Luka 24
24
Yesu yɛ Kuyɔyɔ Dɔni Bekpo ʋa mɛ
1Lipadzruwe le olezatɔ nɔ ɛ, badzɛ ba bɛtrɛ ní ɔdrɔ lɔ sú, bevu bawá flafla ʋa gi bɛbitɛ ɛ. 2Bɛmɔ si bemli likla nɛ za nɔ ní ɔdrɔ lɔ onu, 3Pɔ̀ gi beti eku i, bámɔ Ɔkaɛ Yesu yɛ okpo ye. 4Agi bɛlɛɛ ɛ, xe bezee bù lɛ su i, bɛmɔ benyime tiaʋa gi balɛ ní ba su ní ewu klekle me e. 5Lifu liku badzɛ ba lɛ gi bɛbubɔ ɔ, xe bɛ kpɛ aŋu na mɛ kesea ɛ, benyime ba beʋi ba si “Ege lɛ loso mlɛɛpɛ ɔnɔ gbagbe ní bekpo ʋa kusi i? 6Ɔ́ma ní ya; ayɔ. Mlaplɛ aŋu sì asi mlɔ ní Galilea si; 7‘Biakɔ Ɔnɔɛ Yebi ye kí banɔ zimizi ba, tɔ beku ní ose lo su, lɛ ní ewe tata kede e aayɔ dzi ligbã.’ ”
8Lɛ badzɛ ba bɛplɛ aŋu ní yɛ eboe la aʋa ɛ. 9Agi bedzi dɔni ɔdrɔ lɔ su i, bɛzɛɛsi badɔkpasi liɔfɔ ni tole ba ni banɔ gɔgɔ ba pɔ́ eboa la petee gi bɛmɔ ɛ. 10Badzɛ ba klɔ beze Maria Magdaladzee nì Yohana nì Maria gi onu Yakobo yene e ani badzɛ gɔgɔa ba gi bɛpɔni ba ɛ, ba bɛsi banɔxwaxwa ba eboe la petee. 11Pɔ̀ banɔxwaxwa ba bɛkɔ lɛ si eboa la gi badzɛ ba bɛpani i, enu anukpadzeboe lɛ loso bázɛ ba aʋa aŋa a. 12Pɔ̀ Petro ayɔ lɛ ese atrɛ ní ɔdrɔ lɔ su i: abùbɔ edi pɔ̀ basa ʋa gi bɛxla yɛ ɛkpɛ tètè ko amɔ ɔ. Lɛ edzi atrɛ ní kepea mɛ gi azeegyo o liboe lɛ gi liba lɛ mɛ edi i.
Badɔkpasi Tiaʋa Bɛmɔ Yesu Ní Emaus Kudeo me
13Ní liwe lɛ klɔ ke aʋa ɛ, banɔ tiaʋa gi beze ni Yesu kude e, bɛzɛɛtrɛ ní Emaus kamamia tɔ mɛ, ŋwisi itiplɛkɔ tigloele dɔni Yerusalem. 14Bɛzɛka sika ní eboa la gi ɛba la mɛ su u. 15Agi bezevu eboe la edi nì ba ahanuglɔ ba ɛ, Yesu ɔtutɔ lɔ eti apɔni ba lɛ azɛɛga ni ba ɛ, 16bɛmɔ yɛ pɔ̀, bamɔ yɛ egyesi i. 17Yesu eʋi ba si, “Liboe woli su mlɛpani gi mlɛtrɛ ɛ?” bɛlɛɛ zĩi ní asigaga mɛ ɛ. 18Bamɛ tole gi bizɛxwa si Kleopa ɛ, eʋi ye si “Wɔ tètè ko wonu ɔbabaɛ ni Yerusalem gi óte eboa la gi ɛba lamɛ ewe ala ya mɛ lo o?”
19“Eʋi ba si eboe woli i?”
