1 Petro 5
5
Kugbagba ki Banɔtsitsi ba ni Sɔhɛ ba
1Mɛɛki banɔtsitsi ba ní mlɔ kusi litukpo ŋwisi ɔnɔtsitsi kinɛ ɛ, ɔnɔ gi aŋa katsalia aki Kristo yɛ ɔzia mɔmɔ ni ɔnɔ gi yɛ kyɛ aamɔ ɔŋakɔ ní kuklekleo liɔ gi bɛtrábu i basɛ mɛ. 2Mleze beʋesigbanɔ aki Aya yɛ iʋesi lɛ gi ilɛ ní mlɔ kaʋadi ya ese e. Mleze baʋadi ani gi bɛtrɔ ɛki mlɔ ɔ, pɔ́ gi mlɛdimɛ ŋwisi kiliɛ ɛ, gi Aya apɛ si mlabitɛ ɛ, ani ki kibɔpɛpɛ ni kimbi kyikyi loso, boŋu ni kupɛpɛ si mleesumu u. 3Mlakíkeni edi si mlɛɛŋa kamla ní banama gi bɛkɔ ɛkpɛ ní mlɔ awla ɛ aʋa, pɔ̀ mleze liŋwitsɛ aki iʋesi le e. 4Atɔ xe bagagbanɔ ba ɔkaɛ aba ɛ, mlazɛ kusudraa likusikuto le gi litrálila lɛ kuklekleo liwewe e.
5Niteme kee mlɔ sɔhɛ ba ɛ, mlepleni isu aki banama gi betsi sani mlɔ ɛ. Mlɔ petee mlakpɛ kusububɔ ŋwisi ewu kinɛ ɛtsinɔ mlɔ ahanuglɔ ba su; lɛ ese linu si liboe le lipani si,
“Aya izɛyɔ kedu ní basudɔ ba su,
pɔ́ izɛpɛ lipo me ɛki banama gi bɛbubɔ isu i.”
6Lɛ loso mlabubɔ isu akpɛ ní Aya yɛ ɔwla gagla lɔ ese, atɔ aamuni mlo ní yɛ lipoe gbã nɛ aʋa. 7Mlakɔ mlɔ baxixa ʋa petee gi bɛkpɛ mlɔ begyodi ʋa kunugu yo e, atrɔ ní yɛ aʋa, lɛ ese linu si akɔ litɔ lɛ mɛ aki mlɔ.
8Mlevu isu ya, tɔ mleze ni aŋu! Mlɔ ahwafiɔnɛɛ, ozimizi ye, ɛwa mlɔ ŋwisi gyata kinɛ, gi ɛpɛ ɔnutɔ si yivu ita a. 9Mlalɛɛ gaglaa ní mlɔ kuziŋaa aʋa, tɔ mletsi kudeonu aki yɛ, lɛ ese linu si mlete si mlɔ benemi baʋaziŋa ba ní kelea mɛ ɛ, bɛɛga kini tilee liɛ ke me.
10Pɔ xe mlɛmɔ kini ye taʋɛ ɛ, Aya gi yɛ linɛ linu lipomepɛpɛ nɛ petee e, xe yɛ axwa mlɔ amani yɛ kusudraa gi kuʋídu ní Kristo me e, yɛ ɔtutɔ aadzi ni mlo kudu, lɛ aaki si mlaze gagla, lɛ mlaali, lɛ mlatrahwa a. 11Yɛ kinɛ kinu kigaglaɛ kɔtsinɔ kanɔmɛ anɔmɛ. Atɔ liba lɛ mɛ.
Kunɔpanɔ gɔgɔɔ
12Sila gi makɔ ŋwisi onemi anukwarɛ onete e, yɛ apɔni mɛ xe maŋwlimi keplekpa kpekpemia lia ya. Mapɛ si mikpɛ mlɔ sise lɛ mɛɛŋa katsalia si, lɛ ya linu Aya yɛ lipomepɛpɛ nɛ ɔtutɔ lɔ. Mlalɛɛ ní lɛ aʋa gaglaa. 13Ɔsɔli ha lɔ gi ɔlɛ ní Babilonia a, gi ɔlɛ ŋwisi onemidzɛ ki mlɔ ɛ, gi Aya akya apɔni mlɔ ɔ, fɛ ɛpani mlɔ, niteme kee mɛ obi ye Marko fɛ apani mlɔ. 14Mlakpɛ mlɔ ahanuglɔ ba wolaa ni kulɔlɔ ní Kristo me. Atɔ kusuyɔ kuze ni mlo banama petee gi mlalɛ ní Kristo me e.
Currently Selected:
1 Petro 5: avn
Highlight
Share
Compare
Copy
Want to have your highlights saved across all your devices? Sign up or sign in
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc
