Ɛsekeɛl 37

Fɛlembɔjen hoɡa aa suu wa

1Korowii kpeɡri ba men Ɛsekeɛl nɛ, asɛ o Doma kpɔ mɛ le ka che fɛlembɔjen bɛl bini, dɛ hoɡa su o ta bwa. 2Doma la tɔ n sie la sie, dɛ ba n ne habɔɔ hoɡa la bini, asɛ n na hoɡa a warɛ chɔ fɛlembɔjen la bini, dɛ a bwara loɡao kɛrɛdɛ. 3O bɔɔ mɛ ŋɔ, “Nɛwɛnyini bie, hoɡa nɔ ɛɛ won berɛ ba ɛ nɛra dɛ́ dɔ mkpa ja aa?”

Belaa n chaŋe ŋɔ, “Nemenɛ Korowii, he ɡboo dɛ́ won jemɛ.”

4Anee Korowii ŋɔ n be ŋɔ, “Bol hoɡa la be, waa aa dɛ ba a nɛɛ bala. Ŋɔ á cheɡ deŋne dɛ́ no men Korowii wa. 5Men Nemenɛ Korowii, n dɛ bol hoɡa la be ŋɔ, ‘Mɛɛ tɛ heyaa hweeraa hé berɛ dɔ mkpa. 6Mɛɛ ɡeloo dɛɛhne ba he nɛ, dɛ́ tɛ heyaa bo-ol, dɛ́ kpɔ tɔn bɔle, dɛ́ tɛ heyaa hweera hé dɔ mkpa. Ásɛ he jemɛ kɛŋɔ menee Korowii.’ ”

7Anomanta, n bol waa aa dɛ ba a nɛɛ bala ɡɛ Korowii aa do mɛ la. N nyoa ta aa lɔ wobol la ta la, asɛ kerabeŋkpoŋ n no ɡbɔɡa ane kohona, asɛ hoɡa la pa mun baa choŋri dɔŋa nɛ. 8Maa dɛ nyiŋi la, n nao kɛŋɔ dɛɛhne ne bo-ol aa ba a ta, asɛ bɔtɔn bɔla, kɛ dɛ hweera toole a ta.

9Belaa Korowii ŋɔ n be ŋɔ, “Nɛwɛnyini bie, yerɛ peu dɛ́ bol waa aa dɛ ba bala, dɛ́ ŋɔ men Nemenɛ Korowii ŋɔ, ‘Peu, le bobɛlbwa dɛ́ ba jo nɛra baa kpoo ba bil nɔ bini, ásɛ ba dɔ hweera dɛ́ dɔ mkpa.’ ” 10Anomanta, n bol waa la ɡɛ Korowii aa do mɛ la, asɛ hweera ba ba bini ba won hweera, dɛ dɔ mkpa dɛ ir che. Ba warɔ kɛrɛdɛ kɛŋɔ laa tena.#Jɔn 5:21

11Ate, Korowii ŋɔ n be ŋɔ, “Nɛwɛnyini bie, Israel tena bwa do kɛ hoɡa nɔ. Ba dɛ bol ŋɔ ya hoɡa bwa loɡao, ya ta hwɛɡa bɛlbwa dɔe, ya toole wobɛlbwa bini. 12Anomanta, bol waa aa dɛ ba ba nɛɛ bala dɛ́ ŋɔ, men Nemenɛ Korowii ŋɔ, ‘N nɛra Israel tena, n dɛ ba he ŋwama pila, dɛ́ lawɛ heyaa le, dɛ́ berɛ ba he ne Israel harɛ ta. 13N nɛra, maa ba pili he ŋwama dɛ́ lawɛ heyaa le a bini la, a taa hɛɛ ba jema kɛŋɔ menee Korowii. 14Mɛɛ kpɔ n Domaa ba so he nɛɛ hé dɔ mkpa, ásɛ n kpɔ heyaa kaa he ɡbaɡba harɛ ta ka so. Ásɛ he jemɛ kɛŋɔ men Korowii, waa maa bola la, n ɛa. Men Korowiirii bola.’ ”