Bebú le onu si, “eboa la gi ɛba Yesu u, gi ádɔ Nazaret aʋa ɛ.” “Onyime liɛ ya eze Aya yɛ oboedoplɛ, lɛ Aya ni banima pɔ́ bɛkɔ yɛ si onu ɔnɔ gagla ni liboe kakaa gi edo o, ni kidɔ kakaa gi abitɛ mɛ ɛ. 20Blɔ kusumu yo baka ba ni baʋaŋa ba bɛkɔ yɛ ɛkɔ tɔ batsà kutsépia aki yɛ tɔ bekú ye ní ose lo su. 21Blɔ kugyodi yo kwize si yɛ atrábu Israel. Kɔpɔnɔ ɛ, omono liwe tanɛ gi eboa la ɛba lamɛ ɛ. 22Kɔ sanɔ ɛ, badzɛ batɔ ní blɔ kusi bɛmani liboetɔ gi litu blɔ kugyɔ ɔ, bɛpiɔ ɛtrɛ ní Yesu ɔdrɔ lɔ su, 23pɔ̀ bámɔ yɛ okpo ye e. Bedziba ɛsi blɔ si bɛtsani bidɔ; Bɛmɔ Aya yɛ baxwɛdzɛ ba gi bɛsi ba si ɔlɛ ligbã́ a. 24Blɔ iha lɛ itɔ idzɛ ɔdrɔ lɔ su lɛ izɛmɔ kiliɛ ɖii gi badzɛ ba bɛpani i, pɔ̀ bámɔ yɛ ɛ.”
25Lɛ Yesu asi ba si, “Kitɛ xe mlɛdɔ kuga nite e, lɛ kitɛ xe mlɔ begyodi ʋa bɛyɔ ní beboedoplɛ ba eboe la aʋa kuziŋaa su u? 26Kɔ líziã si Kristo ye ɔmɔ ɔziã nɔ tɔ lɛ kede e, aatiku ní yɛ Kusudraa mɛ na a?” 27Lɛ Yesu ebú eboa la gi bɛŋwlimi ní yɛ su ese aki ba dɔnɔ ní liboe le petee me e. Ekpese adɔ nɔ ní Mose kuplekpaa ni beboedoplɛ ba petee bidɔ ŋwlimiŋwlimi ʋɛ mɛ ɛ.
28Agi beti apɔni kamamia lia mɛ gi bɛtrɛ ɛ, Yesu abitɛ ŋwisi kitsa ɛtsa eza a. 29pɔ̀ bɛtrɔ awla ní yɛ aʋa si “Ze ní blɔ su; kelea keeblo lɛ litumu ne liidɔ ɔ.” Lɛ loso e, eti eku ni ba lɛ eze ni ba su i.
30Gi beze ní ɔdɔŋakplɔ nɔ su i, akɔ liklã̀ nɛ lɛ akrira lɛ ɛ, lɛ kede e, ayaʋi lɛ lɛ akɔ lɛ aki ba ɛ. 31Lɛ ba aŋu na ɛdra ɛ, xe bɛmɔ yɛ egyesi i, ko lɛ alila ní ba aŋu na mɛ ɛ. 32Beʋi ba ahanuglɔ ba si “dani lize ŋwisi kifu kizɛsɔ ní blɔ mɛ ɛ, gi azeegu kunugu yo aki blɔ ní kudeo aʋa a, xe azeebu kudɔŋwlimi yɔ ese akí blɔ ɛ?”
33Bɛyɔ kyɔŋ lɛ bedzitrɛ Yerusalem i, niklɔ bɛmɔ badɔkpasi liɔfɔ ni tole ba gi bɛkpɛ likpɔ ni banɔ gɔgɔ ba ɛ. 34gi bɛpani si, “Ɔkaɛ anya yɔ! Ebú isu abasi Simon!”
35Lɛ banɔ tiaʋa ya kyɛ ɛ, bɛdra lɛ su si ba kidiliɛ gi kiba kɛ mɛ ní kudeo aʋa ɛ, nì kiliɛ gi bɛmɔ Ɔkaɛ gyesi gi ayaʋi liklã̀ nɛ aki ba ɛ.
Yesu Ebu Isu Abasi Yɛ Badɔkpasi ba
36Agi banɔ tiaʋa ba ya bɛzɛɛsi ba eboa la ya ɛ, Ɔkaɛ ɔtutɔ alɛɛ ní ba kusi lɛ asi ba si, “Kusuyɔ kimlɔ.”
37Besugu, lɛ lifu liku ba lɛ begyodi si bɛɛmɔ okpo. 38Pɔ̀ asi ba si, “Ege nì lifu mlese e? Ege lɛ loso mlaʋízi liboe lɛ ya aʋa ɛɛŋa a? 39Mledi mɛ kuwla mɛ ni mɛ kuklikpɔ, tɔ mlete si mɛ ɔtutɔ. Mlagbɔni mɛ edi, lɛ ese linu si kigyɛ ni axwa aʋíze okpo su ŋwisi kiliɛ gi mlɛmɔ si bilɛ mɛ su u.”
40Gi apani ní te e, abasɛ ba yɛ kuwla mɛ ni yɛ kuklikpɔ ɔ. 41Kɔkpɛ gi liboe le litu ba kugyɔ ɔ, xe liku ba isami lɛ loso e, bázɛ lɛ aʋa aŋa dzɛ si yɛ, lɛ eʋi ba si, “kiŋaŋa ɛtɔ kilɛ ní mlɔ awla gi biaŋa na a?” 42Bɛki yɛ likpaa gi bɛpɔʋi i, 43lɛ azɛ lɛ xe ata nɛ ní ba aŋu mɛ ɛ.
44Lɛ asi ba si, “Eboa la ya ɖii masi mlɔ gi meze ní mlɔ kusi i: kidɔ kakaa gi bɛŋwlimi ní mɛ su u ní Mose Isã nɛ mɛ nì, beboedoplɛ ba bidɔ ŋwlimiŋwlimi ʋɛ, anì Psalomo ba kuplekpaa mɛ ɛ, lilɛ si kiba kɛ mɛ.”
45Niklɔ adra ba begyodi ba mɛ tɔ benu kuŋwlimi yɔ ese. 46lɛ asi ba si, “Eboa la ya bɛŋwlimi plɛ si: Kristo ye aamɔ kini, lɛ aayɔ dɔni bekpo ʋa mɛ ní ewe tata kede e, 47lɛ ní yɛ linyi ne me e, ɔna mɛ kukyikyi ni kesetata kukɔkyɛ biasɔ̀li bɛ kí kese kakaa, bia kpese dɔni Yerusalem. 48Mlɔ mlenu katsalia aki eboa la ya. 49Lɛ mɛ ɔtutɔ maatsísi mlɔ Ɔfuɛfuɛ dradra lɔ ŋwisi kiliɛ gi mɔka aka aplɛ kinɛ ɛ. Pɔ̀ lilɛ si mleze ní ɔma ʋidi lo me kɔzɛna ni lipoe lɛ gi kigaglaɛ kiadɔ ní lifunu ne xe kiaba mlɔ aʋa ɛ.”
Befeke Yesu i tsini Lifunu ne
50Gi agbani ba edono ní ɔma ʋidi lo me atsini Betania ɛ, emuni yɛ iwla lɛ lɛ akrira ba ɛ. 51Gi azɛɛkrira ba ɛ, asɛ ní ba su lɛ befeke ye tsini lifunu ne e. 52Besumu ye, lɛ bedzitrɛ ní Yerusalem ni isami glegle e. 53Nite si beze Lisɔligba lɛ mɛ lipoe glegle gi bezee do Aya ɖase e.
Currently Selected:
Luka 24: avn
Highlight
Share
Copy
Want to have your highlights saved across all your devices? Sign up or sign in
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc