Yohan 1
1
Liboe le lizɛki ligbã́ nɛ
1Ní okpese kɔ ɛ, Liboe le lize; Liboe le lize nì Aya, lɛ Liboe le linu Aya a. 2Dɔni kelea okpese kɔ ɛ, eze nì Aya. 3Aya abitɛ kidɔ kakaa gani yɛ aʋa; kididɔ kíma gi bɛbitɛ ɛ, xe óze lɛ mɛ ɛ. 4Ligbã́ nɛ lize yɛ mɛ, lɛ ligbã́ nɛ, lɛ lize kuklekleo ki banima a. 5Kuklekleo kwikle ku ní litumu ne me, lɛ litumu ne lítani kɔ aʋa ku ŋa a.
6Aya akpɛ yɛ ɔxwɛdzɛ gi bizɛxwa si Yohanes, 7aba ŋwisi katsalia ɔŋaŋa kinɛ tɔ ɔdra kuklekleo su, tɔ gani yɛ aʋa ɛ, ɔnɔ kakaa aanu liboe le tɔ aazi ŋa. 8Aní yɛ ɔtutɔ eze kuklekleo o; kiba aba si yidra kuklekleo su u. 9Kuklekleo ɔtutɔ lɔ gi kuzekle kí banima petee e, kwitra ba kelea mɛ.
10Aba kelea mɛ, pɔ gi Aya abitɛ kelea gani yɛ aʋa fɛ ɛ, kelea kámɔ yɛ egyesi i. 11Aba yɛ ɔtutɔ yɛ akɔanɛ ma klɔ, pɔ̀ yɛ ɔtutɔ yɛ akɔanɛ ma bázɛ yɛ ɛ. 12Pɔ̀ banɔaklɔ petee gi bɛzi yɛ ɛ, xe bɛzi yɛ linyi ne aʋa ɛɛŋa ɛ; ba ko akpɛ kigaglaɛ si bedzi Aya yɛ bebi. 13Bédzi Aya yɛ bebi gani kipɔpɔ mɛ ɛ, loo onyime ni ɔdzɛ ba kutrɔtrɔ mɛ, loo gani obika yɛ kupɛpɛ mɛ; Aya ɔtutɔ onu ba Ɔka.
14Liboe le lidzi ɔnɔ gi eyi nì lipomepɛpɛ ni anukwarɛ ɛ, lɛ eze ní blɔ kusi i. Kwimɔ yɛ kuklekleo, kuklekleo liɔ klɔ gi azɛ ŋwisi Yɛka yɛ obinyime tolee kinɛ ɛ,
15Gi Yohanes amɔ yɛ ɛ, apani ní yɛ su nì ozi si, “Yɛ onu Ɔniliɛ su gi mapani si, ‘Yɛ aaba mɛ kede e, pɔ̀ emu asani mɛ ɛ, lɛ ese linu si ɔlɛ xe bɛpɔ mɛ ɛ.’” 16Lipomepɛpɛ lɛ kusrɛsrɛɔ ní yɛ mɛ loso e, akrira blɔ petee, lɛ aki blɔ kukrira trɔ kukrira aʋa a. 17Aya akí Ɔsã nɔ gani Mose aʋa, pɔ̀ lipomepɛpɛ ni anukwarɛ kɔ ɛ, Yesu Kristo aʋa biga edo. 18Ɔnɔnɔ ɔ́mɔ Aya ʋídi i, Yebinyime tolee, gi ɔʋífili ní Yɛka su i, yɛ ebu Ɔka yɛ abasi blɔ.
Yohanes Kuni yo Ɔkpɛkpɛɛ apani si aní yɛ yenu Kristo ye
19Lɛ ya linu Yohanes yɛ liboe me dradra lɛ, gi Yudanɛ ma baka ba ní Yerusalem bɛkpɛ kusumu yo bakaatɔ ni Lewianɛ batɔ ní Yohanes klɔ tɔ beʋi ye si, Nyaŋwɛ onu u? 20Yohanes ógbe liboe le onu kubúbú, pɔ̀ apani wee lɛ adra lɛ mɛ si, “Aní mɛ menu Kristo ye e.”
21Lɛ beʋi ye si, “Kɔlɔ nyaŋwɛ wònu, wɔ wonu Eliya na a?” Yohanes ebu le onu si, “Owo aní yɛ menu u,” lɛ beʋi si, “Aya yɛ oboedoplɛ wònu na a?” Ebu le onu si, “Owo.” 22Gɔgɔɛ beʋi ye si, “Kɔlɔ si blɔ ɔniliɛ gi wonu i, lilɛ si kuzɛ kunububu tsini banɔaklɔ gi bɛkpɛ blɔ ɛ. Liboe woli wɔɛpani ní isu ya su na a?”
23Yohanes ebu le onu nì Aya yɛ oboedoplɛ Yesaya liboe le si, “Mɛ menu ɔniliɛ gi yɛ ole lo eeyì ní ɔyaya klɔ si, ‘Mlebu kude gyɔgyɔ akí Ɔkaɛ tɔ ɔga!’ ” 24Farisianɛ bɛ kpɛ banima, 25lɛ beʋi Yohanes si, “Xe ani wɔ́ wonu Kristo ye e, loo Eliya, loo Aya yɛ oboedoplɛ ɛ, kɔ ege loso wuzɛɛkpɛ kuni iiki banima a?”
26Yohanes ebu le onu si, “Mɛɛkpɛ kuni iiki banima, pɔ̀ ɔnutɔ ɔlɛ ní mlɔ kusi gi mléte e. 27Yɛ atrába ní mɛ kede, pɔ̀ mégyeno gi maable yɛ afɔkpa ʋa igbé ne e.”
28Eboa la ya petee ɛba la mɛ ní Betania ní Yordan onipe lo oge lɔ kɔlɔ, niklɔ gi Yohanes azaakpɛ kuni yo aki banima ɛ.
Yesu yɛ onu Aya Yɛ keʋesibi ya
29Keletitia ɛ, Yohanes amɔ Yesu gi atrába yɛ ɔza lɔ ɛ, lɛ apani si, “Mledi imɔ Aya yɛ Keʋesibi ya gi akɔ̀ akɔ si kiakɔ kelea mɛ eboe zimizi na sɛnɔ ɛ. 30Yɛ onu ɔniliɛ klɔ su gi mapani si, ‘Onyime ɔtɔ atrába ní mɛ kede e, gi ekeme asani mɛ ɛ, lɛ ese linu si ɔlɛ xe ableke bɛpɔ mɛ ɛ.’ 31Mɛ ɔtutɔ méte ɔniliɛ klɔ gi onu u, pɔ̀ kidiliɛ loso gi maba si míkpɛ kuni iiki banima ɛ, kɛ kinu si tɔ mikɔ ebu ye basɛ Israel banɛ ma.”
32Lɛ Yohanes adra Yesu su si, “Mamɔ Ɔfuɛfuɛ nɔ gi eeple ŋwisi abronuma kinɛ ɛ, dɔni lifunu ne lɛ eze yɛ aʋa ɛ. 33Nya mátrate yɛ, pɔ̀ Aya a, gi yɛ akpɛ mɛ si mikpɛ kuni yo aki banima ɛ, apani asi mɛ si, ‘Wɔtramɔ Ɔfuɛfuɛ nɔ gi eeple dɔ onyime ɔtɔ aʋa ɛ; yɛ onu ɔniliɛ klɔ gi aakɔ̀ Ɔfuɛfuɛ Dradra lɔ kpɛ kuni kí banima a.’ 34Lɛ Yohanes apani si, Mamɔ lɛ, lɛ mɛɛdra lɛ mɛ ɛsi mlɔ si yɛ onu Aya Yebinyime e.”
Yesu Yɛ badɔkpasi tɔpu ba
35Agi kelea kɛti i, Yohanes alɛ ní klɔ dzɛ nì yɛ badɔkpasi tiaʋa, 36Gi amɔ Yesu gi azɛɛza ɛ, apani si, “Mledi, Aya yɛ Keʋesibi ya!”
37Lɛ gi Yohanes yɛ badɔkpasi tiaʋa ba benu yɛ liboe le e, bekuni Yesu kude e. 38Gi Yesu ekyi xe amɔ si bali ni yɛ kude e, eʋi ba si, “Ege mlɛpɛ ɛ?” Bebu le onu si, “Rabi” Lɛ ese linu si Ɔdɔbasɛ yɛ “Nifɔ onu wɔ oze klɔ ɔ?”
39Lɛ Yesu ebu le onu si, “Mlaga di,” bize ŋwisi kemize inyɔ tine me kinɛ ɛ, Lɛ yɛ ni ba bɛtrɛ xe bɛzɛ mɔ niklɔ gi Yesu eze e, lɛ beze ní yɛ su kele gɔgɔa petee e.
40Ba mɛ tole gi enu Yohanes yɛ liboe le e, xe eze ni Yesu kude e, yɛ eze Andrea Simon Petro yeneminyime. 41Lɛ onu klɔ ʋa ɛ, apɛ́ yeneminyime Simon amɔ, lɛ asi yɛ si, “Kwimɔ Mesiya yɛ.” Le ese linu si, “Kristo ye.”
42Lɛ Andrea agbani Simon amani Yesu i. Yesu edi ye lɛ apani si, “Wɔ linyí linu si Simon, Yohanes Yebi, pɔ̀ biaxwa wɔ si Kefas.” Gi lɛ ese linu si Petro gi lɛ ese ní si Hela sɛ mɛ linu “liklakpɔ ɔ.”
Yesu axwa Filipo ani Natanael
43Agi kelea kɛti i, Yesu atrɔ si yɛ atrɛ ní Galilea. Amɔ Filipo lɛ asi yɛ si, “Kuni mɛ kude!”
44Filipo adɔ́ Betsaida, ɔma lɔ klɔ mɛ gi Andrea ni Petro bɛdɔ ɛ. 45Filipo amɔ Natanael lɛ asi yɛ si, “Kwimɔ ɔniliɛ klɔ su gi Mose aŋwlimi akpɛ ní Ɔsã nɔ keplekpaa mɛ ɛ, xe Aya yɛ beboedoplɛ ba fɛ bɛŋwlimi plɛ ɛ. Yɛ onu Yesu Nazaret ɔnɛɛ, Yosef yebinyime.” 46Lɛ Natanael eʋi si, “Kidɔ gbã ɛtɔ kíatani kudɔ ní Nazaret na a?” Lɛ Filipo ebu le onu si, “Ga ba tɔ ga di,” 47Agi Yesu amɔ Natanael gi atrába yɛ klɔ ɛ, apani yɛ su si, “Israel obi ɔtutɔ iliɛ ya; asia áma yɛ mɛ ɛ!”
48Lɛ Natanael eʋi Yesu si, “Kitɛ mɛ wote me e?”
Yesu ebu le onu si, “Mamɔ wɔ gi woze ní ogbose lo ese e, xe ableke Filipo axwa wɔ ɔ.” 49Natanael ebu le onu si, “Rabi, wɔ́ wonu Aya Yebi ye! Wɔ́ wonu Israel Okusi ye!”
50Lɛ Yesu apani si, “Wɔziŋa gi masi wɔ si mamɔ wɔ ní ogbose lo ese e? Wɔtramɔ eboe gi ekeme sani lɛ ya a!” 51Lɛ atrɛ lɛ aʋa si, “Sugba mɛɛsi mlɔ si, mlɛtramɔ lifunu ne si lidra lɛ Aya yɛ baxwɛdzɛ ba gi beemu u, xe beeple dɔ ní Ɔnɔɛ Yebi ye aʋa a.”
Currently Selected:
Yohan 1: avn
Highlight
Share
Copy
Want to have your highlights saved across all your devices? Sign up or sign in
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc