Mumpar 37

Josef ne o dɔɔranar wa

1Jekɔb soɡe Keenan harɛ ta, bela o mɛɛ fa aa soɡa la.

2Kenii o bii ne o naanar waa do, Jekɔb bie Josef aa di bene fi dɛ anuanɛ la, dɛ o ne o dɔɔranar dɛ nyiŋi kondɛɛra ta. O mɛɛ haahna banɛ baa dɛ yer ba Bilha ne Silpa la biirii ban. Josef yon ba taa dichɔɡa o dɔɔranar aa dɛ di o mɛɛ be.

3Dɛ Josef ɛ Jekɔb banjenbie, anomanta, dɛ o dɛ nyin o waa ɡwaa o bii la bwa. Asɛ o nyarɛ batakaarejaŋ ondɛɛɡe bɛl baa di ɡwini dawɛ o ta tɛo.

4O dɔɔranar aa baa na kɛŋɔ o mɛɛ dɛ nyin o waa dɛ ɡwaa ba la, ba haoh, baa on sie tɛ kwaraa.

5Awola jwaana bɛl Jekɔb deero dɛ taa baɡle o dɔɔranar. A taa ba haoh kohona kwara. 6O ŋɔ ba be ŋɔ, “Hé cheɡ deŋne dɛ́ no n deera nɔ. 7Ya dɛ vɔwɛ jaaɡe koo ta, asɛ bɛlbwa bil o kwaa dɛɛ korɛ. Belaa n kwaa maa vɔwa la ir che, asɛ he kwaa la ba bar n kwaa la cheme dɛɛ ɡuŋa.”#Mum 42:6; 50:18

8Asɛ o dɔɔranar la bɔɔro ŋɔ, “Amɔ he dɛ lii kɛ he dɛ ba bá di kora dɛ́ nyiŋi ya nɛɛ kɛɛ?” Belaa o haeh la berɛ ɡwaa kohona kwara.

9O berɔ dee anfala ja dɛ taa baɡle o dɔɔranar la ŋɔ, “Hé no, n deero asɛ wee ne korobie dɛ weweela fi dɛ beŋkpoŋ ɛɛ ɡuŋ mɛ.”

10Josef aa taa ɡɛ waa nɔ o mɛɛ ne o dɔɔranar be la, o mɛɛ kaoh dɛ ŋɔ, “Bɔkwa ɡe deeraa do ken? Amɔ n ne he nya ne he dɔɔranar ɛɛ bao dɛ́ ba ɡuŋi kɛɛ?” 11Ate, o dɔɔranar la bwaawee ir o nɛɛ kɛrɛdɛ, kɛ o mɛɛ te kpɔ waa la do o nyu bini.

Josef dɔɔranar yoɡu

12Awola bɛl, o dɔɔranar la kpɔ o mɛɛ kondɛɛra la kaa dibɔr Sɛkem pera, 13asɛ Jekɔb ŋɔ Josef be ŋɔ, “He dɔɔranar kpɔ kondɛɛra kaa dibɔr Sɛkem pera, n dɛ́ tomɛ ba be.”

Asɛ o chaŋe ŋɔ, “N mɛɛ, mɛɛ lao.”

14O mɛɛ ŋɔ o be ŋɔ, “La dɛ́ ka na he dɔɔranar ne ɡɛ kondɛɛra la aa doa, ásɛ dɛ ba bol n be.” O tomɔ le Hɛbrɔn Fɛlembɔjen bɔr pera dɛ kaa Sɛkem. 15Waa le Sɛkem dɛ kaa ɡaaɡe ba bɔr la, baa bɛl nao kɛŋɔ waa lɔ kpɔɡ bini bela dɛɛ ɡaaɡe. Asɛ dɛ bɔɔro ŋɔ, “Bɔkwaa hɛɛ nyin bonɔ nɔ?”

16Asɛ o chaŋo ŋɔ, “N dɔɔranar ne ba kondɛɛra bɔree mɛɛ ɡaaɡe. N poori, hɛɛ won chaɡ mɛ bela baa lole naa?”

17Baa la chaŋo ŋɔ, “Ba le bonɔ. N noɔ kɛŋɔ baa dɛ bol dɔŋa be ŋɔ ba kaa Dotan.” Anomanta, o ti o dɔɔranar la dɛ ka na ba Dotan bela.

