Esegiël 22
22
Ek sal julle na al die kante toe jaag, tussen die ander volke in
1Ek het gehoor die Here sê vir my: 2“Mens, sal jy die bloedstad oordeel, die stad waar baie mense se bloed gevloei het? Sal jy die mense van die stad oordeel? Dan moet jy vir hulle vertel van al die slegte dinge wat hulle gedoen het. 3Jy moet sê: Die Here, Hy wat Here is, sê: Die mense in die stad het mense vermoor, en nou het die tyd gekom om hulle te straf. Hulle het afgode gemaak en hulle het onrein geword. 4Julle is skuldig, want julle het mense vermoor. Julle is onrein, want julle het afgode gemaak. Julle het self die dag laat nader kom wanneer Ek julle sal straf, julle het self julle dood nader gebring. Daarom gee Ek julle vir die ander volke in al die lande sodat hulle vir julle kan spot en vir julle kan lag. 5Die volke sal almal vir julle lag, die volke wat ver van julle is en die volke wat naby julle is. Julle het verkeerde dinge gedoen, en almal praat sleg oor julle, julle het wilde en verkeerde dinge gedoen. 6Die leiers wat oor Israel regeer, het sterk geword, maar toe het hulle mense vermoor, julle weet dit. 7Hulle het gemaak of die pa's en ma's by julle nie belangrik is nie, hulle het die vreemdelinge by julle verdruk en hulle het die weeskinders en die weduwees by julle laat swaarkry. 8Julle het gewys dat julle dink my gewyde dinge is nie belangrik nie, julle het my Sabbatdae ontwy. 9Daar is mense by julle wat sleg gepraat het oor ander mense sodat hulle moes sterf. Daar is mense wat op die berge offer-etes geëet het, daar is mense wat dinge gedoen het wat baie sleg is. 10Daar is mense wat by hulle pa's se vroue slaap en wat vroue verkrag, ook wanneer die vroue menstrueer en onrein is. 11Die een man doen slegte dinge met 'n ander man se vrou, die ander man doen dit met sy skoondogter en hy maak haar onrein, die ander man doen dit met sy halwe suster, sy pa se dogter. 12Daar is mense wat geld vat om mense te laat sterf. Daar is mense wat vir ander mense geld leen en wat dan sê dat die ander mense rente moet betaal, te veel rente. Daar is mense wat ander mense bedrieg en wat hulle goed vat. Maar vir Mý het julle vergeet.”
Dit het die Here gesê, Hy wat Here is.
13“Julle moet dit weet, Ek is verbaas en kwaad, want julle vat dinge wat nie aan julle behoort nie en julle vermoor mense. 14Die tyd kom wanneer Ek met julle sal doen wat Ek wil doen. Sal julle dan nog dink dat julle sterk is? Nee, Ek, die Here, het gepraat en Ek sal dit doen. 15Ek sal julle na al die kante toe jaag, tussen die ander volke in, en Ek sal julle in ander lande laat woon. Ek sal al die onrein mense wegvat uit Jerusalem. 16Al die volke weet dat julle julleself onrein gemaak het. Maar julle sal weet dat Ek die Here is.”
Ek sal julle saam laat brand in Jerusalem
17Ek het gehoor die Here sê vir my: 18“Mens, die volk Israel het vir My geword soos die skuim wanneer iemand silwer-erts smelt in 'n oond. Maar hulle is nie silwer nie, hulle is almal koper of tin of yster of lood.”
19Die Here, Hy wat Here is, sê: “Julle het almal soos skuim geword, daarom sal Ek julle nou in Jerusalem bymekaarbring. 20Ek sal julle daar bymekaarbring soos 'n mens silwer en koper en yster en lood bymekaargooi in 'n smelt-oond en vuur maak om dit te laat smelt. Ek sal julle in Jerusalem laat smelt, want Ek is kwaad vir julle, baie kwaad. 21Ek sal julle almal saam laat brand in Jerusalem, want Ek is kwaad, Ek sal julle laat smelt. 22Julle sal in Jerusalem smelt soos silwer smelt in 'n smelt-oond. Julle sal weet en voel dat Ek kwaad is vir julle.”
Israel is 'n land waar die mense nie meer rein kan word nie
23Ek het gehoor die Here sê vir my: 24“Mens, jy moet vir die land Israel sê: Israel, jy is 'n land waar die mense nie meer rein kan word nie. Die dag het gekom wanneer Ek hulle sal straf. Daar sal niks reën op jou val nie. 25Die leiers wat oor die land regeer, is soos leeus wat brul en alles doodbyt. Hulle het mense doodgemaak en hulle het die kosbare goed vir hulleself gevat, hulle het baie vroue in die land weduwees laat word. 26Die priesters het my wette verkeerd verduidelik. Hulle het my gewyde dinge ontwy, hulle het nie die gewyde dinge apart gehou van die dinge wat nie gewy is nie, hulle het nie vir die mense geleer wat is rein en wat is onrein nie. Hulle maak of die Sabbatdag dieselfde is soos 'n ander dag. Hulle dink nie meer Ek is heilig nie. 27Die amptenare in die land is soos wolwe wat diere doodbyt en hulle bloed laat vloei. Hulle vermoor mense om daardie mense se goed te kan vat. 28Die profete het nie gepraat oor die sonde van die mense nie, hulle het stilgebly daaroor. Hulle het gelieg en gesê Ek het vir hulle dinge gewys wat sal gebeur, hulle het gesê hulle weet dinge wat ander mense nie kan weet nie. Hulle het gesê: ‘Die Here, Hy wat Here is, sê dit,’ maar die Here het dit nie gesê nie. 29Die belangrike mense in die land het die mense bedrieg wat hulleself nie kan help nie en hulle het daardie mense se goed gevat. Hulle het slegte dinge gedoen aan arm mense, hulle het vreemdelinge verdruk en nie reg gedoen aan hulle nie. 30Ek het gekyk of daar iemand by hulle is wat die mense in die land kan beskerm, iemand wat voor My kan staan in hulle plek sodat Ek nie almal in die land sal doodmaak nie. Maar Ek het nie so 'n persoon gekry nie. 31Daarom het Ek hulle gestraf. Ek was kwaad en Ek het hulle laat sterf. Ek het hulle gestraf oor die dinge wat hulle gedoen het.”
Dit het die Here gesê, Hy wat Here is.
Currently Selected:
Esegiël 22: ABA
Highlight
Share
Copy
Want to have your highlights saved across all your devices? Sign up or sign in
© Bybelgenootskap van Suid-Afrika 2007. Gebruik met toestemming. Alle regte voorbehou.