Emɔs 4
4
Israel tena ta berɛ ba Korowii be
1Hé no, haahna
haa lɔ Samaria
dɛ do bwara
kɛ nae aa lɔ Basan harɛ ta,
he dɛ fiiɡi nyaara
ne nɛŋɡwɛɡra,
dɛɛ ŋɔ he jaranar be ŋɔ,
“Hé kpɔ sen baa tɛ yaa.”
2Nemenɛ Korowii
waa do ɡoroŋ ŋwɛɛrɔ ŋɔ,
“Tɔpera ane ɛɛ bao
ásɛ ba lawɛ heyaa ɡoŋri
ne kaa.
Baa tɛɡre bɛlbwaa
kaa kɛŋɔ pɛŋe ken.
3Baa lawɛ heyaa kpɔ
danjwɛɛ waa pera ta,
dɛ́ tɛɡre heyaa kaa bobɛl
baa dɛ yerɔ Haamɔn.”
Korowiirii bola.
4Korowii ŋɔ, “Israel tena,
he dɛ nyin aa,
hé ir kaa Bɛtel,
bela haa dɛ tom mɛ la,
ka ɛ wechɔɡa.
Hé kaa Gelɡal ɡe
ka ɛ wechɔɡa kohona.
Hé kpɔ saraha kwaa
kaa tɛ chɔɔ bɛlbwa,
dɛ́ bɔne kwaa haa dɔa bini
bɔre fi,
dɛ́ kpɔ bɔrbeŋkpoŋ kaa tɛ
tɔpera atoro bɛlbwa.
5Israel tena, hé kpɔ paanoo
iisi aa lɔ a ta ɛ saraha
ba jam mɛ,
dɛɛ baɡle he te saraha
aa le he bambile la ta,
dɛkalkɛ anee hɛɛ nyin
ɛɛ kɛrɛdɛ.
Men Nemenɛ Korowiirii bola.
6Menee ɡela lɔr chole
he bwɛjena bwa ta,
asɛ he paŋɛ kondikwa
bwɛɛ bɛlbwa ta,
kɛ he ta berɛ ba n be.
7Menee ɡela bwaala ɡel nɛɛ,
ɡɛ saŋ aa ka korobie atoro
he komɛ koo koŋkwaare.
N ɡelɔ bwaala nɛ bwɛɛ
beŋkpoŋ ta,
dɛ ɡel o ta bɛl te ta nɛɛ.
O nɛ koo bɛl ta,
bɛl ta bwaala dɔe,
harɛ hol.
8Nyɔɡre kpo bwɛjena nɛra
ɡalɡa bane ba ɡwɛɡre,
dɛ ɡaaɡe la bwɛjen bɛl ta
dɛ́ ka nyin nee nyɔ,
ba ta dɔe.
Ane a bwa, he ta berɛ
ba n be.
Men Korowiirii bola.
9Keraŋwɛnɛ bwaa n ɡel
he koo koŋkwaare chɔɡ,
weela anee n kpɔ chɔɡa.
Tontombɛ di he fiɡ
ne ɔleve daa,
kɛ he ta berɛ ba n be.
Men Korowiirii bola.
10N kpɔ weechɔɡa ba ta he nɛ,
ɡɛ n fa aa ɛ Ijipt harɛ ta la.
N kpoo he bonɔɔna laa ta,
dɛ lawɛ he jaɡre kaa.
Dɛ ɡel nɛra baa serewa chɔ
sɔɔh kpo heya,
bela haa soɡa,
kɛ he ta berɛ ba n be.
11N chɔɡ he bini bane,
ɡɛ maa chɔɡ Sodom ne
Gomoora tena la.
Dɛ he do kɛŋɔ nindaa waa
lɔ nii ta n kee heyaa le,
kɛ he ta berɛ ba n be.#Mum 19:24-25
Men Korowiirii bola.
12Anomanta, Israel tena,
mɛɛ tɛr he deŋnee.
Maa dɛ ba heyaa ɡɛ ɛɛ
nomanta,
hé kpɔ he te dɛɛ kpa
men Korowii
haa dɛ tom mɛ,
ásɛ n pa heyaa bolchɔɡe.”
13Korowiirii ta bwejena
dɛ ta peu ɡe,
dɛ ɡel nɛn jemɛ o liire.
Onee ɡela webaŋa
won jwaana bera,
bwejena dor ɛ o natiɡribɔr,
o sɔne Korowii
Waa Ɛ Kpeɡri Bwa Dɔɔ.
Currently Selected:
Emɔs 4: mzw
Highlight
Copy
Compare
Share
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