Juda ne Israel harɛre bwa ɛ beŋkpoŋ

15Korowii bol waa men Ɛsekeɛl be ŋɔ, 16“Nɛwɛnyini bie, kpɔ da ásɛ dɛ chwerɛ o ta ŋɔ, ‘Kon nɔ ɛ Juda ne Israel tena baa ja o nɛɛ la kon.’ Berɛ kpɔ danɛɛte dɛ́ chwerɛ o ta ŋɔ, ‘Kon nɔ ɛ Efrem kon, dɛ che tɛ Josef ne Israel tena baa ja o nɛɛ la kon.’ 17Kpɔa pɛ á do kɛ daa beŋkpoŋii lɔ he nɔn ta.

18He bwɛɛ tena bɔɔre ŋɔ he baɡ ba ɡɛ waa nɔ mun aa, 19he ŋɔ men Nemenɛ Korowii ŋɔ, ‘Mɛɛ kpɔ daa waa ɛ Josef kon dɛ do Efrem nɔn ta dɛ ɛ Israel deene baa ja o nɛɛ laanee, dɛ́ kpɔ pɛ daa waa ɛ Juda kon la ta, á do n nɔn ta dɛ́ ɛ daa beŋkpoŋ.’ 20Kpɔ daa haa chwerɛ a ta la kpoŋe ba siwi ta, 21dɛ́ ŋɔ men Nemenɛ Korowii ŋɔ, ‘Mɛɛ lawɛ n nɛra Israel tenaa le harɛre baa chwaa ka so a ta laanee. Mɛɛ boa ba nyoa le bela bwa baa lole, dɛ́ berɛ ba ba ne ba ɡbabir harɛ ta. 22Mɛɛ lɔ baa pɛ bá ɛ harɛ beŋkpoŋ nɛra, dɛ́ so Israel bwejena dor. Kooro beŋkpoŋ ɛɛ nyiŋi ba nɛ, ásɛ ba bini aa pere dɛ́ ɛ harɛ anɛ nɛra kpa. 23Baa voɡaa tomɛ, dɛɛ ɛ waa maa kia dɛ kah doŋa, kɛɛ dɛ ɛ wechɔɡa bɛlbwa kpa, dɛkalkɛ mɛɛ lɛɛ baa le wechɔɡa bwa aa ɡela ba le habɔɔ la taa, dɛ́ laa doŋa bɛlbwa kpɔ ba nɛ. Mɛɛ kpɔ baa ɛ n nɛra, n ɡe ɛ Korowii baa dɛɛ tom mɛ.

24Kooro waa do kɛ n bonɔɔ Kooro Devid la, onee dɛ́ ɛ ba kooro, dɛ́ do kɛ peteɡre beŋkpoŋ dɛɛ nyiŋi ba nɛ. Baa teŋɛ me Mmarare ne waa maa kpɔa tɛɛ ba taa kasinteŋ ne. 25Harɛ maa kpɔa tɛ n bonɔɔ Jekɔb la taa baa ba soɡa, harɛ ba naawa fa aa soɡe o ta la. Ba ne ba bii ne naanar, dɛ ba ɡe bii ɛɛ so o taa saŋ bɛlbwa dɛɛ la, ásɛ kooro waa do kɛ n bonɔɔ Kooro Devid ɛ ba kooro saŋ bɛlbwa dɛɛ la. 26N ne baa fɔwɛ deŋnesɔɔhna fɔwee o do le saŋ bɛlbwa dɛɛ la. Mɛɛ ɡeloo ba do kpeɡri ba mun ya kohona, ásɛ n kpɔ n Dea la ba cheɡ ba harɛ ta saŋ bɛlbwa dɛɛ la. 27Ba baahnee mɛɛ ba soɡa, dɛ́ ɛ Korowii baa dɛ tom mɛ, ásɛ ba ɡe ɛ n nɛra.#Lew 26:11 28N kpɔ n Dea la ba cheɡ ba harɛ la ta saŋ bɛlbwa dɛɛ la naa, anee dɛ́ ɡel harɛre nɛra jemɛ kɛŋɔ menee le Israel tena tɛ n te.’ ”

Currently Selected:

Ɛsekeɛl 37: mzw

Highlight

Copy

Compare