2 Jɔn 1
1
1Men Nomoa Jɔnee chwerɛ tɔn nɔ dɛɛ tɛ haah#1:1 Bela baa chwerɛ haah la Korowii aa leo cheɡ dɛ tɛ o te la, ne o bii la munii asɔre ne asɔre tena. Berɛ nyiŋi 2Jɔ 1:4, 5. la Korowii aa leo cheɡ dɛ tɛ o te la, ne o bii maa koh beŋkpoŋ ya bwa aa ɛa Korowii kasinteŋ waa la ta dɛɛ nyin ba la. N ɡbo laa dɛɛ nyin ba ɡɛ. Nɛra baa jemɛ Korowii kasinteŋ waa la bwa ɡe jao, 2dɛkalkɛŋɔ kasinteŋ la lɔ ya bwa bambile bini. Wɛɛ do lee saŋ bɛlbwa dɛɛ la.
3Ń Naa Korowii ne o Bie Yeesu Kristo sune ya bwa sekwara nɛ, dɛ́ cha yaa, dɛ́ tɛ yaa bosɔɔhna yá won jemɛ kasinteŋ la, dɛ́ dɔ nɛnnyin.
Kasinteŋ ne dɔŋa nyina
4N sie lɛo kohona kɛ maa na he bii#1:4 Bela baa chwerɛ he bii la munii asɔre tena. la bane kɛ ba teŋɛ kasinteŋ waa la ta ɡɛ ya Mɛɛ waa lɔ nyundua la aa ŋɔa yáa ɛ la. 5Kɛ n bidɛɛɡe, taraken n dɛ soŋe, dɛɛ teŋɛ waa Korowii aa bola bil la ta. Wefala laa. Dɛ hɛ́ɛ nyin dɔŋa.#Jɔn 15:12; 1Jɔ 2:7-8 6Dɛ ya dɛ nyin dɔŋa aa, dɛ ya dɛ teŋɛ o waa la ta. O waa laanee kɛŋɔ dɔŋa nyina, ɡɛ haa noa loɡla la. Anomanta, hɛ́ɛ ɛ he wobɛlbwa dɔŋa nyina ta.
7Nyosonteŋna tenten balɔ taraken. Banee wola yarada kɛŋɔ Yeesu Kristo ba harɛ nɔ ta kɛŋɔ nɛwɛnyini la. Nomɛlbwa waa wola ɡɛ yarada la, o ɛ nyosonteŋni dɛ ɛ Yeesu Kristo dɔm. 8Hɛ́ɛ nyiŋi he te kɛrɛdɛ, dɛ́ bɛ ɡel he toma ɛ pɛɛ, ásɛ he won dɔ he tɔnɔ bwa dɛ́ le a ta.#Hib 10:35-36 9Nomɛlbwa waa dɛ baɡle Yeesu Kristo waa la dɛ kpɔ o ɡbabir nyu bini liire dɛɛ ja la, amɔ dɛ Korowii ta naate nɛɛ teŋɛ. Nomɛlbwa waa jemɛ Yeesu Kristo webaɡla la dɛɛ baɡla ɡɛ aa doa la, dɛ Korowii ne o Bie la teŋɛ o nɛɛ kɛrɛdɛ. 10Dɛ nomɛlbwa ba he be dɛ baa baɡle heyaa anɔ la aa wola Yeesu Kristo waa la ane ɛɛ yaa, he bɛ naate lɛ so he be, he bɛ o sie kwara lɛ. 11Nomɛlbwa waa lɛ ɡɛ te la sie la, o ɡe ɡba ja naate wechɔɡa la ta.
12N dɔ waa taeh, dɛ́ bol he be, kɛ maa chwerɛ do tɔn ta. N dɛ nyin kɛ ń ba he be ya sie ɛ anɛ, ásɛ n bol he be. Belaa ya sie ɛɛ ba lɛɛ kohona.
13He nime la Korowii aa leo cheɡ tɛ o te la, o bii dɛ na heyaa kohona.
Currently Selected:
2 Jɔn 1: mzw
Highlight
Copy
Compare
Share
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
