1 Tesalo 5
5
Mleze kublabla mɛ akí Ɔkaɛ yɛ kubabaa
1Líziã si miŋwlimi kí mlɔ mɛ benemi ba, ní lipoe le ni ewe ala mɛ gi eboa la ya aba la mɛ tɔ ɔ. 2Lɛ mlɔ ɔtutɔ mlete si blɔ Ɔkaɛ yɛ liwe le líaba ŋwisi oze ní elesi me kinɛ ɛ. 3Lipoe lɛ gi banima bɛɛpani si, “Kusuyɔ ni ɔnadɔdɔ ɛba ɛ,” lɛ baxixa ʋa bialili ba a! Liaba ŋwisi kuyeʋiyeʋi ní kubipɔ mɛ kinɛ ɛ, lɛ banima bátratani kuse ní kɔsu u. 4Pɔ̀ mlɔ, benemi ba mláma ní litumu me e, lɛ líma si liwe veve lɛ klɔ lilili mlo ŋwisi oze kibaba kinɛ ɛ. 5Mlɔ pɔ́ mlenu kuklekle me banɔ ɔ, gi mlalɛ ní keletiti mɛ ɛ. Aní elesi loo litumu me banɔ kunu u. 6Lɛ loso líma si kuzɛɛdɔ sra a, ŋwisi banɔ dzedze ba kinɛ ɛ; lilɛ si kuze ni aŋu tɔ kuvù isu. 7Lɛ ese linu si elesi me banɔ bizɛdɔ sra; lɛ elesi me bizemu kuda a. 8Pɔ̀ keletiti me banɔ kunu u, lɛ liziã si kuvu isu u. Lɛ ŋwisi ɔgũta kinɛ ɛ, lilɛ si kukpɛ kuziŋaa ni kulɔlɔɔ ŋwisi kakɔ mɛ liwu, ani tɔ kukúme kudeonudidi kí kubúbú yo ŋwisi akatsaloglo ye kinɛ ɛ. 9Aya ɔ́kya blɔ kí yɛ kusuyeʋi yo, pɔ̀ tɔ kumɔ kubúbú gani blɔ Ɔkaɛ Yesu Kristo me e, 10Yɛ gi etse aki blɔ si i, xe kwitse e, loo kulɛ ligbã́ o, xegi edzì aba ɛ, kwiaze likpɔ ni yɛ. 11Lɛ loso mlakpɛ mlɔ ahanuglɔ ba kigagla tɔ mlapɔni mlɔ ahanuglɔ ba, kiliɛ gi mlɛɛbitɛ abla ɛ.
Paulo yɛ Bagbágba gɔgɔ ʋa ni Kunɔpaniɔ
12Kwiki mlɔ litukpo, blɔ benemi ba, tɔ mlakpɛ kubùbù yo ní banama gi bɛɛwa axwɛ na gaglaa ní mlɔ kusi i, gi bɛɛbasɛ mlɔ kudeo o, xe bɛɛgbá mlɔ ɛ, ní Kristo anɛ ma ligbã́zeze ne me e. 13Mlakɔ kubùbù glegle ni kulɔlɔ aki ba kɔkpɛ axwɛ ana gi bɛwa ní mlɔ kusi i loso, atɔ mleze ni mlɔ ahanuglɔ ba ní kusuyɔ mɛ.
14Kwiikpɛ lɛ mlɔ mɛ, benemi ba, atɔ mlatɛni basranɛ ba, mlakpɛ befufluse ba kigaglaɛ, mlapɔni banama gi bɛziã kupɔnɔ ɛ, mlaplɛ litɔ kese aki ɔnɔ kakaa. 15Mledi lɛ ɔza si ɔnɔnɔ ódzini kuzimizi tsa ɛki kuzimizi i, pɔ̀ ní lipoe kakaa mɛ ɛ, mlatrɔ lɛ si mlabitɛ eboe Gbã akí mlɔ ahanuglɔ ba ni banima pɔ́.
16Mleze ní isami mɛ lipoe kakaa, 17mlaxwa Aya lipoe kakaa. 18Mledo ɖase ní kidɔ kakaa mɛ. Lɛ Aya ɛɛpɛ dɔni mlɔ klɔ ní mlɔ ligbã́ nɛ mɛ ní likpɔkpɛkpɛ mɛ ni Yesu Kristo.
19Mlakítsi kudeonu aki Ɔfuɛfuɛ Dradra lɔ kigaglaɛ; 20mlakígbe Ɔfuɛfuɛ nɔ lɔ ole lo o, gi beboedoplɛ ba bɛkɔ ɔ. 21Mlatá liboe kakaa edi; atɔ mlabitɛ ní agbã̀ na aʋa. 22tɔ mlayurɔ liboe zimizi kakaa elu.
23Atɔ Aya gi yɛ izɛki blɔ kusuyɔ ɛ, ɔki tɔ mladra ní kude kakaa aʋa tɔ ɔbla mlɔ inɔse le pɔ́, Ɔfuɛfuɛ nɔ, esobo la, ani kisugyaɛ dɔni kesetata kakaa mɛ ní blɔ Ɔkaɛ Yesu Kristo yɛ kubabaa mɛ. 24Aya liɛ gi yɛ axwa mlɔ ɛ, aabitɛ lɛ, lɛ ese linu si izɛbitɛ yɛ kakáplɛa aʋa.
25Mlaxwa Aya ní blɔ litukpo, benemi ba.
26Mlapani tɔ mlakpɛ awla ole aki banama petee gi bɛziŋa ɛ.
27Makpɛ lɛ ní mlɔ mɛ ní Ɔkaɛ yɛ linyi ne me, si mlakla keplekpa lia ya akí banama petee gi bɛziŋa a.
28Blɔ Ɔkaɛ Yesu Kristo yɛ lipomepɛpɛ nɛ lize ni mlo.
Currently Selected:
1 Tesalo 5: avn
Highlight
Share
Compare
Copy
Want to have your highlights saved across all your devices? Sign up or sign in
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc
