1 Timoti 1

1Men Pɔɔl maa ɛ Yeesu Kristo torome laanee chwerɛ tɔn nɔ. Korowii waa ɛ ya Lɛɛ ne Yeesu Kristo yaa dɛ hwɛɡɛ o nɛɛ laanee do mɛ ŋɔ mɛ́ɛ bol o waa nɔ.

2N bie Timotii#Weɛ 16:1-3 n chwerɛ tɔn nɔ dɛɛ tɛ. Menee bol Korowii Waa he no dɛ yarada, dɛ berɛ n bie a ta la.

Ń Naa Korowii ne ya Dɔɔ Yeesu Kristo chae dɛ́ na he sum, dɛ́ tɛɛ bosɔɔhna.

Korowii dɛ kah nyosonteŋna o waa baɡla ta

3Waa maa ba dɛ kaa Makidoonia harɛ ta dɛ ŋɔ he be la, a taa n ta do. N ŋɔ hé so Ɛfesos dɛ kah nɛra baa teŋe nyosone dɛɛ tɛ nɛra ŋɔ Korowii Waa baa chaɡle la ŋɔ bá ɡel ɡɛ waa la, dɛ bɛ Korowii waa la sie berɛ. 4Ŋɔ ba bɛ ɡel nyosone la ne ɡɛ baa dɛ baɡle ba naanar leebɔra baa wola a nyoa na bwa la lɛ ba liire. Wetɔŋla ɡbo nee ɡɛ waa nɔ ɛɛ ba. Korowii toma ŋwɛnɛre laa baa baɡle la, dɛkalkɛ yarada ɡbo taa a che baa jemɛ Korowii toma ŋwɛnɛre. 5Waa maa koh a waa doe waa nɔ ta laanee kɛŋɔ bá won dɔ nɛnnyin. Nɛn waa dɔ nɛnnyin nɔ soo la ta wechɔɡa bɛlbwa dɔe, o tea too, o dɔ yarada kasinteŋ. 6Nɛra bane ɡel ɡɛ waa nɔ dɛ ka teŋɛ wesale aa wola mun dɔe bola ta. 7Ba dɛ nyin kɛ ba ɛ ba te kɛ nɛra baa dɛ chaɡle nɛra Korowii Mmara la, kɛ waa ba siwi yon swɛɛ a ta baa bol la, ba ɡba aa a mun jemɛ.

8Ya bwa jemɔ kɛ dɛ nɛn wono ɛ ɡɛ Mmara la aa dɛ baɡle la aa, Mmara la wer tɛo. 9A chɛ kɛŋɔ hé jemɛ kɛŋɔ nɛndɛɛɡa waa laa ba koh dɛɛ do mmara, kɛ nɛra baa wola mmara ta teŋɛ la, ne deŋnekpeɡ tena, ne nɛra baa vɛh Korowii la, ne wechɔɡ-ɛɛra, ne nɛra baa wola Korowii tomɛ, baa wola on duu la, ne nɛra baa dɛ kpoo ba mɛɛnanar ne ba nyare, dɛ nɛra baa dɛ kpo nɛra bwa, 10ne jwamane tena, ne baala ba ne ba bandɔŋa aa dɛ chɔ haah ne baa, ne nɛra baa lawɛ nɛra dɛɛ yoɡ ba kɛ yoma, ne nyosonteŋna, ne nɛra ba yon jemɛ kɛ nyosonee baa teŋe dɛ ɡarɛ dɛɛ ŋwɛɛ Korowii la, ne nɛra baa dɛ ɛ we-ɛɛla te bɛlbwa a ne webaɡla aa toɡra la aa wola kaa la, ba waa ba koh dɛɛ do mmara. 11Gɛ waa aa toɡra la bwa lɔ Amanesoma Korowii aa kpɔa do n nɔn ta ŋɔ ń chaɡle nɛra la ta. Anee dɛɛ baɡle Korowii waa dɔ jirima ne silɛɛ la wa.

Pɔɔl jam Korowii suna waa sune o nɛ

12N dɛ jam ya Dɔɔ Yeesu Kristo waa tɛ mɛ o kpeɡri la kɛ waa yarada mɛ dɛ kpɔ o toma nɔ do n nɔn ta nɔ. 13A lole kɛ n fa dɛ ɛ Yeesu Kristo la nɛnhɛla, dɛɛ ɛo hɔhɔrɔwa, n siwi sao mɛɛ yoo. Kɛ Korowii na n sum, dɛkalkɛ maa wola Korowii yarada dɔe n bini la, dɛ maa jemɛ ɡɛ maa dɛ ɛ.#Weɛ 8:3 14O sune n nɛɛ kohona dɛ cha mɛ taeh n dɔ yarada ne nɛnnyin yaa dɔa le pɛɛ ya ne Yeesu Kristo aa pɛa la ta.

15Waa nɔ ɛ kasinteŋ aa chɛ kɛŋɔ hé lɛa kɛŋɔ wechɔɡ-ɛɛra waa Yeesu Kristo koh ba harɛ nɔ ta dɛ ba lɛɛ ba. N wechɔɡaa kana ɡwaa nomɛlbwa kwa.#Mak 2:17; Rom 4:25 16Kɛ Korowii sune n nɛ, asɛ Yeesu Kristo dɔ bambile tɛ mɛ n wechɔɡa damanta nɔ bwa ta, ásɛ nɛra baa ba no Korowii waa dɛ yaradao la jemɛ ɡɛ Yeesu aa dɔ bambile kohona, dɛ́ won yaradao dɛ́ dɔ o mkpa aa wola jaɡa dɔe la. 17Yá kpɔ duure tɛ Koojen la o Kora dii aa wola jaɡa dɔe, waa wola sewɛ bwa, baa wola won on na, o ɡbo aa ɛ Korowii la, dɛɛ ɡuŋu harɛ fini ne tɔpere bɛlbwa. Aamen.

18N bie Timoti, n dɔ waane dɛ́ bol he be, ásɛ he lawɛ a bini he Korowii toma ta. Gɛ ba fa aa cheɡɛ Korowii Domadɛɛɡe kpeɡri ta dɛ bol o toma waa tɛɛ kpeɡri hɛ́ɛ ɛ nɔ waa la, ɡɛ waa la tenten taa mɛɛ doe la. Anomanta, ɡel ɡɛ waa la doe ɡbemba ásɛ he won yo kɛrɛdɛ, 19ásɛ dɛ kpoŋe Korowii yarada bini kiŋkiŋ, dɛɛ ɛ waa haa jema kɛ a toɡrɔ. Gɛɛ bane aa wola ɛɛ, asɛ ba ta wone yarada Korowii ka tonɛ dɛ horɛ la. 20Banɔ la baa hora la bini banee Haemenayɔs ne Alɛksanda.#2Ti 4:14 N kpɔ ba do Bɔnsam nɔn ta, ásɛ ba jemɛ kɛŋɔ baa Korowii nɛnhɛla ɛ.

Currently Selected:

1 Timoti 1: mzw

Highlight

Copy

Compare