Ɛsekeɛl 3

1Korowii ŋɔ n be ŋɔ, “Nɛwɛnyini bie, di kon waa lɔ he sie nɔ, di tɔn nɔ, ásɛ dɛ ka bol waa baɡle Israel tena.”#Jer 15:16#Wep 10:8-11 2Ate, n hah nyoa, asɛ o kpɔ tɔn la tɛ mɛ ŋɔ n di.

3O ŋɔ n be ŋɔ, “Nɛwɛnyini bie, lɛ tɔn nɔ di dɛ vaɡɛ.” Asɛ n lɛ dɛ kpɔ di, o do som kɛŋɔ tooh ken.

4Ate, o berɔ ŋɔ n be ŋɔ, “Nɛwɛnyini bie, name la Israel tena be ka bol n waa maa kpɔa tɛɛ la baɡ ba. 5Nɛra ba wobol aa kpeɡa, a mun noe ɡe do kpeɡri be laa mɛɛ tomɛ, Israel tena bee mɛɛ tomɛ. 6Ba ta harɛ o nɛra wobol aa kpeɡa, ba waa mun noe do kpeɡri ɡe ɛɛ. Dɛ n fe tomɛ ɡɛ nɛra la be naa, ba fe noɔ. 7Kɛ n nɛra Israel tena ɛɛ vɛh he be noe, dɛkalkɛ baa n waa nyin dɛ no, ba vɛh n wa, ba bambile kpeɡri, ba deŋne ɡe do kpeɡri. 8Mɛɛ ɡeloo hen Ɛsekeɛl bambile do kpeɡri, ásɛ he bɛ he te kpɔ tɛɛ ba. 9Mɛɛ ɡeloo he do kpeɡri kɛ bwe ken, dɛ́ do kpeɡri ɡwaa bwe waa kpeɡa te bɛlbwa, bɛ ban ɔmɛ. A lole kɛŋɔ ba ɛ deŋnekpeɡ tena.”

10Korowii berɔ ŋɔ n be ŋɔ, “Nɛwɛnyini bie, cheɡ deŋne dɛ́ no waa maa dɛ bol he be nɔ kɛrɛdɛ. 11La he bwɛɛ tena baa lawɛ he ne ban ba Babelɔn bonɔ la be ka ŋɔ, ba vɛoh woo ba ta vɛɛh yoo, ŋɔ ba be. Kenii men Nemenɛ Korowii ɛɛ bol.”

12Belaa Korowii Doma la ɡɔɔ mɛ ir che, asɛ n no takpeɡ bɛl n habɔɔ kɛŋɔ bwaala aa kɔra ken ŋɔ, “Hé kpɛɛ jirima Korowii aa dɔa o soŋnibɔr.” 13N no hweera kwaa la kena aa dɛ seeɡe dɔŋa ne saaker nakpale la aa dɛ si kohona kɛŋɔ harɛ aa dɛ jiɡri ken. 14Korowii Doma la baa so n nɛɛ kpeɡri nɛ, dɛ kpɔ mɛ kaa, asɛ n sie beɡre n baah di n bambile bini. 15N ba n bala baa laɡ ba ba Babelɔn harɛ bobɛl baa dɛ yerɔ Tɛl Abib la be, o bɛne Keba Moo la. N soɡe ba be tɔpera anuanɛ, asɛ n bwara yɔr waa maa naa la wa.#Yel 137:1

Korowii kaeh waa kah Israel tena

16Tɔpera anuanɛ la jaɡa, Korowii bol waa n be ja ŋɔ, 17“Nɛwɛnyini bie, n kpɔe kɛ hɛɛ daah n nɛra Israel tena. Anomanta, cheɡ deŋne kɛrɛdɛ dɛ́ no n waa nɔ dɛ́ kah ba tɛ mɛ. 18Dɛ n ŋɔ wechɔɡ-ɛɛ be ŋɔ wɛɛ sewɛ o wechɔɡa taa, dɛ he ta on kaeh, o ɡel o wechɔɡa la dɛ dɔ o nyu aa, wɛɛ sewɛ o wechɔɡa taa. Ate, mɛɛ pɛɛre a waa. 19Kɛ dɛ he kah wechɔɡ-ɛɛ la o ta o wechɔɡa ŋwɛnɛre la ta leɛ yaa, wɛɛ sewɛ o wechɔɡa taa. Ate, hɛɛ dɔ he nyuu.

20Dɛ nɛn o wa aa toɡra la le o wetoɡra ta dɛ ɛ wechɔɡa aa, mɛɛ kpɔ kon waa dɛ ba ɡela o lɔ naa bil o sie. Haa wola on kaeh nomanta, wɛɛ sewɛ o wechɔɡa taa. Maa waa waa ɛa a toɡre laanee lii, mɛɛ pɛɛre o seo waa. 21Kɛ dɛ he kah nɛn o wa aa toɡra o no, o ta wechɔɡa ɛɛ yaa, wɛɛ dɔ o nyuu, ásɛ he ɡe dɔ he nyu.”

22Korowii kpeɡri ba n nɛɛ bela dɛ ŋɔ n be ŋɔ, “Ir kaa deŋɡarere dor harɛ waa chɔa kaa la ta, ásɛ n bol waa he be.” 23Ate, n ir dɛ kaa bela. N na Korowii jirima bela ɡɛ n fa aa nao Keba Moo nyoa la, asɛ n kpɔ sie pi harɛ.

24Korowii Doma la baa so n nɛɛ dɛ laɡ mɛ ir che, dɛ bol waa n be ŋɔ, “Kaa he dem dɛ́ ka laa ɡbera tɔ he nɛ. 25Nɛwɛnyini bie, baa vɔrɔwe ŋwɛɛra nee he chɔ haa wola won la nɛra baah ta. 26Mɛɛ berɛ he nyondoŋee he bol waa kahonɛ, haa won bol waa dɛ́ kah deŋnekpeɡ tena nɔ kpa. 27Dɛ n berɔ dɛɛ ba ba bol waa he be ja aa, mɛɛ ɡeloo he won bol wa, dɛ́ bol ba be ŋɔ kenii men Nemenɛ Korowii ɛɛ bol, ‘Bɛlbwa waa no la ɛɛ noo, bɛlbwa waa wola no la ɡe aa no, dɛkalkɛ deŋnekpeɡ tenaa wubwa.’ ”

Currently Selected:

Ɛsekeɛl 3: mzw

Highlight

Copy

Compare