Ɛsekeɛl 34

Peteɡra ne peera wa

1Korowii bol waa men Ɛsekeɛl be ŋɔ, 2“Nɛwɛnyini bie, bol waa aa dɛ ba Israel nomonome baa do kɛŋɔ peteɡra nɛɛ bala, dɛ́ ŋɔ men Nemenɛ Korowii ŋɔ, ‘Hé bwɛɛlɛ! He ɛ peteɡra haa wola he peera nɛɛ nyiŋi, he ɡbo waa hiah heya. Hé laa chɛ kɛŋɔ hɛ́ɛ nyiŋi a nɛ aa? 3He dɛ nyɔ a elne, dɛ kpɔ a pona ɛ yale dɛɛ tɔ, dɛ kpoo anɔ la aa wera dɛɛ di. Kɛ haa a nɛɛ nyiŋi. 4He ta anɔ la aa ɡwɛɡra nɛɛ nyiŋe, he ta a weela tena chaeh, kɛɛ dɛ jaɡre anɔ la baa doa bola ŋwɛra. He ta anɔ la aa yeŋa ne anɔ la aa nyoɡra ɡe bɔr nyine, dɛ ba a ne. Nyubinikpeɡ nee he nyiŋa. 5Haa wola a nɛɛ nyiŋi kɛrɛdɛ nomanta, a bwa lɔɔ peɡre, asɛ kpɔɡ bini olchɔɡa ba kpoora, dɛ di a ola. 6Anomanta, n peera yeŋo ka do bwejena dor ne deŋɡarere ta. A peɡrɔ kaa harɛ nɔ ta bobɛlbwa, nomɛlbwa ta a waa liire dɛ ɡaaɡe a bɔr.

7Anomanta, he nɛra haa do kɛŋɔ peteɡra, hɛ́ɛ no waa men Korowii aa dɛ bol he be. 8Men Nemenɛ Korowii taa lole nɔ, n ŋwɛɛrɔ kɛŋɔ, n peera nya teɡre, a che a ta kpɔɡ bini olchɔɡa lawa dɛɛ di. N peteɡra la ta a bɔr ɡaaɡɛ, ba ɡbaɡba waa hiah ba. 9Anomanta, peteɡra, he no waa maa dɛ bol he be. 10Anomanta, men Nemenɛ Korowii, n ne he dɔɔ. Mɛɛ tɛr he deŋnee dɛ́ lɛa le he be, haa a teɡraa ɛ kpa. Mɛɛ lɛa le he be, maa ɡel he di a ta kpa.

11Men Nemenɛ Korowii ɡbaɡba ɛɛ nyin n peera bɔree, ásɛ dɛ nyiŋi a nɛ.#Jɔn 10:11#Luk 19:10 12Gɛ peteɡre la peera ne dibɔr, dɛ ane peɡrɔ o yon ɡaaɡe dɛɛ nyin a bɔr la, ɡɛɛ Israel tena fa peɡre kaa harɛre bwa ta awola tɔpechɔɡe bɛl wee. Mɛɛ ɡaaɡe ba bɔree name, dɛ́ berɛ ba ba ne. 13Mɛɛ lawaa le harɛre aa kaa a ta la taa, dɛ́ boa a nyoa. Mɛɛ le a ne harɛfala taa dɛ́ kpɔa ba a ɡbaɡba harɛ ta. Israel bwejena dor ne neerare nyoo aa sɔnaa dɛɛ ba a dibɔra ɛɛ. 14Mɛɛ teɡaa kaa dibɔra aa wera taa á ka di. Israel harɛ bwejena doree mɛɛ ba a dɛɛra, á dɔ kpɔɡdɛɛɡa di a bwara sɔɔhna. 15N ɡbabirii dɛ́ teɡɛ n peera dɛ nyin bodɛɛɡe tɛa a chɔ. Men Nemenɛ Korowiirii bola.#Yel 23:1 16Mɛɛ ɡaaɡo nyin anɔ la aa nyoɡra bɔr, dɛ́ berɛ ba anɔ la aa yeŋa la ɡe ne. Mɛɛ vɔrɔwe anɔ la a bobɛla aa kuuɡaa, dɛ́ chah anɔ la a bwara aa dɛ wea, ásɛ a dɔ bokpeɡa. Kɛ anɔ la aa dɔ bokpeɡa a bwara do wer la te, mɛɛ kpooraa, dɛkalkɛ n ɛ peteɡre n wa aa toɡra.’ ”

