Rôm 9
9
Ơi Adai Laih Anŭn Ană Plei Pla Ñu
1Amăng Krist kâo pơhiăp sĭt biă mă, kâo ƀu ƀlor ôh; pran jua tơpă kâo ngă gơ̆ng jơlan kơ kâo amăng Yang Bơngăt Hiam. 2Pran jua kâo rơngot biă mă laih anŭn ruă nanao. 3Yua kơ tơdah dưi kâo kiăng jing mơnuih Ơi Adai hơtơ̆m pah tŭ mơ̆n tơl čơlah hĭ mơ̆ng Krist pơala ƀing adơi ayŏng kâo, jing ƀing kơnŭng djuai kâo gah kơ asar đeh anai. 4Gơñu jing ƀing mơnuih Israel, hmâo tơlơi dưi jing ană rong, wơ̆t tơlơi ang yang, tơlơi kơnol pơgop, tơlơi juăt, tơlơi kơkuh pơpŭ, laih anŭn tơlơi ƀuăn.#Tơb 4:22. 5Gơñu tơbiă rai mơ̆ng ƀing ơi adon, laih anŭn gah kơ asar đeh, Yang Krist tơbiă rai mơ̆ng kơnŭng djuai gơñu, Pô jing khua kơ abih bang, jing Ơi Adai Pô năng lăp hmâo tơlơi pơpŭ bơni hơơč hlŏng lar. Amen.
6Laĭ tui anŭn, ƀu djơ̆ ôh boh pơhiăp Ơi Adai jing đôč đač. Yua kơ ƀu djơ̆ ôh abih bang ƀing tơbiă rai mơ̆ng Israel leng kơ jing mơnuih Israel. 7Kŏn djơ̆ lơi abih bang mơnuih lơ̆m kơ kơnŭng djuai Abraham leng kơ jing ană tơčo Abraham; samơ̆ “Mơ̆ng Isak yơh arăng či yap kơnŭng djuai ih”#Čơd 21:12. 8Tơlơi anŭn kiăng laĭ ƀu djơ̆ ôh ƀing ană bă gah asar đeh#9:8 ană bă gah asar đeh: Kiăng laĭ nao ană tơčo Abraham găn mơ̆ng Ismael, ană HʼAga tơkeng rai (lăng Ga 4:22-23). anai jing ană bă Ơi Adai, samơ̆ ƀing ană bă tui hăng tơlơi Ơi Adai ƀuăn kah arăng yap jing ană tơčo sĭt. 9Yua kơ tui hăng tơlơi ƀuăn hmâo laĭ: “Thŭn tơdơi amăng bơyan anai mơ̆n kâo či wơ̆t glaĭ dơ̆ng laih anŭn HʼSara či hmâo sa čô ană đah rơkơi.”#Čơd 18:10.
10Ƀu djơ̆ kơnơ̆ng tui anŭn đôč ôh, samơ̆ ăt kar kaĭ mơ̆n tơ HʼRêbêka pi kian kơmar hăng Isak ơi ƀing ta. 11Wơ̆t dah dua čô ană anŭn aka tơkeng rai ôh, laih anŭn gơñu aka hmâo ngă hiam ƀôdah sat ôh kiăng kơ tơlơi Ơi Adai hmâo ruah mă dưi jing kơjăp. 12Hmâo boh pơhiăp Ơi Adai laĭ kơ HʼRêbêka tui anai: “Ayŏng či mă bruă kơ adơi.”#Čơd 25:23. 13Hrup hăng Hră Ơi Adai hmâo čih laih: “Kâo khăp kơ Yakôp samơ̆ hil kơ Êsâo.”#Mal 1:3.
14Tui anŭn hơgĕt tơlơi ƀing ta či laĭ lĕ? Hmâo mơ̆ tơlơi ƀu tơpă amăng Ơi Adai? Ư ưh, ƀu hmâo ôh! 15Yua kơ Ñu hmâo laĭ kơ Môis:
“Kâo či pap drap kơ hlơi pô kâo pap drap,
Laih anŭn kâo či hơeng kơ hlơi pô kâo hơeng.”#Tơb 33:19.
16Tui anŭn, tơlơi anŭn ƀu djơ̆ mơ̆ng tơlơi kiăng ană mơnuih ƀôdah mơ̆ng tơlơi gir run hơduah ôh, samơ̆ mơ̆ng tơlơi Ơi Adai pap drap. 17Yua kơ Hră Ơi Adai Pơhiăp ăt laĭ laih kơ Pharaôn: “Kâo hmâo yŏng đĭ ih yua kơ Kâo kiăng bơrơđah tơlơi dưi mơyang Kâo amăng ih, kiăng kơ anăn Kâo arăng dưi pơhaih hyu tar ƀar lŏn tơnah.”#Tơb 9:16. 18Tui anŭn Ñu pap drap kơ hlơi pô Ñu kiăng, laih anŭn Ñu pơkhăng hĭ pran jua kơ hlơi pô Ñu kiăng.
