Hosia 7
7
1Korowii berɔ ŋɔ, “Saŋ bɛlbwa men Korowii aa
ŋɔ ń chah n nɛra
Israel tena
dɛ́ ɡel ba dɔ kwaa ja la,
ba nyubinikpeɡ ne ba
wechɔɡa ɡboo mɛɛ na.
Ba dɛ faah dɔŋa,
dɛ jo deene dɛɛ ŋwɛ,
dɛɛ ŋwɛ nɛra kwaa
fɔɡbaahna.
2Baa lii kɛŋɔ n jemɛ
ba wechɔɡa baa
dɛ ɛ la bwa.
Ba wechɔɡa ɡwaa ba nɛ,
a bwa chɔ n sie.
3Ba nyubinikpeɡ we-ɛɛla
dɛ lɛ kooro sie,
ba nomonome ɡe sie ɛɛ lɛ
nyosone baa dɛ teŋe ta.
4Ba bwa dɛ bɔ jwamane,
ba we-ɛɛla do
kɛŋɔ fononoo bini nii
nɛn waa dɛ wɔɔ paanoo
aa kwaara do kohona,
dɛ charame paanoo ka tel
kɛŋɔ aa uɡa,
dɛ kpɔ ka do fononoo
bini la.
5Kooro tɔpejen bɛl dii ta la,
nomonome la nyɔ sen dɛɛ,
asɛ kooro ne sennyɔɔra la
dɛɛ, dɛɛ ɛ ɡɛnewa.
6Ba we-ɛɛla do kɛŋɔ fononoo
bini nii ken,
sɔeh ba sɔh dɛɛ vɔrɔwe
kooro vɔrɔwa.
Ba bandia lɔ ba bini jwaana
bwa,
tɔɔ perɔ aa, dɛ a ɡwaalɔ,
dɛ́ do kɛŋɔ ninlao ken.
7Ba bandia la do kɛŋɔ
fononoo bini nii ken,
ba kpɔ kpoo ba koranar.
Ba koranar bwa serewɔ,
kɛ nomɛlbwa aa men soŋe
ŋɔ ń chao.
8Israel tena kpɔ ba te dɛɛ koo
harɛre aa bar ba nɛra bini.
Ba do kɛŋɔ paanoo
o baŋ pera ɡbo aa bea.#Yel 106:35
9Nɛŋhɔɔhraa dɛɛ di kpeɡri
ba nɛ, kɛ baa jemɛ.
Ba nyumpona pa mun dɛɛ to,
kɛ baa jemɛ.
10Israel tena mbarafo dɛ di
danseɛ ba wechɔɡa wa,
kɛ anɔ bwa habɔɔ,
baa berɛ dɛɛ ba men Korowii
baa dɛ tom mɛ la be,
kɛɛ dɛ́ nyin n bɔr.
11Israel tena ta liire dɔe,
ba do kɛŋɔ kweah waa ira,
dɛ la dɛɛ ba waa
wola sobɔr dɔe.
Ba tɔ sie yerɛ Ijipt tena ŋɔ
bá cha ba,
dɛ berɛ chwa la
Asiiria tena be.#2Ko 17:4
12Mɛɛ ta asawii dɛ́ laɡ ba,
kɛŋɔ baa dɛ lawɛ jumbii
ken,
dɛ́ tɛr ba deŋne wechɔɡa
baa ɛa la wa.
13Bá bwɛɛlɛ!
Ba vɛɛh mɛ
dɛ berɛ habɔɔ kpo mɛ.
Waa dawɛ ba nɛ,
ba ɛ deŋnekpeɡ n nɛ.
N pɛla lole kɛŋɔ n fee lɛɛ ba,
kɛ ba teŋe nyosone dawɛ
n nɛ.
14Baa men soŋe kasinteŋ ne,
ba chɔ harɛ dɛɛ wi kɛŋɔ
voɡtoroma.
Ba boa nyoa dɛɛ soŋ mɛ mea
ne senfala,
kɛ dɛ laa ba te kpɔ n nɛɛ kɛ
voɡtoroma.
Deŋnekpeɡ tena bane le!
15Menee dɛɛ ba,
dɛ tɛɛ ba kpeɡri,
kɛ ba dɛ vɔrɔwe
n wechɔɡa vɔrɔwa.
16Ba teŋɔ berɛ habɔɔ dɛɛ kpo
men Nemenɛ Korowii,
dɛ kaa tomɛ voɡ waa wola
kpeɡri dɔe,
ba do kɛŋɔ to waa sɔɔhna
ken.
Laa taa baa ba
ba nomonome kpoora,
ba mbarafo wobol wa,
ásɛ Ijipt tena mam ba.”
Currently Selected:
Hosia 7: mzw
Highlight
Copy
Compare
Share
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
