Ɛsekeɛl 47

Nee waa pala le Korowii Dea la bɔr

1Baa la berɔ kpɔ men Ɛsekeɛl ba Korowii Dea doonyoa la ta, asɛ n na nee aa pala le doonyoa bela dɛɛ kaa wee leebɔr pera, bela Korowii Dea la sie aa chaɡa la. Dɛ nee la palɔ le Korowii Dea la lɔɡa weekaŋle harɛbɔr pera, dɛɛ kaa saraha kon la weekaŋle harɛbɔr.#Sek 14:8#Wep 22:1-2 2Baa la cheɡɛ weekaŋle nyunduabɔr doonyoa, dɛ kpɔ mɛ le ba dahara doonyoa o sie aa chaɡɛ wee leebɔr la ta, dɛ nee la palɔ le weekaŋle harɛbɔr pera baa kaa.

3Baa la kpoŋe ŋwɛn bɛl waa dɛ maɡɛ o ne kwa, dɛ kpɔ sie chaɡɛ wee leebɔr pera. O maɡɛ naɡale kaɡboŋ lafraanue dɛ kpɔ mɛ jo nee la ta o tel n nasoɡdor. 4O maɡɛ naɡale kaɡboŋ lafraanue ja, dɛ kpɔ mɛ jo nee la ta o tel n natuune ta. Dɛ maɡɛ naɡale kaɡboŋ lafraanue, dɛ kpɔ mɛ jo nee la ta o tel n chara ta. 5O berɔ maɡɛ naɡale kaɡboŋ lafraanue, anɔ te la, o kpɔ mɛ jo nee waa do kɛŋɔ moo maa wola won leo, dɛkalkɛ dɛ o suu kohona dɛ do luŋri nomɛlbwa aa wola won wao le o baŋ. 6O bɔɔ mɛ ŋɔ, “Nɛwɛnyini bie, he na waa nɔ kenɛ?”

Asɛ dɛ berɛ tɔ n sie dɛ kpɔ mɛ le ba moo la nyoa. 7Maa tel bela la, n na daa a warɛ kohona che moo la baŋ bɛlbwa ta. 8Baa la ŋɔ n be ŋɔ, “Gɛ moo nɔ palɔ kpɔ wee leebɔr harɛ ta dɛ wili jo Jɔɔdan Felembɔjen ta, dɛ ka jo Yar Mpo ta. O palɔ ka jo mpo la ta naa, mpo nee la dɛ́ do wer. 9Nee bini kwaa bwa soo siwi ɛɛ warɔɔ kohona, dɛ́ ba so nee la ta bela bwa waa pala dɛɛ kaa la. Pɛŋa ɛɛ warɔɔ do o ta, dɛkalkɛ nee la aa dɛ palɛ la ɡelɔ mpo nee aa ɛ yar la do wer. Bela waa pala dɛɛ kaa bwa, komɛlbwa won o bini soɡa. 10Nɛra baa dɛ ɛ pɛŋa toma ɛɛ ba che o nyoaa, dɛ́ le Ɛn Gedi dɛ́ nyenɛ ba asauri ba Ɛn Eɡlaim. Pɛŋa bwa soo siwii dɛɛ ba o ta doe kɛŋɔ Mɛdetereenea Mpo pɛŋa ken. 11Kɛ o nyoo aa do kɛ chɛɡbɔra la nee la te aa won do wer, aa chɔɔ bá dɔ yar dɛɛ le a ta. 12Daa aa dɛ nɔnɛ bwa soo siwi ɛɛ le nee la nyoa baŋ bɛlbwa taa. A papooni aa hola ba, aa nɔnaa ɡel. Korobie bɛlbwa taa aa ba nɔna, dɛkalkɛ nee le Korowii Dea bela palɛ dɛɛ ba bela. A nɔna la ɛɛ ɛ kondikwaa, ásɛ ba kpɔ a papooni ɡe dɛɛ chah weela.”