18Waa dɛ tel bela la, o dɔɔranar la te tɔ sie nao kɛŋɔ o taa lɔ bojaŋ. O ne bela tela la, dɛ ba te vɔrɔwɔ tonɛ kɛŋɔ ba kpoo.

19Ba ŋɔ dɔŋa be ŋɔ, “Deera te laanee ka dɛ ba la. 20Hé ba ya kpoo, dɛ́ kpɔɔ ta kɔlɔŋ nɔ bɛl nee aa wola toole o bini nɔ bini, dɛ́ ka ŋɔ olchɔɡe bɛl lawɔ chwe, dɛ́ na ɡɛ o deera waa deera la aa dɛ ba chiɡa.”

21Rubin takapɔ kɛŋɔ o fee lɛo ta, dɛ ŋɔ, “He bɛ ɡel ya kpoo.”

22Dɛ berɛ ŋɔ, “He bɛ on kpo. Hé kpɔɔ ta kɔlɔŋ nɔ bɛl bini.” Gɛ aa ɛ o won lɛo le ba nɔn ta, dɛ́ kpɔɔ ka tɛ ba mɛɛ la waa o bol ɡɛ. 23Josef aa tel o dɔɔranar la be la, ba laa o batakaarejaŋ ondɛɛɡe baa di ɡwini dawɛ o ta la wur, 24dɛ kpɔɔ ka ta kɔlɔŋ la bini. Dɛ nee bɛlbwa toole o bini.

25Ba soɡo dɛɛ di kwa, belaa ba ha sie nyiŋi, dɛ na Ismael bonadiire ne ba nyoɡmare aa cheɡɛ konsɔɔhsoma baa dɛ fuah, ne dapɛɡa ane baa dɛ ɛ ane tɛɛɡa, ne korobo le Gelead harɛ baa kaa Ijipt harɛ.

26Anee Juda ŋɔ o bala la be ŋɔ, “Dɛ ya kpo ya nime nɔ dɛ tɔ a ta naa, bɔkwa tɔnɔɔ yaa ba dɔe yɔ? 27Hé ɡel ya yoɡu tɛ Ismael tena nɔ dɛ bɛ o haakɛ lɛ, o ɛ ya nime, ya bini bɛlee.” Asɛ ba sɛh ɡɛ waa bola la ta. 28Bonadiire la aa tel ba be la, o dɔɔranar la lawɔ le kɔlɔŋ la bini, dɛ yoɡu tɛɛ ba suuɡapoŋa fifraanɛ, asɛ ba kpɔɔ kaa Ijipt harɛ ta.

29Rubin aa bera la kɔlɔŋ la ta dɛ ka na kɛŋɔ o toole bela la, asɛ o laa o batakaare kɛɛ, a baɡle kɛŋɔ o loo kuu. 30O berɔ ba o bala la be dɛ ba ŋɔ, “N nime la toole bela! Ɛrɛɛ mɛɛ ba ɛɛ yɔ?”

31Anee ba kpo booh la bɛl, dɛ kpɔ Josef batakaare la mili o chal la, 32asɛ dɛ kpɔ ka chaɡle ba mɛɛ dɛ ŋɔ, “Batakaare nɔɔ ya na, nyiŋi na kɛŋɔ he bie la kon laanee kɛɛ?”

33Waa nyiŋa na la, o jemɔ asɛ dɛ chaŋe ŋɔ, “N bie batakaaree kpela! Olchɔɡe bɛl lawɔ chwe, o ka toɡri o bini.”

34Belaa Jekɔb loo ku o laa o batakaare kɛɛ, dɛ kpɔ lweyal tɔ dɛ ɛ o bie la lwe dɛ la sie. 35Asɛ o bii ne o lolanar bwa ba dɛ ba larawe o bwara. Kɛ o ta larawa la noɛ dɛ ŋɔ, “N wii nɔɔ dɛ́ kpɔ mɛ kaa n bie be lalabwɛ.” Anomanta, o wi o bie la kɛrɛdɛ.

36Ismael bonadiire la ɡe yoɡ Josef tɛ Ijipt te Pɔtefa. O ɛ Ijipt harɛ ta kooro laa tena baa dɛ daah o dem la bwa nomoa.

Currently Selected:

Mumpar 37: mzw

Highlight

Copy