YouVersion Logo
Search Icon

Jesaja 5

5
Die wingerd van die Here
1Ek is lief vir Iemand, en ek wil sing oor Hom.
Ek wil sing oor sy wingerd.
Ek is lief vir Hom.
Hy het 'n wingerd op 'n heuwel
waar goeie grond is.
2Hy het die grond op die heuwel omgespit
en die klippe uitgehaal
en hy het goeie wingerdstokke geplant.
Toe het Hy 'n toring in die wingerd gebou
en 'n parskuip in klip uitgekap.
Hy het gehoop dat die wingerd druiwe sal dra,
maar die wingerd het slegte vrugte gedra.
3En nou sê Hy vir die mense wat in Jerusalem woon
en vir die mense van die land Juda:
“Julle moet sê wie het reg gedoen,
Ek of my wingerd.
4Wat moet Ek nog vir my wingerd doen
wat Ek nog nie gedoen het nie?
Ek het gehoop dat my wingerd druiwe sal dra,
maar hy dra slegte vrugte.
5Nou sê Ek vir julle wat Ek met my wingerd sal doen:
Ek sal die muur om die wingerd afbreek,
dan kan die diere die wingerd vreet en plat trap.
6Ek sal die wingerd los.
Ek sal nie die takke afknip
en die bossies uithaal nie.
Dorings en bossies sal in die wingerd groei,
en Ek sal sê die wolke moenie op die wingerd reën nie.”
7Wie is die wingerd van die Here,
die Here wat oor alles regeer?
Dit is die Israeliete, die mense van Juda.
Hulle is die Here se tuin.
Die Here wou bly wees oor hulle,
en Hy het gewag dat hulle reg moet doen aan ander mense,
maar hulle het dit nie gedoen nie.
Dit sal sleg gaan met die mense wat sonde doen
8Dit sal sleg gaan met julle.
Julle hou aan om ander mense se grond te vat,
en hulle het nie nou plek om te woon nie.
Net julle het plek in die land.
9Die Here wat oor alles regeer, het vir my gesê:
“Die vyande sal die baie huise verwoes,
dit is seker.
Daar sal niemand woon in die groot, mooi huise nie.
10Julle sal net 'n bietjie wyn kry van 'n groot wingerd,
en julle sal baie saad saai, maar min koring kry.”
11Dit sal sleg gaan met julle wat vroeg opstaan om te drink,
en in die aand wakker bly sodat die wyn julle warm kan maak.
12Julle luister na die musiek van liere en harpe, tamboeryne en fluite.
Julle drink wyn wanneer julle feesvier,
maar julle kyk nie wat die Here doen nie.
Julle sien nie die werk van sy hande nie.
13My volk wil nie naby My wees nie.
Daarom sal die vyande hulle wegvat na ander lande.
Die mense en hulle leiers sal sterf,
want hulle sal nie kos hê om te eet of water om te drink nie.
14My volk wil nie naby My wees nie.
Daarom is die doderyk soos 'n groot dier
wat sy bek wyd oopmaak en die mense insluk.
Al die mense wat nou skree en juig,
sal saam afgaan na die doderyk, ook die belangrike mense.
15Dan sal die hoogmoedige mense nie meer belangrik wees nie.
16Die Here wat oor alles regeer, die heilige God,
Hy alleen sal belangrik en heilig wees,
want Hy doen reg aan mense, Hy is regverdig.
17Skape sal wei waar die stad was.
Hulle sal daar bly soos op die veld waar hulle altyd wei.
18Dit sal sleg gaan met almal wat afgode dien.
Hulle trek die sonde na hulle toe met sterk toue.
19Hulle sê: “Die Heilige God van Israel moet gou maak,
Hy moet sy werk vinnig doen, ons wil dit sien.
Wat Hy besluit het, moet nou gebeur, ons wil dit weet.”
20Dit sal sleg gaan met almal wat sê
slegte dinge is goed
en goeie dinge is sleg,
almal wat maak of die donker lig is
en of die lig donker is,
almal wat sê bitter is soet en soet is bitter.
21Dit sal sleg gaan met almal wat dink hulle weet baie,
almal wat dink hulle is baie slim.
22Dit sal sleg gaan met almal wat dink hulle is sterk mense
wanneer hulle wyn drink en hulle bier sterk maak.
23Dan sê hulle die man wat verkeerd gedoen het, is reg,
en die man wat reg gedoen het, is verkeerd,
omdat mense hulle betaal om dit te sê.
24Daarom sal hulle brand soos kaf, soos gras wat afbrand.
Daar sal niks oorbly van hulle nie,
want hulle het nie gedoen wat die Here gesê het nie,
die Here wat oor alles regeer.
Die Heilige God van Israel het met hulle gepraat,
maar hulle het gemaak of dit nie belangrik is nie.
25Daarom het die Here baie kwaad geword vir sy volk.
Hy het sy hand uitgesteek en hulle geslaan.
Die berge het gebewe,
en die lyke van die mense het soos vuilgoed in die strate gelê.
Maar die Here hou aan om hulle te straf.
Hy bly nog kwaad vir hulle.
26Hy swaai sy vlag in die lug en Hy roep 'n volk wat ver is.
Hy fluit vir hulle, en hulle kom baie vinnig uit 'n ver land.
27Niemand is moeg nie, nie een van hulle val nie,
nie een loop en slaap nie, nie een maak sy belt los nie,
nie een se skoenveter breek nie.
28Hulle pyle is skerp,
hulle maak gereed om met pyl en boog te skiet.
Hulle perde se pote is so hard soos klip,
die wiele van hulle oorlogkarre draai soos warrel-winde.
29Die vyande is soos leeus wat brul
en wat 'n dier vang en wegsleep,
en niemand kan die dier red nie.
30Wanneer die vyande daardie dag kom,
dan sal dit hard raas soos die see.
Die land Israel sal donker wees.
Die mense sal swaarkry.
Donker wolke sal kom, en dit sal donker word.

Currently Selected:

Jesaja 5: ABA

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy