Jesaja 26
26
Hierdie volk weet dat die Here hulle sal help
1Eendag sal die mense van Juda hierdie lied sing in hulle land. Hulle sal sê:
“Ons het 'n sterk stad.
Die Here het die sterk mure gebou
om ons te beskerm.
2Julle moet die poorte oopmaak
sodat die volk kan ingaan,
die volk wat doen
wat die Here wil hê,
die volk wat gehoorsaam is aan Hom.
3Hierdie volk weet
dat die Here hulle sal help.
U sal hulle laat rus en vrede vir hulle gee,
want hulle glo in U.
4Julle moet altyd in die Here glo,
want as julle by Hom is,
dan is julle by 'n rots
wat altyd vas staan.
5Die Here het ons vyande
laat afval van hulle hoë mure.
Hy het hulle stad en die hoë mure
afgebreek tot op die grond.
6Die mense wat hulleself nie kon help nie
en wat arm was,
trap nou op daardie stad.”
U sal oor ons regeer en vir ons vrede gee
7Die mense wat reg doen,
se pad is gelyk.
Here, U maak dit vir hulle
maklik om te lewe.
8Ons glo altyd in U,
ook wanneer U die Regter is.
Ons wil altyd u Naam noem
en U eer.
9Ek verlang na U met my hele hart,
ook in die nag,
en ek soek na U.
Wanneer U die Regter is
en U straf die mense,
dan leer U vir hulle om reg te lewe
op die aarde.
10Maar wanneer U goed is
vir die mense wat verkeerd doen,
dan leer hulle nie om reg te lewe nie.
Hulle hou aan om verkeerd te doen
en hulle sien nie
dat die Here die Koning is nie.
11U het u hand opgelig
om hulle te straf,
maar hulle sien dit nie.
Here, wys vir hulle
dat U lief is vir u volk.
Laat u vyande in die vuur brand
wanneer U kwaad word,
sodat hulle sal weet
hulle kan self niks doen nie.
12Here, U sal oor ons regeer
en vir ons vrede gee,
want dit is U wat alles gedoen het
wat ons gedoen het.
13Here, ons God,
ander konings het oor ons regeer,
maar ons wil net ú Naam onthou.
14Die ander konings is dood
en hulle sal nie weer lewe nie.
U het hulle gestraf
en U het hulle laat sterf,
en niemand dink nou nog
aan hulle nie.
15Here, U het u volk baie laat word,
U het hulle baie laat word,
U het hulle land groter gemaak,
U het gewys U is die Koning.
Die mense wat aan U behoort, sal lewe
16Here, U het u volk gestraf,
en toe hulle swaarkry,
het hulle na U toe gekom,
hulle het gebid en gevra
U moet hulle help.
17Ons was soos 'n vrou
wat 'n baba kry,
dit was seer,
ons het baie pyn gehad.
Ons het gebid en gevra
U moet ons kom help.
18Ons liggaam het krom gebuig
soos 'n vrou wat 'n baba kry,
maar daar het nie 'n baba
uit ons gekom nie,
daar het niks uitgekom nie.
Daar het nie 'n redder
uit ons gekom nie,
en ook nie mense
wat op die aarde kan woon nie.
19Maar die mense
wat aan U behoort en wat gesterf het,
sal weer lewe.
Ja, julle wat nou dood is,
wat in die stof van die aarde lê,
julle wat daar in die doderyk is,
julle moet wakker word en juig,
want soos die dou uit die lug
die plante laat groei,
so sal die aarde
die mense wat gesterf het,
weer laat lewe.
Die Here sal nou die mense op die aarde straf
20My volk,
julle moet in julle kamers ingaan
en julle moet die deure agter julle toesluit.
Julle moet wegkruip
totdat die Here die ander mense
klaar gestraf het.
21Want die Here kom uit sy woonplek,
Hy sal nou die mense op die aarde straf
omdat hulle baie sonde gedoen het.
Die mense sal moet sê
dat hulle ander mense vermoor het,
hulle sal nie daaroor kan stilbly nie.
Currently Selected:
Jesaja 26: ABA
Highlight
Share
Copy
Want to have your highlights saved across all your devices? Sign up or sign in
© Bybelgenootskap van Suid-Afrika 2007. Gebruik met toestemming. Alle regte voorbehou.