17Nemenɛ Korowii ŋɔ, “N peera, mɛɛ nyiŋi he binii dɛ́ pere pedɛɛɡa le anchɔɡa bini, dɛ́ pere pebala le boohna bini. 18Kpɔɡdɛɛɡa haa dɛ chwea la aa heyaa tel aa? A chɛ kɛ he tiɡri a kar do harɛ naa? Nedɛɛɡa haa dɛ nyoa la aa he ne maɡre aa? A chɛ kɛ he porɛ a kar aa? 19N dɔ peera ane ɡe a do le. A chɛ kɛ a chwe kpɔɡa haa tiɡra do harɛ, dɛ́ nyɔ nee haa porɔ o bwa chɔɡ nɔ naa?

20Anomanta, men Nemenɛ Korowii ɡbaɡba ɛɛ bol n peera aa ɡwaŋra ne anɔ la a bwara aa wera la waa. 21He taɡɛ n peera aa ɡwɛɡra la vaama ne, dɛ chuɡra nyeɡlare ne ka ta, 22anomanta, mɛɛ lɛ n peera nyuu, ásɛ ba bɛ won ɛa hɔhɔrɔwa kpa. Mɛɛ bol n peera la bɛlbwa ne o dɔŋ baah waa. 23Kooro waa do kɛ n bonɔɔ Kooro Devidii mɛɛ ba lee kɛŋɔ peteɡre beŋkpoŋ wɛɛ nyiŋi ba nɛ. 24Men Korowiirii dɛ́ ɛ Korowii baa tom mɛ, ásɛ kooro waa do kɛ n bonɔɔ Kooro Devid ɛ ba kooro. Men Korowiirii bola.

25N ne baa fɔwɛ deŋnesɔɔhna fɔwee, dɛ́ le kpɔɡ bini olchɔɡa ne harɛ la ta, ásɛ n peera la do pua kpɔɡbaah ta, dɛ́ chɔ kɔne bini deŋnesɔɔhna ta.#Aes 54:10 26Mɛɛ swee ba ne harɛre aa chɔa bar n bwejen waa do ɡoroŋ dɛ do Jerusalam la andɛɛɡaa. Mɛɛ ɡeloo bwaala nɛ o saŋ ta, á ɛ bwaala dɛɛɡa. 27Harɛ la ta daa bɛlbwa ɛɛ nɔnɔɔ kɛrɛdɛ, ásɛ koo kondikwaa ɛ kohona, nomɛlbwa so deŋnesɔɔhna ta o harɛ ta. N baa lawɛ n nɛra le nɛra baa dɛ fiɡ ba kɛ yoma nɔn ta naa, anee baa ba jema kɛŋɔ menee Korowii. 28Harɛre ane nɛra baa wola Korowii tomɛ aa won ba yoo ba, dɛ́ pa ba laala kaa kpa. Gɛɛ kpɔɡ bini olchɔɡa ɡe aa wola won ba laɡ ba chwe. Nomɛlbwa aa won ba aah ba kpa, ásɛ ba so deŋnesɔɔhna ta. 29Mɛɛ tɛɛ ba harɛpare ondɛɛɡee ba kondikwa won ɛ, dɛ́ ɡel lɔr ba a jaɡa harɛ la ta. Harɛre ane nɛra aa ban mamɛ kpa. 30Nomɛlbwa ɛɛ jemɔɔ kɛŋɔ menee kpɔ nɔn dɛɛ tɔ Israel tena nɛɛ ba ɛ n nɛra. 31Hé ɛ n peera, mɛɛ dɛɛ heya. Hé ɛ n nɛra, n ɛ Korowii haa dɛ tom mɛ. Men Nemenɛ Korowiirii bola.”#Yel 100:3

Currently Selected:

Ɛsekeɛl 34: mzw

Highlight

Copy

Compare