1 Kɔrent 3

Asɔre tena dɔŋa baah peɡra wa

1Yabala, n fa ta wone bol waa baɡle heyaa kɛrɛdɛ ɡɛ maa dɛ baɡle nɛra Korowii Domadɛɛɡe aa chaah ba sie la. N bola tɛ heyaa kɛ nɛra ba taa dɛ teŋɛ ba nɛwɛnyini mar waa ta, dɛkalkɛŋɔ he do kɛŋɔ bechale ken Yeesu Kristo waa la ta. 2Wobopwɛra nee n faa baɡle heyaa waa kɛŋɔ baa dɛ ɔr bechala waa wola tele ne kondikwaa dii la. Hale taraken kwara he ta tele mɔɔ,#Hib 5:12-14 3dɛkalkɛŋɔ he ta dɛ teŋɛ nɛwɛnyini mar waa ta. Bɔweela ne naɡra aa lɔ he baah ta nɔ, nɛwɛnyini mar nɛɛ laa hɛɛ teŋɛ nɔ naa? Haa jemɛ kɛŋɔ dɛ he dɔ ɡɛ da nɔ naa, he ja nɛra baa dɔ harɛ nɔ ta liire nɛɛ kɛɛ? 4Dɛ he bane ŋɔ he dɛ teŋɛ men Pɔɔl nɛ, asɛ he bane ɡe ŋɔ ba dɛ teŋɛ Apolos nɛ aa, amɔ dɛ he ne nɛra baa dɛ teŋɛ ba nɛwɛnyini mar ta la da beŋkpoŋ.#1Kɔ 1:12

5Bamewaa Apolos ne Pɔɔl hɛɛ maŋkura ba ɡɛ nɔɔ? Tom-ɛɛra ɡboo yaa. Korowiirii tomɛ yaa he be, ásɛ he no Yeesu waa dɛ́ yaradaa dɛ́ kpɔ he te tɛo. Toma Korowii aa kpɔa tɛ ya bini bɛlbwa laanee yaa ɛ. 6Ya fa do kɛŋɔ nɛra baa dɛ du kwaa dɛ do he bini. Menee dua, asɛ Apolos ɡe ka ba, dɛ ba do nee a ta. Korowiirii ɡela kwaa la le dɛ kpeɡ.#Weɛ 18:4-11, 24-28 7Anomanta, nɛn waa dɛ du kwaa ne onɔ la waa dɛ do nee a ta la te bɛlbwa aa won waane ɛ. Korowii ɡbosoroo won waa ɛɛ, dɛkalkɛŋɔ onee ɡela kwaa won lee, dɛɛ kpeɡ. 8Nɛn waa dɛ du kwaa ne onɔ la waa dɛ do nee a ta la te bɛlbwa ta korɛ. Korowii dɛ bɔ bɛlbwa kem ɡɛ aa chɛa. 9Korowiirii dɔ yaa, ya ne o pɛ dɛɛ ɛ toma. Asɛ he ɡe do kɛŋɔ o koo waa dɛ parɛ, ne o dea waa dɛ do.

10Korowiirii cha mɛ n won ɛ toma kɛŋɔ nɛn waa jemɛ dea mae kɛrɛdɛ la, dɛ pa dea la mun, asɛ nomɛl ɡe ba ma dɛɛ chɔŋɛ. Kɛ bɛlbwa nyiŋi kɛrɛdɛ ɡɛ waa maa dɛɛ chɔŋɛ. 11Yeesu Kristo ɡboo Korowii den kpɔ cheɡ kɛ dea mumpar. Dɛ Yeesu laa aa, nomɛlbwa toole yá che o nɛɛ ó lɛ yaa. 12A do kɛŋɔ bane aa kpɔ suuɡaswɛm, bane kpɔ suuɡapoŋa, bane kpɔ bwedɛɛɡa, dɛ ma chɔŋɛ dea la mumpar la ta, asɛ bane ɡe kpɔ daa ne kpɔɡa ne jaaɡe sɛɛh dɛ ma chɔŋɛ. 13Dɛ Korowii Tɔpere waa dɛ ba nɛra bwa waa bola dɛ́ pa bole la telaa, belaa baa ba nae ɡɛ bɛlbwa toma aa doa. Awola tɔpere la, niinii dɛɛ ba toma nomɛlbwa aa ɛa la wer bini baɡla. 14Dɛ nii la jo toma haa ɛa chɔŋɛ dea la mumpar la ta dɛ a ta fueh yaa, Korowii ɛɛ bɔe a kemee. 15Kɛ dɛ nomɛl toma fuoh waa, Korowii ɛɛ lɛ naatee, kɛ wɛɛ paŋɛ komɛlbwaa. Wɛɛ ɛo kɛŋɔ kon baa keeru le nii ta ken.

16Haa jemɛ kɛŋɔ he cheɡɔ tɛ Korowii Dea asɛ o Domadɛɛɡe la so he bini kɛɛ? 17Anomanta, nomɛlbwa waa chɔɡ Korowii Dea la, Korowii ɛɛ chɔɡ naatee, dɛkalkɛŋɔ o Dea la waa doa la ɛ dea doŋa bɛlbwa aa wola toole o ta. Heyaa o Dea la.

18He bɛ he te dɛɛ neɡre. Dɛ he bini bɛl lole dɛɛ lii kɛŋɔ o dɔ harɛ nɔ ta wejema aa, ó ɛ o te ɡɛne ásɛ dɛ dɔ Korowii wejema tenten. 19Harɛ nɔ ta wejema ɛ wesale Korowii be. Ba chwerɛ Korowii Tɔn bini dɛ ŋɔ, “Nɛra kpɔ wejema ŋwɛnɛ ta dɛɛ ɛ wechɔɡa, kɛ Korowii dɛ laɡ ba.”#Job 5:13 20Ba chwerɛ o bobɛl ɡe ŋɔ, “Korowii jemɛ harɛ nɔ ta wejerema liire kɛŋɔ a ɛ wepuu.”#Yel 94:11 21Anomanta, he bɛ bane kpɔ dɛɛ ta nyoa. Komɛlbwa chɔ le dɛ tɛ heya. 22Pɔɔl ne Apolos ne Pita, nyundua ne harɛ, mkpa ne seo, kwaa aa lole fini ne kerekere oo, heyaa dɔ a bwa. 23Yeesu Kristo ɡee dɔ heya, asɛ Korowii ɡe dɔ Yeesu Kristo.

Currently Selected:

1 Kɔrent 3: mzw

Highlight

Copy