Kaala 35

Ona Tɔpere Mmarare wa

1Belaa Mosis yerɛ Israel tena bwa cheme dɛ ŋɔ, “Waa Korowii aa do heyaa ŋɔ hɛɛ ɛ laanee nɔ, 2Tɔpera anumɛlee he dɔ kɛŋɔ hé kpɔ ɛ toma, kɛ tɔpenuanɛ wee la chɛ kɛŋɔ ó do ɡoroŋ tɛ heya, hé onɛ o ta. O ɛ Ona Tɔpere dɛ tɛ Korowii. Nomɛlbwa waa ɛ toma o ta la chɛ kɛŋɔ bá kpoo. 3He bɛ nii mar bobɛlbwa haa soɡa Ona Tɔpere ta.”

Saraha kwaa baa kpɔ ba Korowii Tɛnte Dea

4Mosis berɔ ŋɔ Israel tena la bwa be ŋɔ, “Kenii Korowii do heyaa ŋɔ hɛɛ ɛ, 5Komɛlbwa haa dɔa la, hé kpɔ a bini ane ba ɛ saraha tɛ Korowii. Gɛ aa le bɛlbwa bambile bini la ó kpɔ ba tɛ Korowii. Koŋkwaa kɛŋɔ suuɡaswɛm ne suuɡapoŋ dɛ ayaawa, 6ne jiseburum ne jisekɔl ne jiseswɛm ne yadɛɛɡe ompoŋ dɛ booh pona, 7ne pebal tɔne baa doa konswɛɛma ne mpo nae tɔne dɛ akaasia daa, 8ne ɔleve noo baa kpɔ do kandea ta, ne konsɔɔhsoma baa kpɔ koo noo ta, dɛ kpɔ dɛɛ do nɛn sɔfore ta, dɛ anɔ la baa kpɔ koo daawiile ta dɛ́ fuah, 9ne bwedɛɛɡa ane baa dɛ yera onis, ne anɔ la baa kpɔ dawɛ Sɔfonomoa batakaarebora efɔd, dɛ kon waa dawɛ o bambile ta la ta.

10Nomɛlbwa waa dɔ kwaa kwaara wejema he bini la le ba, ásɛ dɛ ba ɛ kwaa Korowii aa do yaa ŋɔ yá ba ɛa nɔ. 11Anee kɛŋɔ Korowii Tɛnte Dea, ne bela waa do ɡoroŋ, ne yale baa kpɔ bɔlo, ne kwaa baa doa tora a sie chaɡɛ dɔŋa, ne daa ne doli bwa soo siwi, dɛ dachiɡri ne a loɡa, 12Korowii Ne Nɛwɛnyina Fɔo Daka ne o tɔ, ne daa baa kpɔ cheo, dɛ pateesan waa saɡɛ dɛɛ tɔ o ta, 13ne teebur la ne o konjeɡre, ne daa baa kpɔ ɡɔɔro dɛ paanoo baa kpɔa baa bil Korowii sie, 14ne kandea daa waa dɛɛ chaah ne o koŋkwaa, ne kandere dɛ noo baa kpɔ do a bini aa chaah bela, 15ne kon baa ba dɛ fuh daawiile o ta, ne daa baa kpɔ dɛɛ cheo, ne noo baa kpɔa dɛɛ do nɛn sɔfore ta, ne daawiile a sɔɔh aa soma kohona, dɛ pateesan wáa saɡɛ Korowii Tɛnte Dea doonyoa, 16ne kon baa dɛ fuh saraha kwaa o ta ne ayaawa kafola, ne o dajaŋa baa kpɔ dɛɛ cheo ne loɡa aa jaa bwa, ne ayaawa loɡbajen dɛ kon waa dɛɛ chɔŋɛ o ta, 17ne pateesanre aa tɔa dɛ bar Korowii Tɛnte Dea la dembaah, ne o dachiɡri ne a loɡa dɛ pateesan waa do dembaah la doonyoa. 18Kwaa baa kpɔa baŋre Korowii Tɛnte Dea la ne o dembaah ne a ŋwɛɛra, 19ne sɔfore laala baa sɔah dɛ doa dɛɛ ɛ toma Korowii Dea bela, ne Arɔn waa ɛ Sɔfonomoa la laala aa do ɡoroŋ, dɛ o bii la ɡe laala baa doa dɛɛ ɛ toma kɛ sɔfore.”

Saraha kwaa baa kpɔa baa tɛ Korowii

20Asɛ Israel tena bwa le Mosis sie bela kaa, 21asɛ bɛlbwa aa le o bambile ta kɛŋɔ ó kpɔ kwaa ba tɛ Korowii, bá kpɔ kwaa o Dea Cheremibɔr la kpɔ ba, ásɛ ba kpɔ ɛ kwaa baa kpɔ tomɛ Korowii bela, ne laala aa do ɡoroŋ la bwa. 22Baala ne haahna bwa le ba bambile ta kpɔ suuɡaswɛm kwaa kɛŋɔ deŋna kwa, noniseɡa ne jɔɡrɔre bwa soo siwi ba. Ba bwa ɡɔɔra nyundua dɛ viiɡa men Korowii sie. 23Asɛ nomɛlbwa waa dɔ jiseburum, Jisekɔl kɛɛ jiseswɛm kɛɛ yapondɛɛɡe kɛɛ booh pona, pebal tɔne baa doa konswɛm kɛɛ mpo nae tɔne ba a ne. 24Banɔ la baa dɔ suuɡapoŋa kɛɛ ayaawa la kpɔa ba tɛ Korowii kɛŋɔ saraha kwa, asɛ bɛlbwa ɡe waa dɔ akaasia daa ba a ne ba kpɔ ɛ toma la. 25Haahna baa dɔ yabi tae wejema bwa tao dɛ ba jisere bwa soo siwi kɛŋɔ burumre ne aŋkɔla ne answɛɛma dɛ ampoŋa andɛɛɡa ne. 26Haahna la bwa ɡe baa jemɛ booh pona ne jise ɛɛ la ba a ne. 27Ba nomonome kpɔ bwedɛɛɡa ane baa dɛ yera onis dɛ bwedɛɛɡa ane soo siwi ɡe baa kpɔ dawɛ Sɔfonomoa batakaarebora efɔd, ne kon waa dawɛ o bambile ta ba, 28ne konsɔɔhsoma ne noo baa kpɔ do kandea la ta, dɛ noo baa kpɔ do nɛn sɔfore ta, dɛ kpɔ koo daawiile baa fuah ta ba a ne. 29Israel tena haahna ne baala bwaa le ba bambile ta dɛ kpɔ saraha kwaa ba cha Korowii toma ɡɛ waa cheɡɛ Mosis nɛɛ dɛ bol ba be la.

Besalɛl ne Oholiab wa

30Asɛ Mosis ŋɔ Israel tena be ŋɔ, “He na, Korowii le Uri bibaa Besalɛl, o nabaa aa ɛ Hur le Juda dea,#Kaa 31:1-11 31asɛ dɛ kpɔ o Doma ne o wejema waa kpɔa dɛɛ sɛh kwaa ne kwaa bwa soo siwi sɔeh tɛo, 32wejema waa won kpɔ suuɡaswɛm ne suuɡapoŋa dɛ ayaawa ɛ kwaa á do wer, 33dɛ sɛh bwea dɛ cheɡa suuɡaswɛm ta, dɛ kpɔ daa sɛh koŋkwaa dɛ ɛ anɔ la aa do ken bwa soo siwi. 34O berɔ tɛ o ne Ahisamak bibaa Oholiab waa le Dan dea wejema baa kpɔ dɛɛ hweli nɛra kwa. 35O tɛɛ ba wejema ba won kwaa bwa soo siwi ɛɛ ne banɔ la baa dɔ kwaa kwaara a do wer dɛ di ɡwini dawɛ a ta wejema, ne banɔ la baa won jiseburum ne jisekɔl ne jiseswɛm dɛ jisepondɛɛɡe kpɔe dɛ́ sɔh dawɛ yal ta. Ba bwa ɛ nɛra baa dɔ waa nɔ wejema kɛrɛdɛ dɛ dɔ liire baa won baɡle nɛra bá kpɔ ɛ kwaa á do wer.”

Currently Selected:

Kaala 35: mzw

Highlight

Copy