1 Jɔn 2
2
Yeesu waa dɛ cha yaa
1N bidɛɛɡa, n chwerɛ waa nɔ dɛɛ tɛ heya, ásɛ he bɛ wechɔɡa dɛɛ ɛ. Kɛ dɛ nomɛlbwa ɡarɔ ɛ wechɔɡa aa, ya dɔ nomɛl o do ya Mɛɛ waa lɔ nyundua la be, dɛ́ soŋe ya wechɔɡa dɛɛ tɛ yaa. Onee Yeesu Kristo la. O Waa Toɡrɔ.#Hib 7:25 2Onee koh ya wechɔɡa waa dɛ sewɛ tɛ yaa dɛ kwaa ya ne Korowii baah. Ya ɡbo wechɔɡa waa laa o sewɛ. Nomɛlbwa waa lɔ harɛ nɔ ta bwa jao.
3Ya teŋɛ o waa ta naa, anee dɛɛ ba yaa baɡla kɛ ya jemɔ. 4Dɛ nomɛlbwa ŋɔ o jemɛ Korowii, dɛ waa o waa ta teŋaa, ɡɛ nɛn la ɛ nyosonteŋni, dɛ kasinteŋ toole o be. 5Nomɛlbwa waa dɛ teŋɛ Korowii waa ta la, onee dɛɛ nyin Korowii waa kɛrɛdɛ. Anɔ taa yaa ba cheɡa dɛ́ jemɛ kɛ ya ne Korowii pɛo. 6Nomɛlbwa waa ŋɔa o ne Korowii pɛo la, a chɛ kɛŋɔ ó kpɔ Yeesu Kristo da la.
7Yabala, waa nɔ maa dɛ chwerɛ heyaa nɔ ta wefala ɛɛ. Webena la yaa baɡle heyaa le mumpar la, anee ta.#Jɔn 13:34; 15:12, 17 8Kɛ ŋwɛnɛ bɛl ɡe ta la, a ɛ wefala, dɛkalkɛ biro dɛ kaa. Bochaah tenten balɔ, asɛ bɔr ɛɛ chaah kɛrɛdɛ. Yeesu we-ɛɛla ne he ɡbaɡba we-ɛɛla baɡle a ɡɛ waa nɔ mun.
9Nomɛlbwa waa ŋɔa o lɔ bochaah ta, kɛ dɛ hah o dɔŋ la, naate ta lɔ biro tenten ta. 10Nomɛlbwa waa dɛ nyin o dɔŋ la do kɛŋɔ nɛn waa lɔ bochaah ta. Bochaah la nomanta, komɛlbwa toole dɛ́ ɡel ó lɔ nakpala dɛ́ chole. 11Nomɛlbwa waa hah o dɔŋ la do kɛŋɔ nɛn waa lɔ biro ta. O dɛ valɛ, kɛ waa jemɛ bela waa dɛ kaa, dɛkalkɛŋɔ biro la ɡelɔ o nyoŋe.
12N bidɛɛɡa, n chwerɛ waa nɔ dɛɛ tɛ heya,
dɛkalkɛ Korowii koh Yeesu waa dɛ kpɔ he wechɔɡa kɛ heya.
13Nomonome, n chwerɛ waa nɔ dɛɛ tɛ heya,
dɛkalkɛ heyaa jemɛ naate
waa lole le mumpar bwa la.
Bonɔɔna, n chwerɛ waa nɔ dɛɛ tɛ he ɡe,
dɛkalkɛ he pɔ Bɔnsam nɛ.
14N bidɛɛɡa, n chwerɔ dɛɛ tɛ heya,
dɛkalkɛ he jemɛ ya Mɛɛ waa lɔ nyundua la.
Nomonome, n chwerɔ dɛɛ tɛ heya,
dɛkalkɛ he jemɛ naate
waa lole le mumpar bwa la.
Bonɔɔna, n chwerɔ dɛɛ tɛ heya,
dɛkalkɛ he bwaraa kpeɡa,
Korowii waa la do he bambile bini.
Heyaa wona pɔ Bɔnsam nɛ.
