1 Tesalo 4

Mleze ligbã́ɛ nɛ gi liku Aya aŋu i

1Gɔgɔ ɛ, mɛ benemi ba, mlɛkpasi dɔni blɔ klɔ kiliɛ gi mlaze ligbã́ nɛ ɛ, xe mlaaku Aya aŋu i. Lɛ línu kiliɛ gi mlalɛ ligbã́ nɛ abla a. Abla ɛ, kwiki mlɔ litukpo, lɛ kwikpɛ lɛ ní mlɔ mɛ ɛ, ní blɔ Ɔkaɛ Yesu linyi ne me si mlabitɛ asani nite. 2Lɛ mlete eboa la gi kwibasɛ mlɔ ɛ, gani blɔ Ɔkaɛ Yesu linyi ne me. 3Aya apɛ si mlɔ isu idra tɔ mlana ní mlɔ isuwla mɛ dɔni kihasi wawa mɛ. 4Mlɔ benyime ba mɛ ɔkakaa lilɛ si mlete kiliɛ gi mlaaze ni mlɔ bedze ba ní kudradra ni kubùbù me e, 5aní ní kelea mɛ kisugyaɛ kulekuku me e, kiliɛ gi babubitɛ ba a, gi bése Aya bizɛbitɛ ɛ. 6Ní liboe lɛ ya mɛ ɛ, líma si ɔnɔnɔ ɔza kimbi ní yɛ ɔhanuglɔ yedze su loo ɔtafa yɛ ní kididɔ mɛ. Kwisi mlɔ liboe lɛ ya edi, lɛ kwitɛni mlɔ si Ɔkaɛ aahe kutu ɔki banama gi biabitɛ nite e. 7Aya ɔ́xwa blɔ si kuze bahasi nɛ ɛ, pɔ̀ tɔ kuze ligbã dradra a. 8Lɛ loso, ɔniliɛ gi ɔ́trazɛ kudɔbasɛ uliɔ ya ɛ, aní ɔnɔ ɔ́zɛ ɛ, pɔ́ Aya a, gi yɛ izɛki mlɔ yɛ Ɔfuɛfuɛ Dradra lɔ ɛ, yɛ ɔ́zɛ ɛ.

9Líziã si miŋwlimi ki mlɔ ní kulɔlɔ kí mlɔ ahanuglɔ ba gi bɛzi Kristo aʋa ɛɛŋa ɛ su. Mlɔ ɔtutɔ ɛ, Aya abasɛ mlɔ bidɔ mɛ kiliɛ gi mlaalɔ mlɔ ahanuglɔ ba ɛ. 10Lɛ nite me mlɛga ní benemi ba petee su ní Makedonia kesea petee aʋa. Lɛ loso kwiki mlɔ litukpo benemi ba, tɔ mlalɔ ba sani nite e. 11Mlabitɛ lɛ mlɔ kupɛ́pɛ tɔ mleze ligbã́ nɛ kpoo, tɔ mlakíkpɛ onugu ní ɔnɔ dzedze yɛ liboe me e, atɔ mlawa mlɔ tutɔ mlɔ axwɛ kiliɛ gi kwisi mlɔ ɛzanɔ ɛ. 12Ní kudeo liɔ ya onu i, mlamɔ kubùbù dɔni banama gi bazɛ Aya aʋa aŋa kɔ ɔ, lɛ mlátradí ɔnɔnɔ aŋu mɛ ɛki mlɔ baziazia ʋa a.

Ɔkaɛ yɛ kudzibaa

13Benemi ba, kwipɛ si mlete anukwarɛ ní banama gi betse su u, atɔ mlakíze ní asigaga mɛ ɛ, ŋwisi banama awla gi kudeonudidi kúma kinɛ ɛ. 14Kwiziŋa si Yesu etse lɛ ayɔ dzɛ ɛ, lɛ loso kwiziŋa si Aya aadzi ni Yesu ni banama gi bɛzi yɛ aʋa ɛɛŋa a, xe betse e, manɔ. 15Kiliɛ gi kwibasɛ mlɔ abla ɛ, binu Ɔkaɛ yɛ kudɔbasɛ; blɔ banama gi kwiaze ligbã́ nɛ ɛ, xe Ɔkaɛ aaba ɛ, kútraku ɔtɔ ɛki banama gi betse e. 16Biakpɛ ɔsã ni ozi gagla, lɛ Aya yɛ baxwɛdzɛ ba ɔkaɛ yɛ ole aayi i. Aya yɛ kakuklui ya kiayi, lɛ Ɔkaɛ yɛ ɔtutɔ lɔ le dɔni lifunu ne e. Banama gi bɛzɛ Kristo aʋa ɛɛŋa a, xe betse e, ba biatu kuyɔ; 17Lɛ kede e, blɔ banama gi kulɛ ligbã́ nɛ ní lipoe lɛ klɔ mɛ ɛ, biakpɛ blɔ ni ba likpɔ ní aplɛ la mɛ tɔ kwitsani Ɔkaɛ ní liwɔ lɛ mɛ. Kɔ ɛ, kwize ni Ɔkaɛ lipoe kakaa ɛ. 18Lɛ loso, mlakpɛ ɔna lipo aki mlɔ ahanuglɔ ba ni eboa la ya.

Currently Selected:

1 Tesalo 4: avn

Highlight

Compare

Copy