Daneɛl 2

Kooro Nebukadnesa deera

1Kooro Nebukadnesa aa di kora bennɛɛte ta la, awola bɛl o deero, asɛ o liire chɔɡ o ta wone chɔ. 2Anomanta, o ɡelɔ ba ka yerɛ dobodobo tena, ne nɛra baa dɛ ɛ sɔmwe-ɛɛla, ne voɡra dɛ wejerema baa jemɛ weweela waa ŋɔ bá ba baɡlo deera la mun. Baa ba o be la, 3o ŋɔ ba be ŋɔ, “N liire chɔɡ n deera ane maa deera wa, asɛ mɛɛ nyin a mun dɛ́ jemɛ.”

4Asɛ ba kpɔ Aram tena wobol chaŋe ŋɔ, “N naa kooro, Kórowii tɛɛ mkpajaŋ saŋ bɛlbwa! Bol he deera la baɡle he bonɔɔna, ásɛ ya baɡle a mun.”

5Anee Kooro Nebukadnesa ŋɔ wejerema baa jemɛ weweela waa la be ŋɔ, “Waa maa liira laanee kɛŋɔ, dɛ he ta wone na n deera nɔ dɛ baɡ mɛ a mun aa, mɛɛ ɡeloo bá chɛwɛ he ola, dɛ́ kuuɡi he deremi a berɛ dimɡbeeni. 6Kɛ dɛ he wono baɡ mɛ deera la ne a mun aa, mɛɛ kɛ heyaa kwaa a su he siwi, dɛ́ tɛ heyaa sɔn ɡe taeh. Anomanta, hé baɡ mɛ deera la ne a mun.”

7Ate, ba berɛ chaŋe ŋɔ, “N naa kooro, baɡle yaa deera la, ásɛ ya ɡe baɡle a mun.”

8Anee kooro la ŋɔ, “N nao kɛŋɔ he dɛ́ nyin ŋwɛnɛ dɛ́ lɔ n waa maa bola la ta, dɛkalkɛ he ɡbabir na ɡɛ maa cheɡa dɛ ɛ n liire, 9dɛ he ta deera la bolɛ baɡ mɛ naa, deŋnetɛraa dɛ́ chɔ le tɛ heya. He vɔrɔwɔ kɛŋɔ he dɛ ba n be dɛ́ ba teŋe nyosone, dɛ́ neɡre mɛ, ásɛ n charɛ n liire. Hé baɡ mɛ deera la, ásɛ n jemɛ kɛŋɔ hɛɛ won baɡ mɛ a mun.”

10Asɛ wejerema baa jemɛ weweela waa la chaŋe kooro ŋɔ, “N naa kooro, nomɛlbwa toole harɛ nɔ ta, dɛ́ won ɛ waa hen kooro aa bola nɔ. Kooro bɛlbwa waa lɛ sɔn kɛɛ dɛ dɔ kpeɡri ta ɡɛ waa nɔ bɔɔrɛ le dobodobo te, kɛɛ nɛn waa dɛ ɛ sɔmwe-ɛɛla, kɛɛ wejereme be bwa. 11Waa kooro aa dɛ bɔɔ la kpeɡri kohona to. Nomɛlbwa toole dɛ́ won pili a bini tɛ kooro nemenɛ voɡa, a ɡɛ voɡa la ɡe toole harɛ nɔ ta.”

12A ɡelɔ kooro la baah di kohona, asɛ o ŋɔ ba kpoo wejerema baa lɔ Babelɔn harɛ ta bwa. 13Anomanta, ba ɛ mmara kɛŋɔ bá kpoo wejerema la, asɛ ba tomɛ nɛra ŋɔ bá ka ɡaaɡe Daneɛl ne o bala la bɔr, dɛ́ ba kpoo ba.

14Dɛ baa bɛl sɔne Areɔk, onee chɔ nɛra baa dɛ daah kooro la nyoa. Waa laŋa dɛɛ la ka kpoo Babelɔn harɛ ta wejerema la, Daneɛl kpɔ wejema ŋwɛnɛ ta, dɛ bol wobodɛɛɡa nomoa la be. 15Daneɛl bɔɔ nomoa Areɔk la ŋɔ, “Bɔkwa waa kooro do mmara kpeɡ nɔ ken?” Asɛ o bol waa la Daneɛl be. 16Ate, Daneɛl den la kooro be dɛ ka soŋo tɔpere, ásɛ o ɛ dɛ ba baɡlo deera la mun.

17Daneɛl laa berɛ kaa o dem dɛ ka bol waa la baɡle o daamanar Hanania ne Mesael dɛ Asaria. 18Daneɛl ŋɔ bá soŋe Korowii Waa Dɛ Di Kora Nyundua ó na ba sum waa aa do ɔma nɔ ta, ásɛ ba bɛ o ne o daamanar la bwa pɛ kpoo ja Babelɔn harɛ ta wejerema baa kaa la nɛ.#Mat 18:19 19Awola jwaana la, Korowii pili waa la bini baɡle Daneɛl. Asɛ o kpɛɛ Korowii Waa Dɛ Di Kora Nyundua. 20O ŋɔ,

“Hé kpɛɛ Korowii sɔn

saŋ bɛlbwa dɛɛ la,

onee dɔ wejema ne kpeɡri.

21Onee dɛɛ beɡre tɔpera

ne saŋ,

onee dɛɛ chiɡ nɛn kora ta,

dɛ́ berɛ iru kora ta.

Onee dɛɛ tɛ wejerema

wejema,

dɛɛ tɛ lem ne waa mun noe.

22O dɛ le kwaa aa sɔah

baa wola an na ne baŋ,

o jemɛ kon waa lɔ biro ta,

asɛ nii baro cheme

dɛɛ chaah.

23N Naa Korowii ya naawa

aa tomɛ,

n dɛ jaame dɛɛ kpɛɛre.

He tɛ mɛ wejema ne kpeɡri,

dɛ pili waa yaa soŋe bini

baɡ mɛ,

he ɡelɔ ya jemɛ kooro

deera.”

Daneɛl deera mun baɡla

24Ate, Daneɛl la Areɔk Kooro Nebukadnesa aa leo ŋɔ ó kpoo Babelɔn harɛ ta wejerema la be dɛ ka ŋɔ, “Bɛ Babelɔn harɛ wejerema la kpoo. Kɛ kpɔ mɛ la kooro be, ásɛ n ka baɡlo o deera la mun.”

25Ate, Areɔk den ɛ warane kpɔ Daneɛl la kooro la be dɛ ŋɔ, “N na nɛra yaa kaa laɡ ba laa ta le Juda harɛ ta la bɛl ó won baɡle hen kooro deera la mun.”

26Belaa kooro bɔɔ Daneɛl baa bera dɛɛ yerɔ Bɛltesasa ŋɔ, “Hɛɛ won jemɛ n deera la dɛ́ baɡ mɛ a mun aa?”

27Anee Daneɛl chaŋe ŋɔ, “Wejereme kɛɛ nɛn waa dɛ ɛ sɔmwe-ɛɛla kɛɛ dobodobo te kɛɛ voɡre bɛlbwa aa won baɡle a mun.#Mum 40:8 28Kɛ Korowii Waa Dɛ Di Kora Nyundua lole dɛ́ won pili waa aa sɔah bini. Waa aa dɛ ba chiɡa kerekeree o kpɔ baɡle hen n naa Kooro Nebukadnesa la. He deera ne wepila haa chɔa dɛ na laanee teŋa nɔ.

29N naa kooro, haa chɔa la, dɛ he liire dawɛ waane aa dɛ ba bala kerekere ta, asɛ Korowii waa won waa aa sɔah bini pila la ɡel he na waa aa dɛ ba chiɡa. 30Korowiirii ɡela n won baɡle waa aa do ken dɛ sɔh nɔ mun, n ɡbaɡba wejema aa ɡwaa nomɛlbwa ta laa a che, kɛ ɡɛ aa ɛ ásɛ hen n naa kooro, he jemɛ waa haa naa he deera bini la, ń baɡle a mun tɛɛ.

31N naa kooro, kon haa nao he deera la ta laanee komɛl baa mao kɛŋɔ nɛn o do kan dɛ do ɔma kohona, dɛɛ nyɛɡle al-al ken. 32Kon la nyu ɛ suuɡaswɛm tenten, o bambile ne o nɔɔra ɛ suuɡapoŋ, asɛ o tea ne o hwie ɛ ayaawa, 33o nakpale ɛ buni, asɛ o napaala pera ɛ buni, o pera ɛ choh. 34Haa dɛ nyiŋu la, bwekuŋi bɛl waa wola nɛn nɔn ta leɛ kuu, dɛ ba lɔ kon baa mao kɛŋɔ nɛn la napaala aa ɛ buni ne choh la, dɛ kuuɡa burbur ken. 35Belaa buni la, ne choh, ne ayaawa, ne suuɡapoŋ, dɛ suuɡaswɛm la bwa den kuuɡi buɡ la ta, dɛ do kɛŋɔ baa lɔ kwaa pɛla ta lɔmɔɡa saŋ a pɛɡa chɔ la ken. Asɛ peu ta dɛ kpɔa kaa, bɛlbwa ta kae. Kɛ bwekuŋi waa baa lɔ kon waa do kɛ nɛn la, baa ɛ bwejen tenten dɛ tɔ harɛ nɔ ta bwa.”

36Daneɛl ŋɔ kooro be ŋɔ, “N naa kooro, he deera haa deera laanee la. Namee mɛɛ ba ń baɡle a mun. 37N naa kooro, he ɛ koranar bwa kooro. Korowii Waa Dɛ Di Kora Nyundua ɛɛ koojen dɛ ɡel he do kan, dɛ tɛɛ kpeɡri ne jirima.#Ɛse 26:7 38He nɔn taa o kpɔ nɛra, ne kpɔɡ bini ola, dɛ jumbii aa dɛ ɡah do. Henee dɛɛ nyiŋi a nɛ, bobɛlbwa aa lole. Henee kon la nyu baa kpɔ suuɡaswɛm tenten ɛo la.

39He kora la habɔɔ, kora bɛl ɡe ɛɛ bao dɛ́ che tɛ suuɡapoŋ la, kɛ waa hen tel. Ásɛ toorote ɡe ba, dɛ́ che tɛ ayaawa la. Onee dɛ́ ba di kora harɛ nɔ bwa ta. 40Ásɛ a habɔɔ kora bɛl ɡe ka mun ba, onee naarɛte. Wɛɛ do kpeɡrii kɛŋɔ buni ken. Gɛ buni aa won kwaa kuuɡa dɛɛ namɛ kwaa bwa la, ɡɛɛ kora la ɛɛ ba sitɔ kwaa la ɛɛ. 41Gɛ haa na kon baa mao kɛŋɔ nɛn la napaala ne nanie pera ɛ choh, a pera ɛ buni la, ɡɛɛ kora la bini ɛɛ ba peɡra. Kora la pera ɛɛ do kpeɡrii kɛŋɔ buni ken, ásɛ o pera ɡe aa kpeɡrii do kɛŋɔ choh ken. 42Gɛ o nanie pera aa ɛ buni o pera ɛ choh la, ɡɛɛ kora la pera ɛɛ ba kpeɡri doe, ásɛ o pera ɡe do pwɛre. 43Gɛ haa na buni ne choh a koo dɔŋa la, ɡɛɛ kora la nɛra ɛɛ ba dɔŋa koora ba nyoa aa wola pɛ bwa, ɡɛ buni ne choh aa wola won pɛ la.

44A ɡɛ koranar la kora dii ta la, Korowii Waa Dɛ Di Kora Nyundua ɛɛ chiɡ kora waa wola chɔɡ, kɛɛ nomɛlbwa aa wola won pɔ o nɛ. Wɛɛ ba chɔɡ kora bele anaarɛ la bwaa a ba a jaɡa. Kɛ o te ɛɛ cheo dɛ́ do le saŋ bɛlbwa dɛɛ la.” 45Daneɛl berɔ ŋɔ, “Bwekuŋi la waa wola nɛn nɔn ta leɛ, dɛ le bwejen tenten bɛl ta, dɛ ba lɔ buni ne ayaawa ne choh ne suuɡapoŋ dɛ suuɡaswɛm la, dɛ kuuɡu burbur ken la munii.

Nemenɛ Korowiirii baɡle kooro waa aa dɛ ba chiɡa kerekere. Deera haa deera la munii n baɡle dɛ berɛ baɡle a mun kɛrɛdɛ ken tɛɛ la.”

46Ate, Kooro Nebukadnesa kpɔ sie pi harɛ dɛ kpɔ duure tɛ Daneɛl. Dɛ ŋɔ bá ɛ saraha dɛ fuh konsɔɔhsoma tɛ Daneɛl. 47Kooro la ŋɔ Daneɛl be ŋɔ, “Kasinteŋ, Korowii haa dɛ tomɔ la ɛ Dɔɔranar bwa Dɔɔ, ne Koranar Bwa Kooro dɛ ɡela nɛra won dɛɛ na chaahna dɛ won a mun baɡla, dɛkalkɛ he wono baɡle waa aa sɔah nɔ mun.”

48Kooro la ɛ Daneɛl nɛnjen, dɛ kɛo konjena taeh, dɛ kpɔ Babelɔn harɛ ta kpeɡri bwa do o nɔn ta. O ɛo Babelɔn harɛ ta wejerema bwa nomoa. 49A bwa habɔɔ la, Daneɛl soŋe kooro la, asɛ o kpɔ Babelɔn harɛ ta bwa waa do Sadrak ne Mesak dɛ Abɛdnɛɡo nɔn ta. Asɛ Daneɛl te ta do koodem bela dɛ ɛ nomoa.

Currently Selected:

Daneɛl 2: mzw

Highlight

Copy

Compare