He bɛ ɡel he sie lɛ harɛ nɔ ta kwaa ta
15He bɛ ɡel he sie lɛ waa aa dɛ lɛ nɛra baa dɔ harɛ nɔ ta ɡbo liire sie la, ne harɛ nɔ ta kwaa ta. Dɛ he sie dɛ lɛ a ɡɛ kwaa la ta naa, dɛ haa he Mɛɛ waa lɔ nyundua la waa nyin.#Jem 4:4 16Bwadabii pɛlchɔɡa kwa, ne anɔ la aa ɛ siwi pɛla kwa, ne waa yaa nyina dɛ kpɔa dɛɛ maŋkura ya te la ɛ harɛ nɔ ta wa. A ta ya Mɛɛ waa lɔ nyundua la be leɛ. 17Harɛ nɔ ne o pɛla kwaa bwa sekwaraa dɔ jaɡa. Naate waa dɛ ɛ anɔ la Korowii aa dɛ nyin la ɡbosoo dɛɛ ba le doe saŋ bɛlbwa.
Yeesu Kristo dɔm la wa
18N bidɛɛɡa, wobɛlbwa jaɡa saŋ telo. He noɔ kɛŋɔ Yeesu Kristo dɔm tenten la ɛɛ bao. Hale taraken o dɔma dɔɔ warɛ dɛ ba. Anomanta, ya jemɔ kɛŋɔ wobɛlbwa jaɡa saŋ telo. 19Dɛ bane fa ja ya nɛ, kɛ dɛ ba ta denɛ ɛ ya bini bane, dɛkalkɛ ba chwao. Dɛ ba fe ja ya nɛ aa, ya ne ba fe ta pɛo. Kɛ ba chwao, asɛ a den baɡle kɛŋɔ ba bini bɛlbwa ta ya nɛɛ jae.
20He te dɔ Korowii Domadɛɛɡe la he nɛɛ dɛ le Korowii Biɡoroŋ la be, dɛ jemɛ o kasinteŋ waa la bwa. 21Kasinteŋ bɛ jema waa laa n chwerɛ tɔn nɔ baa tɛ heya. He jemɛ kasinteŋ la, dɛ jemɛ kɛŋɔ nyosone ne kasinteŋ aa valɛ bwa. 22Amɔ umee ɛ nyosonteŋni ɔ? Nyosonteŋnii naate waa ŋɔa Yeesu laa Kristo la Korowii aa baɡɛ nyoa ŋɔ wɛɛ tomɔɔ ó ba lɛ yaa la. A ɡɛ nɛn la, onee Yeesu Kristo dɔm tenten. Onee vɛh ya Mɛɛ waa lɔ nyundua ne o Bie bwa. 23Nomɛlbwa waa dɛ tɔŋle kɛŋɔ Yeesu Kristo laa Korowii Bie la, waa won yerɛ Korowii o Mɛɛ. Gɛɛ a do, nomɛlbwa waa sɛah ŋɔ Yeesuu Korowii Bie la, o Mɛɛɛ Korowii.
24Hé kpoŋe anɔ la haa noa dɛ le mumpar la bini. Dɛ he ɛ ɡɛ naa, saŋ bɛlbwa he ne Yeesu ne o Mɛɛ bwa ɛɛ wonoo pɛ bá kpoŋe heya. 25Dɛ ya ne Yeesu ne o Mɛɛ wono pɛ aa, a taa yaa ba cheɡa, dɛ́ dɔ Korowii mkpa aa wola jaɡa dɔe Yeesu aa baɡɛ yaa nyoa la.
26Nɛra baa dɛ ba dɛ fee baa neɡre heyaa la waa n chwerɛ ɡɛ waa nɔ dɛɛ tɛ heyaa la, ba bɛ won neɡre heya. 27Yeesu Kristo aa dɔa tɛ heyaa Korowii Domadɛɛɡe o do he bini nɔ, haa nomɛlbwa nyin o baɡle heyaa waa kpa. O Doma la dɛ baɡle heyaa wobɛlbwa. O ɛ kasinteŋ te, waa nyosone teŋe. Hé no anɔ la waa dɛ baɡle heyaa la, ásɛ dɛ kpɔ he te pɛ Yeesu Kristo nɛ.
Korowii bii
28N bidɛɛɡa, hé ɡel he ne Yeesu Kristo pɛ, ásɛ o baa forɛ le awola aa, ya bɛ ɔmɛ, ásɛ sihiih bɛ yaa kpo o sie awola waa ba la.
29He nao kɛŋɔ Korowii waa toɡrɔ, anomanta, nomɛlbwa waa dɛ ɛ wedɛɛɡa aa su Korowii siwi la ɛ Korowii bie.
Currently Selected:
1 Jɔn 2: mzw
Highlight
Copy
Compare
Share
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
