Ɛsekeɛl 35

Korowii Bol Edom tena chɔɡa wa

1Korowii bol waa men Ɛsekeɛl be ŋɔ, 2“Nɛwɛnyini bie, eɡle sie ta Edom harɛ ta tena nɛ, dɛ́ bol waa aa dɛ ba ba nɛɛ bala. 3Men Nemenɛ Korowii ŋɔ, ‘Edom bwejena, n ne he dɔɔ. Mɛɛ tɛr nɔnee pa he nɛɛ dɛ́ chɔɡ harɛ la, o ta do ɔma dɛ́ chɔ pɛɛ. 4Mɛɛ chɔɡ he bwɛjena bwaa a berɛ dimɡbia dɛ́ chɔ pɛɛ. Belaa hɛɛ ba jema kɛŋɔ menee Korowii.

5Edom tena, he fa ɛ Israel tena dɔm, dɛ ɡel ba dɔma kpoo ba ba wenaale tɔpere, ba wechɔɡa baa ɛa deŋnetɛraa. 6Anomanta, men Nemenɛ Korowii, n ŋwɛɛrɔ kɛŋɔ n taa lole nɔ, haa dɛ kpoo nɛra nɔ, he ɡe ɛɛ sewɔɔ, haa won le a nyoa. 7Mɛɛ ɡeloo Edom harɛ deŋɡare chɔ pɛɛ, dɛ́ kpoo nɛra baa dɛ kpɔ o ta bwa. 8Mɛɛ ɡeloo lala su bwejena dor bwa, ásɛ banɔ la baa kpoo ba laa ta chɔɔɡe deŋɡarere ta, dɛ́ su nenabɔɔne bwa bini. 9Mɛɛ chɔɡ harɛ laanee kwaraa, ásɛ nɛra aa won berɛ ba so o ta kpa. Anee hɛɛ ba jema kɛŋɔ menee Korowii.

10Menee Juda ne Israel harɛre nɛra ɛɛ tomɛ, kɛ he Edom tena ŋɔ hɛɛ ka kpɔ harɛ laanee ɛ he kon. 11Anomanta, men Nemenɛ Korowii, n ŋwɛɛrɔ kɛŋɔ n taa lole nɔ, mɛɛ bɔ heyaa kemee he bandia ne meera, dɛ haeh haa hah n nɛra la wa. Ásɛ ba jemɛ kɛŋɔ menee dɛɛ tɛr he deŋne waa haa ɛɛ ba la wa. 12Anee hɛɛ ba jema kɛŋɔ men Korowii, n no nɛnhɛlwobol haa bola Israel bwejena waa ŋɔ a bwa chɔ pɛɛ ba kpɔ tɛ heyaa a ɛ he kwa. 13N no mbarafo waa haa bola yaɡ mɛ aa wola nyoa dɔe.’ ”

14Nemenɛ Korowii ŋɔ, “Mɛɛ chɔɡ he ne he harɛ Edomee ó chɔ pɛɛ, ásɛ harɛ nɔ ta nɛra bwa sie lɛ. 15Edom tena, he sie aa lɛa ɡɛ saŋ Israel tena harɛ aa chɔ pɛɛ la, ɡɛ tentenee mɛɛ ba kpɔe ɛ heya, Sɛɛ Bwejen ne Edom harɛ bwa. Asɛ nomɛlbwa jemɛ kɛŋɔ menee Korowii.”

Currently Selected:

Ɛsekeɛl 35: mzw

Highlight

Copy

Compare