Harɛ la jwɛhre

13Nemenɛ Korowii ŋɔ, “Anɔɔ dɛ́ ɛ harɛ la haa dɛ ba bɔna tɛ Israel deene fi dɛ anɛ la, ne bɔre anɛ Josef dea bii aa dɛ ba dɔe la jwɛhre, ásɛ bɛlbwa dɔ o harɛ ó ɛ o kapɛrɛ kon. 14Bɔno kɛrɛdɛ bɛlbwa dɔ o kon, dɛkalkɛ n ir nɔn dɛ ŋwɛɛ kɛŋɔ he naawaa n kpɔ harɛ nɔ tɛ. Harɛ nɔɔ dɛ́ ɛ he kapɛrɛ kon.

15Kenii harɛ la jwɛh ɛɛ ba doe.

O weekaŋle nyunduabɔr jwɛh la, le Mɛdetereenea Mpo ta, dɛ́ kpɔ bwɛjen Hɛtlɔn ŋwɛnɛ ta, dɛ́ ɡale kaa bela baa cheɡa dɛɛ kaa bwɛjen Hamat, dɛ́ kaa Sedad, 16ne bwɛjena Bɛrɔta ne Sibraim aa lɔ bwɛjena Damaskɔs ne Hamat jwɛh ta, dɛ́ kpoŋe kaa bwɛjen Hasa Hatikon, o ɡe aa lɔ Hauran jwɛh ta. 17Jwɛh la ɛɛ le Mɛdetereenea Mpo taa dɛ́ kaa Hasar Enan, dɛ́ kpɔ weekaŋle nyunduabɔr jwɛh waa lɔ bwɛjen Damaskɔs, ásɛ jwɛh waa lɔ bwɛjen Hamat la do o weekaŋle nyunduabɔr. Onɔɔ dɛ ɛ weekaŋle nyundua jwɛh la.

18O wee leebɔr jwɛh la ɛɛ chɔɔ le Hauran ne bwɛjen Damaskɔs baah ta, dɛ́ kpɔ Jɔɔdan Moo nyoa, Gelead ne Israel harɛ baah ta, dɛ́ kpoŋe kaa Yar Mpo ta, dɛ́ kaa bwɛɛ bɛl baa dɛ yerɔ Taama. Onɔ ɡee wee leebɔr jwɛh la.

19Weekaŋle harɛbɔr jwɛh la ɛɛ le Taamaa, dɛ́ kpoŋe ka le neerare aa lɔ Mɛreba Kades, dɛ́ ka kpɔ fɛlembɔjen bɛl baa dɛ yerɔ Wadi waa lɔ Ijipt harɛ jwɛh, dɛ́ kaa Mɛdetereenea Mpo ta. Weekaŋle harɛbɔr jwɛh laanee la.

20O wee cholibɔr jwɛh la, Mɛdetereenea Mpo laanee dɛ́ ɛ jwɛh, dɛ́ kaa bobɛl o ne bela baa cheɡa dɛɛ kaa bwɛjen Hamat sie aa chaɡɛ dɔŋa. Wee cholibɔr jwɛh laanee la.

21A chɛ kɛ he bɔne harɛ nɔ tɛ dɔŋa Israel denaa ta. 22Hé bɔna á ɛ kapɛrɛ tɛ he ne nɛŋhɔɔhra baa soɡe he bini dɛ dɔ bii la. Hé kpɔ ba kɛŋɔ bwɛɛlembii baa lol ba Israel harɛ ta, he ne ba bwaa dɛ́ pɛ dɔ kapɛrɛ Israel harɛ deene bini. 23Dea bɛlbwa hɔɔhra aa ba so o ta la, belaa chɛ kɛŋɔ hé tɛo o kapɛrɛ. Men Nemenɛ Korowiirii bola.”

Currently Selected:

Ɛsekeɛl 47: mzw

Highlight

Copy

Compare