Hebr 5

1Kusumu yo Ɔka ʋidi kakaa, gi bebu idɔnɔ ní banima kusi i, bedu ye si oze ní ba onu tɔ osumu Aya tɔ ɔki Aya bidɔ pɔʋi pɔʋi ni bidɔ kɔkɔ ní ba eboe zimizi na litukpo. 2Agi yɛ ɔtutɔ kyɛ ebotso ní bede glegle me e, aatani litɔ kuplɛ kese ki banama gi báʋite e, xe bizɛɛta kese e. 3Lɛ loso gi ebotso e, lilɛ si ɔpɔʋi bidɔ ɔki Aya aní ní banima eboe zimizi na tètè loso o, pɔ̀ ki yɛ ɔtutɔ yɛ eboe zimizi na kyɛ loso o.

4Lɛ ɔnɔnɔ ɔ́ʋikya kusumu yo Ɔka ʋidi ye yɛ kubùbù yo ɔki isu u, Aya ko izɛɛxwa ɔnɔ si oze kusumu yo Ɔka ʋidi ŋwisi kiliɛ gi axwa Aron kinɛ ɛ. 5Nite ke Kristo fɛ ɔ́kɔ kubùbù yo ɔ́ki isu ya ŋwisi kusumu yo Ɔka ʋidi kinɛ ɛ, boŋu i, Aya asi yɛ si,

“Mɛ obi wonu;

Omono e, medzi wɔ Ɔka.”

6Apani ní ɔkɔ dzedze kyɛ si,

“Wɔaze kusumu yo Ɔka kɔtsinɔ kanɔmɛ anɔmɛ

ŋwisi kiliɛ gi Melxizedek eze kinɛ ɛ.”

7Ni yɛ kesea aʋa ligbã́ nɛ mɛ ɛ, Yesu azaaxwa Aya lɛ azɛɛkɔ yɛ beʋiʋi ʋa aki yɛ ni ozi gagla ni kube e, gi yɛ aatani yɛ kubu dɔni kutse me e. Lɛ gi abùbɔ isu ya a, xe ɔkɔ kubùbù aki yɛ onu i, Aya ata yɛ kutu. 8Lɛ gi onu Aya Yebi kyɛ ɛ, akpasi kutununu gani yɛ ɔziã nɔ gi amɔ ɛ, mɛ. 9Lɛ gi abitɛ kidɔ kakaa a, gi lilɛ si ɔbitɛ pɔ́ ɛ, edzì ɔniliɛ gi yɛ aʋa liga a, xe kwimɔ ligbã́ moblo le, blɔ banama petee gi kuzeenu kutu ki yɛ ɛ. 10Lɛ Aya axwa yɛ si yɛ onu kusumu yo Ɔka ʋidi ye ní kudeo liɔ aʋa gi Melxizedek eze ŋwisi kusumu yo Ɔka kinɛ ɛ.

Mlakídzɛ kede ní kuziŋaa su

11Eboe glegle alɛ gi kwiapani ní liboe lɛ ya su u, pɔ̀ lɛ ese kununu yo kwiazee gagla ki mlɔ ɔ, lɛ ese linu si mlaʋítani eboe la ese kunu kise ise. 12Lɛ ese linu si nya lipoe le lina gi lilɛ si mledzi badɔbasɛ xe e, pɔ̀ mledzizia si ɔnutɔ ɔbasɛ mlɔ eboe tɔpu na ní Aya yɛ Liboe le su dzɛ ɛ. Gi nya mlaazɛŋa bidɔ nyipu abla ɛ, mledzizia kumwani yɔ dzɛ. 13Lɛ ese linu si ɔnɔ kakaa gi izɛɛmwa ɛ, odzi onu obivigye lɛ ɔ́ʋina niklɔ gi aanu kudɔbasɛ yɔ ní kiliɛ gi aaze ligbã́ ní kude gyɔgyɔ aʋa su u. 14Pɔ̀ bidɔ nyipu ʋe e, bilɛ ɛki banɔtsitsi ba gi gani eboa la mɛ gi bɛɛga mɛ ɛ, xe bɛzɛɛkɔ ehe isu ya lipoe kakaa ɛ, betè lidzegaga ní eboe gbã ni eboe zimizi kusi.

Currently Selected:

Hebr 5: avn

Highlight

Compare

Copy