Tơlơi Hil Laih Anŭn Tơlơi Pap Ơi Adai
19Tui anŭn ih či laĭ kơ kâo: “Hyư̆m Ơi Adai ăt klă kơđi kơ tơlơi soh mơ̆n lĕ? Yua kơ hlơi pô dưi pơkơdơ̆ng glaĭ hăng tơlơi Ñu kiăng?” 20#Êsai 29:16; 45:9.Samơ̆ hlơi ih jing, ơ mơnuih, kiăng pơgăl glaĭ hăng Ơi Adai? Dưi mơ̆ lŏn kraĭ laĭ kơ pô man ñu: “Hyư̆m ih man kâo tui anai?” 21Pô bruă man lŏn ƀu hmâo tơlơi dưi hăng lŏn kraĭ ôh hă, hăng sa bôr lŏn kraĭ kiăng ngă sa boh čeh yua amăng bruă yom laih anŭn sa boh čeh pơkŏn yua amăng bruă ƀu yom ôh? 22Hyư̆m ih pơmĭn tơdah Ơi Adai kiăng bơrơđah tơlơi Ñu hil laih anŭn bơrơđah tơlơi dưi mơyang Ñu, Ñu hmâo gir añ hăng khul čeh năng lăp tŭ kơ tơlơi hil kiăng pioh tơlơi pơrai hĭ? 23Tơdah Ñu kiăng pơrơđah tơlơi pơdrŏng kơ tơlơi ang yang Ñu pioh brơi kơ lu boh čeh Ñu pap drap, khul čeh Ñu hmâo man laih mơ̆ng hlâo pioh brơi kơ tơlơi ang yang, 24ƀing ta yơh jing ƀing Ñu hmâo iâu laih, ƀu djơ̆ kơnơ̆ng mơ̆ng ƀing ană Yuđa đôč ôh, samơ̆ Ñu ăt iâu mơ̆ng ƀing djuai tuai mơ̆n. 25Tơlơi anai Ñu hmâo laĭ amăng hră Ôsê:
“Ƀing ƀu jing ană plei Kâo ôh, Kâo či iâu ‘Ƀing ană plei Kâo’
Laih anŭn pô Kâo ƀu khăp hơeng ôh: ‘Kâo či iâu pô Kâo khăp hơeng.’#Ôsê 2:23.
26Laih anŭn amăng anih Ơi Adai laĭ kơ ƀing gơ̆: ‘Ƀing gih ƀu djơ̆ ƀing ană plei pla kâo ôh,’
Ăt ƀơi anih anŭn mơ̆n Ơi Adai či iâu ƀing gơ̆ jing ‘Ƀing ană Ơi Adai hơdip.’”#Ôsê 1:10.
27Laih anŭn Êsai ur kraih tơlơi djơ̆ kơ ƀing Israel: “Wơ̆t dah mrô ƀing ană Israel jing lu kar hăng čuah ƀơi ia rơsĭ, samơ̆ kơnơ̆ng sa črăn dŏ tơsot glaĭ ƀiă đôč či dưi klaih. 28Yua kơ Khua Yang či pơtruh tơlơi Ñu phat kơđi ƀơi lŏn tơnah hăng tơlơi tañ laih anŭn khŭt khăt.”#Êsai 10:22,23. 29Laih anŭn tui hăng Êsai hmâo laĭ hlâo:
“Tơdah Khua Yang kơ phung tơhan ƀu pioh glaĭ ƀing ană tơčo kơ ƀing ta,
Ƀing ta jing hĭ laih kar hăng plei Sôđôm laih anŭn plei Gômôrơ.”#Êsai 1:9.
Ană Israel Hăng Tơlơi Phrâo Hiam
30Tui anŭn hơgĕt ƀing ta či laĭ lĕ? Ƀing djuai tuai ƀu tui hơduah ôh tơlơi tơpă, pŭng gơñu hmâo hĭ tơlơi tơpă. Anŭn jing tơlơi tơpă mơ̆ng tơlơi đaŏ. 31Ƀing Israel gir tui hơduah tơlơi tơpă anŭn tui hăng tơlơi juăt, samơ̆ gơñu ƀu dưi ngă pơgiơ̆ng tui hăng tơlơi juăt anŭn ôh. 32Yua hơgĕt lĕ? Yua kơ gơñu ƀu tui hơduah ôh tơlơi tơpă hơnơ̆ng anŭn hăng tơlơi đaŏ, samơ̆ hăng bruă gơñu ngă. Gơñu tơhnač djơ̆ boh pơtâo čơgăn jơlan, 33tui hăng Boh Pơhiăp Ơi Adai hmâo čih:
“Anai nê, Kâo dưm amăng plei Siôn sa boh pơtâo či ngă tơhnač kơ lu mơnuih,
sa boh pơtâo kli či ngă pơrơbuh hĭ gơñu;
Samơ̆ hlơi pô đaŏ kơ Ñu ƀu či rơngiă tơlơi čang rơmang ôh.”#Êsai 28:16.
Currently Selected:
Rôm 9: JRA2016
Highlight
Share
Copy
Want to have your highlights saved across all your devices? Sign up or sign in
© 2016 United Bible Societies. All rights reserved.
