Hosia 12
12
1Israel tena wobɛlbwa ɛ
wepɛɛ dɛɛ chɔɡ wa
tɔpere te bɛlbwa.
Ba chwao dɛɛ ti nyosone,
asɛ naɡrenyin we-ɛɛla
ɡe su ba bwa.
Ba ne Asiiria tena fɔwɛ fɔo,
ba ne Ijipt tena ɛɛ di bona.
2Korowii ne Juda tena dɔɔ,
wɛɛ tɛr Israel tena deŋnee
ɡɛ ba wechɔɡa aa doa wa,
dɛ́ bɔ ba kem ɡɛ
ba we-ɛɛla aa doa.
3Ba nabaa Jekɔb ta aa lɔ
o nya tea bini la,
dɛ o lawɛ o kpar dɔŋ Esɔ
nalume baa vuuɡi dɔŋa.
Waa baa kpeɡ la,
o ne Korowii su luɡe.#Mum 25:26#Mum 32:24-26
4Jekɔb ne nyundua torome
su luɡe asɛ Jekɔb pɔ o nɛ,
o wio dɛ soŋe nyundua
torome la ŋɔ
ó sweero andɛɛɡa.#Mum 32:24-28
Korowii ba o be Bɛtel
dɛ bol waa o be bela.#Mum 28:10-19
5Korowii Waa Ɛ Kpeɡri Bwa
Dɔɔ, Jekɔb ne o su luɡe la,
o sɔnee Korowii,
onee chɛ kɛ yá tomɛ.
6Kɛ a chɛ kɛŋɔ Jekɔb naanar,
hé berɛ ba Korowii
haa dɛ tomɔ la be,
hé kpoŋe nyina ne
kasinteŋ,
dɛɛ no o be saŋ bɛlbwa.
7Korowii ŋɔ, “Kon-yoɡra
kpɔ kwaa aa wola chɛɛ
maɡɛ kwaa dɛɛ faah nɛra,
ba sie dɛ lɛ nɛn faahra ta.
8Israel tena dɛ ɛ mbarafo
dɛ ŋɔ,
‘Ya dɔ suuɡa, dɛ ɛ dɔɔhna.
Ya kondɔɔh bwa habɔɔ
baa wechɔɡa bɛlbwa
ya nɛɛ na.’
9Menee Korowii
haa dɛ tom mɛ
n lawɛ heyaa le
Ijipt harɛ ta la.
Mɛɛ berɔɔ ɡel he so tɛnte
deene bini ja,
kɛŋɔ ɡɛ saŋ he fa aa soɡe
a bini tɔpejena dii
maa lea cheɡ ta la.#Neh 8:14
10N bol waa keamere la be,
dɛ ɡel ba na wepila taeh,
dɛ che ba nɛɛ kpɔ sɛɡla
bol waa he be dɛ ja heya.
11Ane a bwa, Gelead tena dɛ
tomɛ voɡa.
Banɔ la baa dɛ tomɛ
voɡa la ɛɛ serewoo.
Ba dɛ kpoo nabala dɛɛ ɛ
saraha Gelɡal.
Kwaa baa dɛ ɛ sarahare
a ta la,
ɛɛ chɔɡoo kɛŋɔ bwea aa
dawɛ dɔŋa nɛɛ harɛ
baa parɔ ta.”
12Ya nabaa Jekɔb chwao
kaa Mɛsopoteemea harɛ ta.
Waa dɛ nyin haah dɛ́ mo la,
o kaa teɡɛ baa bɛl peera.#Mum 28:5
13Korowii cheɡɛ o keame
Mosis nɛɛ
dɛ lawɛ Israel tena
le Ijipt harɛ ta,
dɛ ɡel o nyiŋi ba nɛ.
14Kɛ Israel tena ɡelɔ o baah di
kohona,
Korowii baa dɛ tomɛ
ɛɛ ɡeloo ba wechɔɡa ɡure
ba nɛ,
dɛ́ bɔ ba kem waa
baa ɛa wa.
Currently Selected:
Hosia 12: mzw
Highlight
Copy
Compare
Share
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
