Hebr 4

1Lɛ loso gi Aya yɛ kakaplɛa kedzia lɛ si kwiatiku ní yɛ kusuyɔɔ mɛ ɛ, mlaki tɔ kudi isu aʋa mumɔ, tɔ likíbase si mlɔ mɛ ɔtɔ ebu isu ní lɛ mɛ ɛ. 2Lɛ ese linu si bɛpani Liboe Gbã nɛ si blɔ fɛ, ŋwisi banɔ baklɔ ba ke; pɔ̀ liboe le gi benu i, líbu libiitɔtɔ ɛki ba banɔ baklɔ, lɛ ese linu si banama gi benu le e, bákɔ kuziŋa apɔni lɛ ɛ. 3Lɛ loso blɔ banama gi kwizi ŋa ɛ, kwiatiku kusuyɔ liɔ klɔ mɛ, ŋwisi kiliɛ gi Aya aka aplɛ ɛ si, “Lilɛ ko ŋwisi kiliɛ gi maka kitamu yɛ ní mɛ kusuyeʋio mɛ si; ‘batrátiiku ní mɛ kusuyɔɔ mɛ liwewe.’ ” Pɔ̀ kyɛ Aya yɛ lixwɛ nɛ liblo dɔni kelea okpese klɔ ke. 4Lɛ ese linu si bɛpani ní yɛ Liboe le kapɛ katɔ mɛ ní liwe gloele liwe le su si, “Lɛ ní liwe gloele aʋa ɛ, Aya eze amɔni ní yɛ axwɛ na petee me e.” 5Lɛ bɛpani niklɔ dzɛ si, “batrátiiku ní mɛ kusuyɔɔ mɛ liwewe e.”

6Kudeonu kudzi ulɛ ki banɔ batɔ si beti iku ní kɔ mɛ, Pɔ̀ banama gi beedo Liboe Gbã nɛ ese kpɛ ɔtɔ ɛ, bázɛ kuzemɔni yɔ kɔkpɛ gi bénu kutu loso o. 7Lɛ loso Aya atrɔ liwe dzedze dzɛ gi bɛxwa si omono o, gi ní lipoe gblamadzaɛtɔ kede e, apani lɛ su agani Dawid aʋa ní Aya Liboe le kapɛa lia su gi kwipani kooko si i;

“Omono xe mlenu Aya yɛ ole lo e,

mlɔ ina nɛ mɛ ikíze gagla a.”

8Xegi nya Yosua aki ba kuzemɔni uliɔ ya ɛ, nya Aya ɔ́trapani lɛ kede ní liwe dzedze etɔtɔ su tɔɔ ɔ. 9Lɛ loso Lizemɔniwe lilɛ ɛki Aya yɛ banima. 10Lɛ ese linu si banɔ baklɔ gi bɛzi kuzemɔni uliɔ klɔ ɔ gi Aya aka aplɛ ɛ, biazemɔni ní batutɔ axwɛwawa la mɛ ŋwisi kiliɛ gi Aya eze amɔni ní yɛ ani na mɛ kinɛ ɛ.

11Lɛ loso e, mlaki tɔ kuga kude kakaa onu tɔ kutiku ní kuzemɔni uliɔ klɔ mɛ tɔ blɔ mɛ ɔnɔnɔ ɔkido ní lɛ mɛ ŋwisi banɔ baklɔ ba kɔkpɛ ba kutu gaglaa loso o.

12Lɛ ese linu si Aya yɛ Liboe le lilɛ ligbã́, lɛ lizɛwa lɛ axwɛ na kise ise, lɛ lilɛ nunu isani ihɛ inugu tiʋa kakaa a. Lɛ lizɛɛtsa bidɔ ɛtsinɔ kimɛ ɛmɛ ke, kɔzɛna ni esobo la ni Ɔfuɛfuɛ nɔ ɔtsaklɔ, ani axwa la ni kumu yɔ itsaklɔ ke e. Lɛ Aya yɛ Liboe le lizɛɛxwa etsi ni ɔna nɔ mɛ bapɛ́pɛ ʋa ni begyodi ʋa kyɛ ɛ. 13Kidɔbitɛbitɛ ɛtɔtɔ kítratani kukpo ní Aya aŋu mɛ ɛ, kidɔ kakaa gi bɛbitɛ ɛ, kifini liya lɛ kifini ni yɛ aŋu mɛ ɛ. Lɛ yɛ blɔ petee kwitraki akɔnta ni isu ya su ikɔ ɔ.

Yesu yɛ onu blɔ Kusumu yo Ɔka ʋidi ye

14Lɛ loso gi kusumu yo Ɔka ʋidi ye e, gi ɔlɛ ní blɔ awla a, yɛ atrɛ ní bekpo ʋa mɛ xe atrɛ ní lifunu ne ní Aya aŋu mɛ ɛ, Yesu Aya Yebi ye, mlaki tɔ kuvù blɔ kuziŋaa liɔ gi kwibasɛ banima ɛ mɛ gaglaa. 15Lɛ ese linu si aní Ɔka ʋidi gi ɔ́tranu kuyeʋiyeʋi kí blɔ kubotsobotsoo ɔlɛ ní blɔ awla a, boŋu i, onu kusɔliɔ Ɔka ʋidi gi befeke ye edi gani kude kakaa onu ŋwisi kiliɛ gi bizeefeke blo edi kinɛ ɛ, pɔ̀ eboe zimizi eze ní yɛ su u. 16Lɛ loso e, mlaki si ɔna oze ní blɔ lipo atɔ kutipɔni Aya yɛ lipomepɛpɛ nɛ likusigbo le, tɔ blɔ ɔwla lɔ ɔka yɛ asigagadidi la, atɔ kwiamɔ yɛ lipomepɛpɛ nɛ gi liapɔni blɔ ɔ, xe kwizia yɛ kupɔnɔ ɛ.

Currently Selected:

Hebr 4: avn

Highlight

Compare

Copy