1 Tekwaro 10

To abaka Caulo

(Neŋ daŋ 1 Camwiri 31.1-13)

1I kare-nono jo Piriciti te lweny i kom jo Icrael; jo Icrael rik te mukere i ŋwec oko i nyim jo Piriciti, kun kom jo ame oneko oradde atata i kidi me Gilboa. 2Jo Piriciti te ryemo yo Caulo kede awobe mere, ote neko Yonacan kede Abinadab, kede Malkicua, ame gin obedo awo be a Caulo. 3Lweny anwoŋo odio Caulo atek meicel, wegi atero mogo rik te nwoŋe, gin te cele wawano en atek meicel kede atero. 4Caulo te kobbi atin jami lwennyere ni, “Wot pala romoni ituca kede pelo, me jo a mom oliro-ni kur bin coba, ote loka doko gi-anywaragi.” Cite atin jami lwenyere mom te ye, pien onwoŋo tye kede lworo. Mannono te miyo Caulo kwanyo pala lwennyere, te rette iye en kene. 5Kare ame atin jami lwennyere oneno ni Caulo doŋ oto oko, en daŋ te rette i kom pala lwennyere, te to oko karacel kede. 6Mannono en kite ame Caulo oto kede karacel kede awobe mere adek, jo me ode oto karacel. 7I kare ame jo Icrael a rik tye i luŋ tuŋ ca oneno ni monygi orino oko, dok Caulo kede awobe mere daŋ oto oko, gin oya i bomagi luŋ ote riŋo oko, Jo Piriciti te bino bedo iye.

8Orwo mere ocele, i kare ame jo Piriciti obino me gonyo ruk a jo ame oneko, gin onwoŋo Caulo kede awobe mere adek oto i kidi me Gilboa. 9Gin te toŋo wi Caulo oko, ote gonyo daŋ jami lwenyere oko ote cwayo okwena rabo koppere baŋ jogi luŋ karacel kede baŋ jo luŋ ame tye i lobo me Piriciti. 10Gin te keto jami lwennyere i ot jok Aciterot, gin te guro wi Caulo i ot woro jokgi ame olwoŋo ni Dagon. 11Ento i kare ame jo me Jabec-Gilead owinyo gin ame jo Piriciti otimo i kom Caulo, 12jo luŋ ame tek i lweny, oya ote wot dyeworrono benebene, ate kwanyo kom Caulo kede kom awobe mere oko ote tero i Jabec. Gin te yiko cogo komgi i te yat i Jabec, eka ote kanyo kec pi nino abiro.

13 # Olev. 19.31; 20.6; 1 Cam. 13.8-14; 15.1-24; 28.7-8 Caulo oto pien okwero bedo nat ame genne en onwoŋo mom geno Rwot, dok en otemo wot baŋ okor tipo a jo oto me wot penyo tamgi, 14kun mom geno Rwot me tele, Mannono omio Rwot oneke oko te miyo loccere i cin Daudi wot a Yece.

Currently Selected:

1 Tekwaro 10: Lango

Highlight

Copy

Compare