Galatia 1

1Keplekpa lia kɛdɔ ní mɛ Paulo gi menu ɔnɔ kpɛkpɛ kɔ ɔ. Mɛ kuxwaxwa si midzi ɔnɔ kpɛkpɛ ɛ, kúdɔ ɔnɔ gbagbe kɔ loo gani ɔnɔ gbagbe aʋa a, pɔ̀ kwidɔ ní Yesu Kristo ni blɔ Ɔka Aya a, gi ayɔni Kristo adɔ ni bekpo ʋa mɛ kɔ ɔ. 2Benemi ba pɔ́ niya a, bɛkpɛ likpɔ ni mɛ, xe kwiŋwlimi keplekpaa lia ya ɛki isɔliha lɛ ní Galatia kesea mɛ ɛ.

3Maxwa Aya blɔ Ɔka ní blɔ Ɔkaɛ Yesu Kristo tɔ baki mlɔ lipomepɛpɛ ni kusuyɔ.

4Kristo akɔ yɛ isu akɔ ní blɔ eboe zimizi na litukpo gi ayurɔ yɛ isu ya akpɛ ní blɔ Ɔka Aya kupɛ́pɛɔ ese e, tɔ yiki blɔ ɔwlamɔmɔ dɔni lipoe zimizi i lɛ ya mɛ. 5Atɔ mlaki tɔ kukpɔ̀ Aya dɔni kanɔmɛ tsini kanɔmɛ! Tɔ liba lɛ mɛ.

Liboe Gbã dzedze etɔtɔ líma

6Litu me kugyɔ si ní lipoe kpekpemi lɛ ya mɛ ɛ, mlɛyurɔ Aya gi yɛ axwa mlɔ gani Kristo yɛ lipomepɛpɛ nɛ mɛ ɛ, lɛ mlɛzi kudɔbasɛ dzedze ko e, 7gi ní anukwarɛɛ mɛ ɛ, línu Liboe Gbã. Pɔ̀ lɛ mɛ lidra si banɔ batɔ balɛ gi bɛɛpisa mlɔ ɔ, lɛ beekeni idi tɔ beekyi Kristo yɛ Liboe Gbã nɛ ɛ. 8Pɔ̀ xe blɔ ɔ, loo ɔxwɛdzɛ dɔni lifunu ne aasɔli Liboe Gbã dzedzeetɔ ki mlɔ sani liboe lɛ gi kwisi mlɔ ɛ, tɔ bebu ye lipɔ tratratra, tɔ bakɔ yɛ akpɛ ní kifumoni ye me e! 9Kwipani lɛ edi, lɛ mɛɛpani lɛ abla dzɛ si: xe ɔnutɔ aasɔli Liboe Gbã dzedze ki mlɔ sani lɛ klɔ gi mlɛnu u, xe mlɛzɛ ɛ, atɔ bebu ye lipɔ tratratra tɔ bakɔ yɛ akpɛ ní kifumoni ye me e!

10Kibasɛ libasɛ si mɛɛpɛ si miku ɔnɔ gbagbe loo Aya liŋu na a? Aloo kipɛ mɛɛpɛ si miku banima aŋu na a? Xe nya mapɛ si miku banima aŋu i, mátraze Kristo yɛ ɔnɔsumu u.

Kiliɛ gi Lize xe Paulo Edzì Ɔnɔ kpɛkpɛ ɛ

11Mɛ benemi ba, mlaki tɔ misi mlɔ si, Liboe Gbãɛ nɛ gi masɔli i, lídɔ ɔnɔ kɔ ɔ. 12Mázi lɛ adɔ ni ɔnɔ gbagbe ɔtɔtɔ kɔ ɔ, lɛ ɔnɔnɔ ɔ́basɛ mɛ ɛ. Boŋu Yesu Kristo yɛ ɔtutɔ yɛ ebu le abasɛ mɛ.

13Bɛsi mlɔ kiliɛ gi meze ligba nɛ ɛ, ní Yudanɛ ma kusumu yo onu, kiliɛ gi makɔ keduyɔyɔ ni litukpomegagla alɛɛ ní Aya yɛ baʋaziŋa ba ɔha lɔ su u, xe mekeni edi si miyaʋi lɔ kikaka elu u. 14Lɛ ni blɔ kesea mɛ ɛ, meze ní ɔtɔ akí mɛ ahanuglɔ Yadanɛ glegle ní Yudanɛ ma kusumu yo ikɔ lɛ onu, lɛ mevu blɔ baka ba batrɔtrɔ ʋa mɛ asani ba.

15Pɔ̀ gi Aya a, gi yɛ akya mɛ ɛ, xe able bɛpɔ mɛ ɛ, xe axwa mɛ gani yɛ lipomepɛpɛ nɛ mɛ ɛ, gi liku ye aŋu 16si yibu Yebi ye e, gi ɔlɛ ní mɛ mɛ̀ ɛbasɛ mɛ ɛ, tɔ maasɔli yɛ Liboe Gbã nɛ ní yɛ su kí banama gi bénu Yudanɛ ma ɛ, mádzɛ ɔnɔnɔ kɔ si mizɛ kiɖaŋu u. 17Lɛ mátrɛ ní Yerusalem tɔ mizɛɛmɔ banɔkpɛkpɛa ba gi beze ɔtɔ ɛki mɛ ɛ. Boŋu i, masɛ kyɔŋ atrɛ ní Arabia lɛ kede e, medzi aba Damasko.

18Agɔ tata kede xe memu atrɛ ní Yerusalem tɔ mizeete Petro o, lɛ meze yɛ klɔ ewe liɔfɔ ni tetsu u. 19Mámɔ ɔnɔkpɛkpɛ ɔtɔtɔ tɔɔ sani Yakobo, gi onu Ɔkaɛ yeneminyime e. 20Kidiliɛ gi maŋwlimi i, kilɛ ni kɛ mɛ, Aya ete si máʋisɛ asia! 21Lɛ kede e, madzi ikɔ́ lɛ ní Siria nì Kilikia. 22Ni lipoe lɛ klɔ mɛ ɛ, baʋaziŋa ba ní Kristo me ba iha lɛ mɛ bezeze ba ní Yudea ɛ, béte me aŋu mɛ nì aŋu mɛ ɛ. 23Eboa la gi banima bɛzɛɛpani ní mɛ su u ko béte si, “Onyime liɛ klɔ gi ayɔ kedu ya ní blɔ su azanɔ ɛ, yɛ ɛɛsɔli kuziŋaa klɔ gi ekeni edi si yiyaʋi i!” 24Lɛ loso e bɛkpɔ̀ Aya kɔkpɛ kidiliɛ gi abitɛ agani mɛ aʋa a.

Currently Selected:

Galatia 1: avn

Highlight

Compare

Copy