Emɔs 1
1
1Baa bɛl sɔne Emɔs, dɛ o ɛ peteɡre dɛ so Tekoa.#Emɔ 7:14 Korowii pili waane aa dɛ ba Israel harɛ ta bala baɡlo chaahna ta, bene anɛ mɔɔ harɛ jiɡra bɛl chiɡ Israel harɛ ta.#Sek 14:5 Gɛ saŋ dɛ Kooro Ussia di kora Juda harɛ ta,#2Ko 15:1-7; 2We 26:1-23 asɛ Jehoas bibaa Kooro Jɛroboam ɡe di kora Israel harɛ ta. #2Ko 14:23-29
2Emɔs ŋɔ,
“Korowii baah diu o kɔr
le Saayɔn Bwejen ta,
o taa kpeɡri kɛŋɔ
bwaala aa dɛ kɔɡre ken,
o le Jerusalam dɛɛ ba.
Kondɛɛra dibɔra bwa holɔ,
Kaamɛl Bwejen doa
kpɔɡa bwa serewe.”
Korowii pa bwɛɛre aa bar Israel tena cheme bolchɔɡe
3Korowii ŋɔ,
“Damaskɔs tena teŋɔ
dɛɛ ɛ wechɔɡa,
a chɛ kɛ ń tɛr ba deŋne.
Ba lɔɔ Gelead tena
nyubinikpeɡ ne,
kɛŋɔ baa lɔ
mea pɛla ta ken.
4Mɛɛ ba fuh koodem Kooro
Hasael aa doo laanee,
dɛ́ ba fuh Kooro Bɛn Hadad
dekpeɡa la, dɛ́ chɔɡa.#2Ko 13:24
5Mɛɛ kuuɡi bwɛjen
Damaskɔs doonyoa ɡbenii,
dɛ́ ir nɛra baa soɡe
Bɛn Avɛn#1:5 Avɛn munii nyubinikpeɡ. Fɛlembɔjen,
ne kooro waa dɛ di kora
Bɛt Eden.
Baa lawɛ Siiria tena
laa taa kaa Kir harɛ ta.
Men Korowiirii bola.”
6Korowii berɔ ŋɔ,
“Gasa tena teŋɔ
dɛɛ ɛ wechɔɡa,
a chɛ kɛ ń tɛr ba deŋne.
Ba lawɛ harɛbir nɛra laa ta,
dɛ ka yoɡ ba yoma
tɛ Edom tena.
7Anomanta, mɛɛ ɡeloo nii ba
fuh danjwɛjena aa bar
bwɛjen Gasa la,
dɛ́ fuh o dekpeɡa bwa,
dɛ́ chɔɡa.
8Mɛɛ ir koranar
baa lɔ bwɛjena Asdɔd
ne Askɛlɔn kora taa.
Mɛɛ tɛr bwɛjen Ekron tena
deŋnee,
ásɛ Filisti tena baa kaa
la bwa serewe.
Men Nemenɛ Korowiirii bola.”
9Korowii berɔ ŋɔ,
“Taaya tena teŋɔ
dɛɛ ɛ wechɔɡa,
a chɛ kɛ ń tɛr ba deŋne.
Ba lawɛ harɛbir nɛra laa ta
kaa bojaŋ Edom harɛ ta,
ba ta beŋkpoŋri fɔo ba ne
baa fɔwa la ta teŋɛ.#Aes 23:1-18; Joe 3:4-8
10Anomanta, mɛɛ ɡeloo
nii ba fuh danjwɛjena
aa bar bwɛjen Taaya,
dɛ́ fuh o dekpeɡa,
dɛ́ chɔɡa.”
11Korowii ŋɔ,
“Edom tena teŋɔ
dɛɛ ɛ wechɔɡa,
a chɛ kɛ ń tɛr ba deŋne.
Ba kpɔ keri kpoo ba lolanar
Israel tena,
ba ta tedoma dɔe tɛɛ ba,
ba bandia ta jaɡa dɔe,
waa sɔɔh bwa. #2We 28:17
12Mɛɛ ɡeloo nii ba fuh
bwɛjen Teman,
dɛ́ fuh bwɛjen Bosra
dekpeɡa, dɛ́ chɔɡa.”
13Korowii ŋɔ,
“Amɔn tena teŋɔ
dɛɛ ɛ wechɔɡa,
a chɛ kɛ ń tɛr ba deŋne.
Ba yo laa dɛɛ nyin
ba harɛ do kan,
anomanta, ba kpoo Gelead
tekpoŋra, dɛ ya ba teene.
14Mɛɛ ɡeloo nii ba fuh
danjwɛjena
aa bar bwɛjen Raba
dɛ́ chɔɡ ba dekpeɡa.
Dɔma ɛɛ do lɔŋɔree
dɛ́ ba yoo ba awola,
kɛŋɔ kawulewule aa
dɛ ta ken.
15Baa lawɛ Raba kooro
ne o nomonome laa taa
kaa bojaŋ harɛfale ta.
Men Korowiirii bola.”
Currently Selected:
Emɔs 1: mzw
Highlight
Copy
Compare
Share
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
