Axwɛ 19

Paulo Aba Efeso

1Gi Apolo eze ní Korinto e, liba lɛ mɛ si Paulo aga kaʋetu ya ikli lɛ kudeo lɛ aba Efeso e, niklɔ atsani baʋaziŋaatɔ, 2lɛ eʋi ba si, “Agi mlɛziŋa ɛ, mlɛzi Aya Ɔfuɛfuɛ nɔ na a?”

Lɛ bebu le onu si, “Owo o, Kuʋínu ʋidi si Aya Ɔfuɛfuɛ nɔ ɔlɛ ɛ.”

3Lɛ eʋi ba si, “Nyaŋwɛ linyi me bɛkpɛ kuni i kimlɔ ɔ.”

Lɛ bɛpani si, “Ní Yohanes yɛ linyi ne me e.”

4Paulo apani si, “Yohanes akpɛ kuni aki banama gi bɛyurɔ ba bede zimizi ba ɛ, lɛ asi ba si bazɛ ɔniliɛ gi atrába ní yɛ kede, aʋa ŋa a, yɛ onu Yesu u.”

5Agi benu le e, bɛdimɛ lɛ bɛkpɛ kuni ki ba ní Ɔkaɛ Yesu linyi ne me e. 6Lɛ gi Paulo atrɔ awla ní ba aʋa ɛ, Aya yɛ Ɔfuɛfuɛ nɔ ɛba ba aʋa, lɛ bɛpani siya ede ede gi bákpasi edi i, xe bɛpani eboe e, gi Aya aki si ba pani i. 7Lɛ ba pɔ́ beze benyime liɔfɔ ni tiaʋa.

8Agi atrɛ ní Yudanɛ ma ɔtsaklɔ ɛ, apani liboe le ni ɔna, lɛ abasi bidɔ badzidzi tiata zizi, gi azeekyi ba begyodi ba ní Aya kaʋaŋaa su u si liboe lɛ gi yɛ ɛpani i, lilɛ lɛ mɛ. 9Agi banɔatɔ ba ina nɛ mɛ idzu u, xe béxo yɛ liboe le oto o, pɔ̀ xe bɛzɛpani eboe zimizi ní Ɔkaɛ kudeo ni kɔ kudɔbasɛ yɔ su ní ɔnɔha lɔ aŋu mɛ ɛ, asɛ ní basu, lɛ ebú baʋaziŋa ba ní ba kusi i, lɛ azeegu kunugu aki ba liwe kakaa ní Tirano yɛ lidɔkpasigba lɛ mɛ ɛ. 10Lɛ azaabitɛ liboe lɛ ya agɔ taʋa nyɔŋ, niteme si banima pɔ́ ní Asia ɛ, Yudanɛ ni banama gi bénu Yudanɛ pɔ́, benu Ɔkaɛ yɛ liboe le.

Skeva yɛ Bebi ba Bɛpɛ Aya yɛ Kigagla ɛ

11Aya aki Paulo kigagla si Paulo ɔbitɛ enugutseboe. 12Liki si kuvlɔkpa ni eteme ewu ala su axwɛ gi awa kyɛ ɛ, xegi bɛkɔ bɛzɛɛgbɔni banyanya ba fɛ ɛ, bànya ʋa bizeblo, lɛ ifuɛfuɛ zimizi ne fɛ izedo eza ní banima mɛ.

13Lɛ Yudanɛ atɔ gi bɛzɛklanɔ ɔ, banama gi benu behwinete e, xe bizɛkpikpini ifuɛfuɛ zimizi ne edono e, bekeni edi lɛ bekpese Ɔkaɛ Yesu yɛ linyi kuxwa kpɛ ifuɛfuɛ zimizi ne si, “Ní Yesu ɔniliɛ su gi Paulo ɛɛpani i, linyi ne me, makpɛ ɔsã aki mlɔ si mledo aza ní yɛ mɛ ɛ.” 14Lɛ banama gi bɛɛbitɛ lɛ ya elu e, benu Yudanɛ kusumu yo ɔka ʋidi ye Skeva yɛ bebi, iyasɔʋi tigloele.

15Pɔ̀ Ɔfuɛfuɛ zimizi no ɛsi ba si, “Mete Yesu, lɛ Paulo fɛ ɛ mete liboetɔ ni yɛ su u, mlɔ pɔ̀ ɛ, mlɔ mlenu nyaŋwɛ ba ɛ?”

16Lɛ ɔniliɛ klɔ mɛ gi Ɔfuɛfuɛ zimizi no eze e, ayɔ adɔ ba aʋa, xe ekusi ba, lɛ akpɛ ba ebi i, liki si bese edo ni kepea lia klɔ mɛ ni liya gi ika izedo ní ba su u.

17Lɛ Yudanɛ ni banama gi bénu Yudanɛ pɔ́, gi bali ní Efeso e, benu liboe lɛ ya, lɛ lifu liku ba petee e, lɛ bemuni Ɔkaɛ Yesu yɛ linyi ne e. 18Lɛ banama gi bɛziŋa abla ɛ, beglegle bɛba lɛ bɛdra ba ina nɛ mɛ ɛ, xe bɛpani ni ba eboe zimizi na su iiki ɔnɔ kakaa ɛ. 19Lɛ banɔ glegle gi beze behwinete e, bɛmani ba kuplekpaa, bɛkpɛ kɔ likpɔ, lɛ bɛkani kɔ ní ba petee aŋu mɛ ɛ, gi bebù kɔ kudzi yo ní kibɔ mɛ ɛ, kwina kibɔ klosalo akpe avitetsu. 20Liki si Ɔkaɛ yɛ liboe le lihle lɛ limɔ kigagla ní ɔkɔ kakaa a.

21Gi eboa la ya ɛba pɔ́ ɛ, Ɔfuɛfuɛ nɔ ɛbasɛ Paulo si ɔga Makedonia ni Axaya xe aatrɛ ní Yerusalem i. Lɛ Paulo apani si i, xe madzi niklɔ ʋa kede e liaziã si mitrɛ ní Roma fɛ. 22Lɛ loso akpɛ yɛ banɔpɔnɔ ba mɛ tiaʋa, Timoteo ni Erasto, atsisi Makedonia a, lɛ yɛ ɔtutɔ awɔ ní Asia kesea mɛ kí lipoetɔ onu i.

Ozi Eku ní Efeso

23Ní lipoe lɛ klɔ mɛ ɛ, kunugu ʋidi utɔ kwidɔ ní Efeso ɔma nɔ mɛ ní baʋaziŋa ba bede ʋa su. 24Klosalo ɔnana ɔtɔ gi yɛ linyi linu Demetrio o, gi izɛkɔ klosalo ena ɔbu yɛ Atemis yɛ isumu kɔ sisami nɛ kí kudada ɛ, xe aki si ba klosalo ye su baxwɛwa ba bɛzɛmɔ kibɔ glegle ní ba axwɛ na mɛ ɛ, 25axwa yɛ baxwɛwa ba ni bedzedze ba ní ɔha lɔ klɔ mɛ akpɛ likpɔ lɛ asi ba si, “Benemi ba, mlete si kuzɛɛmɔ kibɔ glegle dɔni lixwɛ nɛ ya mɛ. 26Lɛ mlɛmɔ ɔ, xe mlenu fɛ ɛ si, aní Efeso ya tete, pɔ̀ ní Asia petee kloe kyɛ ɛ, Paulo liɛ ɛsi banɔ glegle, lɛ ekyi ba begyodi ʋa ni eboa la ya si, bidɔ gi bɛkɔ awla ɛbitɛ ɛ, bínu aya a. 27Lɛ aní lixwɛ lɛ ya tete lia lila lɛ linyi gbã nɛ ɛ, pɔ̀ biakpɛ blɔ onee Atemis ʋidi ye ni yɛ lisumugba lɛ kakpaa a, lɛ biakple kubùbù ní blɔ onee Atemis ɔtutɔ lɔ gi bizeesumu ní Asia ziziɛ ní kelea petee me su u.”

