛ wili nɛra baa dɛ na waa
bini la.#Rom 11:8
11Waa aa dɛ ba chiɡa kerekere ba naa kɛŋɔ chaahna ta nɔ, he bee a do kɛŋɔ waa chwera do tɔn ta, dɛ marɛ o nyoa. Asɛ dɛ he kpɔɔ tɛ nɛn waa jemɛ kura dɛ ŋɔ, “N poori, kure ń no aa,” o ŋɔ, “Maa won kure, ba marɛ o nyoa.” 12Kɛɛ dɛ he kpɔ tɔn la la nɛn waa wola jemɛ kure be ŋɔ, “N poori, kure tɛ mɛ” naa, o ŋɔ, “Maa jemɛ kure.”
13Korowii ŋɔ,
“Nɛra nɔ te, nyoa ɡbo nee
baa baɡle
kɛŋɔ n ne ba pɛo,
nyoa ɡbo nee baa duu mɛ,
kɛ ba tea bini te ta toe.
Toma baa dɛ tom mɛ la,
nɛwɛnyini mmarare taa
baa baɡle ŋɔ nɛ́ra teŋɛ.#Mat 15:8-9
14Anomanta, mɛɛ ba
nyokpowaa nee ba ta ba
nɛɛ ja, ba bwara yɔr.
Aa ɡeloo wejerema ɡɛn,
ásɛ nɛra baa jemɛ waa
bini waa ɛ pɛɛpɛɛ.”#1Kɔ 1:19
15Nɛra baa swɛɛ siwi
kpɔ ba waa
dɛɛ sɔh Korowii la,
ba bwɛɛlɛ!
Ba dɛ ɛ ba waa biro ta
dɛɛ lii ŋɔ,
“Umee na mɛ nɔ?
Umee dɛɛ ba jema ɔ?”
16He berɛ waa sie pi,
kɛŋɔ mamaa aa berɛ choh.
Kon baa mao la ɛɛ wonoo ŋɔ
nɛn waa mao la be ŋɔ,
“He laa ma mɛ,”
kɛɛ vii ɛɛ wonoo ŋɔ mamaa
be ŋɔ,
“Haa wobɛlbwa jemɛ” aa?
17A ka tamaa Lɛbanɔn kɔr
berɛ harɛpare ondɛɛɡe,
ásɛ o ta kwaa do kɛŋɔ
kɔr bini kwaa ken.
18Gɛ saŋ la, amumure ɛɛ noo
kɛŋɔ baa dɛ kure tɔn,
ásɛ nyoŋa baa soɡe
biro ta la won dɛɛ na.#Mat 11:5
19Nɛŋɡwɛɡra sie ɛɛ berɔɔ lɛ
Korowii waa ta ja,
nyaara hɛɡre
Israel Nɛŋɡoroŋ la wa.#Mat 5:3-5
20Nyubinikpeɡ tena
aa lee do kpa,
bammuɡli tena
aa lee do kpa,
nɛra ba sie aa swɛɛ
wechɔɡa ta bwa,
Korowii ɛɛ chɔɡ baa.
21Wɛɛ chɔɡ banɔ la nɛra
aa che ba wobol ta dɛ́ ɛ
wechɔɡa, ne banɔ la
baa ɡela nɛra baa bol waa
dɛɛ pa bole wili,
ne banɔ la baa cheɡɛ
nyosone ŋwɛnɛ ta,
dɛɛ pa nɛra baa di
bolsom bolchɔɡe.
22Anomanta, Korowii waa lɛ Abraham bol waa nɔ dɛɛ baɡle Israel tena ŋɔ,
“Sihiih aa heyaa kpo kpa
bwa,
haa he dɔma ɔma waa koh
ɡwaŋɛ kpa.
23Ba baa na ba bii ba bini,
ɡɛ maa ɡela ba warɛ la aa,
baa duu mɛɛ,
dɛ́ sɛh kɛŋɔ menee
Israel Nɛŋɡoroŋ la,
dɛ́ ɔmɛ men Korowii baa
dɛ tom mɛ la kohona.
24Nɛra baa ɡɛna ɛɛ hweli waa
dɛ́ no a mun,
banɔ la baa dɛ naɡre
waa la ɡe sɛh
baa baɡ ba wa.”
Currently Selected:
Aesaya 29: mzw
Highlight
Share
Compare
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