28Agi ɔnɔha lɔ enu Dimetrio yɛ liboe le e, beyeʋi isu gagla, lɛ bekpese ozi kukpɛ si, Efesoanɛ ma Atemis ye, yɛ onu ɔbu ʋidi ye petee! 29Lɛ ɔma zizi nɔ ɛpisa a, lɛ bɛyɔ xe bezeevu Gayo ni Aristarxo Paulo yɛ bagaglɔnɛ nɛ ba a gi bɛdɔ ní Makedonia a, lɛ behe ba ɛtsinɔ ní ɔma nɔ ɔtsaklɔ ɛ. 30Nya Paulo apɛ si yitrɛ ní ɔnɔha lɔ kusi i, pɔ̀ baʋaziŋa ba báki yɛ kudeo onu u. 31Lɛ Asia kesea baʋadi atɔ gi benu Paulo yɛ baʋia ba fɛ, bɛkpɛ banɔ ɛtsisi yɛ, si bɛki yɛ litukpo, ɔkisi si yɛtrɛ ní ɔma nɔ ɔtsaklɔ ɔ.

32Ɔma zizi nɔ ɛpisa, banɔatɔ bɛkpɛ ozi sì nite, lɛ batɔ fɛ si nite:, lɛ banɔ glegle béte kidiliɛ gi kɛ loso bɛba ɔtsa klɔ ɔ. 33Nite si Yudanɛ ma betutru Aleksandro kpɛ ɔnɔha lɔ ɔtɔ nɔ. Lɛ Aleksandro emuni yɛ ɔwla lɔ gi azaapɛ si yibu liboe lɛ gi liba lɛ mɛ, ese ɛki ɔnɔha lɔ ɔ. 34Pɔ̀ lipoe lɛ gi banima bɛmɔ egyesi si Yuda ɔnɛ onu i, ba petee bekpese ozi kukpɛ ni ole tole kɔki ŋwisi inyɔsasa tiʋa si, Efesoanɛ ma onee Atemis yɛ onu ɔbu ʋidi yɛ petee.

35Lɛ gi ɔma nɔ ɔdɔŋwlimi yɛ aki ɔnɔha lɔ ɛgɔ tsriɖi i, apani si mete si, “Efeso benyime ba a, ɔnɔ kakaa ete si, Efeso ɔma nɔ eedi Atemis ʋidi ye ni yɛ likla ɛnɛ gi liwɔli dɔni lifunu ne aʋa a. 36Abla gi ɔnɔnɔ ɔ́tratani liboe lɛ ya kunada ɛ, linu si mlaplɛ litɔ kese tɔ mláki bitɛ kididɔ ní kusuyeʋi me e. 37Lɛ ese linu si benyime ba ya gi mlɛgbani mani ya ɛ, bénu banɔ gi bézuru blɔ kusɔliɔ kididɔ lɛ bédo libusioboe yurɔ blɔ onee Atemis fɛ ɛ. 38Abla ɛ, xegi liboetɔ lilɛ ní Demetrio ni yɛ baxɛwa ba awla ní ɔnutɔ su i, etsixwawe la alɛ, lɛ ɔma nɔ betsixwa ba fɛ balɛ ɛ, mlaki tɔ bakɔ liboe ní banɔ ba klɔ ʋa su u. 39Pɔ̀ xegi liboe dzedzeetɔ sanɔ lilɛ ní mlɔ awla ní kidɔ dzedzeetɔ su i, kɔlɔ biaxwa lɛ ní kutsatsa mɛ ní ɔsã nɔ onu. 40Lɛ ese linu si mlaaku kuxixa mɛ xegi bɛkɔ omono liboe lɛ ya ekɔ ɛtsa mlɔ onu ní ozikpɛkpɛ ɔlɔ ya su u, lɛ ese linu si liboeboe líma ní mlɔ awla gi lɛ mlakɔki akɔnta ní ozi ɔlɔ ya su u.” 41Lɛ gi apani nite pɔ́ ɛ, aki ɔnɔha lɔ ehle.

Currently Selected:

Axwɛ 19: avn

Highlight

Copy