Rôm 4

Tơlơi Đaŏ Abraham

1Tui anŭn, hơgĕt ƀing ta či laĭ djơ̆ kơ Abraham ơi adon ƀing ta gah kơ asar đeh, hơgĕt ñu hmâo mă tŭ? 2Tơdah Abraham hmâo tơlơi yap tơpă mơ̆ng bruă ñu ngă, ñu hmâo tơlơi dưi pơang ñu pô. Samơ̆ ñu ƀu dưi ôh pơang ñu pô ƀơi anăp Ơi Adai. 3Yua kơ hơgĕt Hră Ơi Adai Pơhiăp laĭ? “Abraham đaŏ kơ Ơi Adai, laih anŭn yua mơ̆ng tơlơi đaŏ anŭn yơh Ơi Adai hmâo yap ñu tơpă.”#Čơd 15:6. 4Kơ mơnuih mă bruă, prăk apah ñu ƀu djơ̆ jing tơlơi pha brơi ôh, samơ̆ yap kar hăng hơnưh. 5Bơ kơ hlơi pô ƀu mă bruă ôh, samơ̆ đaŏ kơ Pô yap tơpă brơi kơ mơnuih soh, tơlơi đaŏ mơnuih anŭn hmâo yap jing tơpă. 6Kar hăng anŭn mơ̆n, Đawit pơhiăp tơlơi mơyun hiam kơ mơnuih Ơi Adai yap tơpă ƀu djơ̆ yua mơ̆ng bruă ngă ôh:

7“Mơyun hiam yơh kơ hlơi pô Ơi Adai pap brơi laih tơlơi ngă gao ñu,

Tơlơi soh ñu Ơi Adai hmâo lơ̆m lui hĭ laih.

8Mơyun hiam yơh kơ mơnuih Khua Yang ƀu yap ôh tơlơi soh ñu.”#Adoh 32:1,2.

9Djơ̆ mơ̆ tơlơi mơyun hiam anŭn kơnơ̆ng kơ ƀing khăt klĭ đôč, ƀôdah wơ̆t kơ ƀing ƀu khăt klĭ? Ƀing ta laĭ yua mơ̆ng tơlơi đaŏ Abraham Ơi Adai yap ñu jing tơpă. 10Tui anŭn hơbin Ơi Adai hmâo yap tơlơi anŭn kơ ñu? Hlâo kơ ñu khăt klĭ ƀôdah tơdơi kơ ñu khăt klĭ? Ƀu djơ̆ tơdơi ôh samơ̆ hlâo kơ ñu khăt klĭ yơh. 11Ñu hmâo mă tŭ laih tơlơi khăt klĭ jing gru kơnăl kar hăng mơnơ̆ng kơđŏm tơlơi tơpă ñu hmâo laih mơ̆ng tơlơi đaŏ hlăk ñu aka khăt klĭ ôh. Tui anŭn, Abraham jing hĭ ama gah bơngăt kơ abih bang ƀing mơnuih đaŏ samơ̆ ƀu khăt klĭ ôh, laih anŭn gơñu ăt hmâo tơlơi yap tơpă mơ̆n.#Čơd 17:10. 12Laih anŭn ñu ăt jing ama kơ ƀing khăt klĭ mơ̆n, jing ƀing ƀu djơ̆ kơnơ̆ng khăt klĭ đôč ôh, samơ̆ gơñu hơdip kar hăng tơlơi đaŏ Abraham, ơi adon ƀing ta hmâo hơdip laih hlâo kơ ñu khăt klĭ.

Hăng Tơlơi Đaŏ Mă Tŭ Tơlơi Ƀuăn Ơi Adai

13 # Čơd 17:4-6; 22:17,18; Gal 3:29. Tơlơi Ơi Adai ƀuăn kơ Abraham hăng kơ ƀing ană tơčo ñu, brơi ñu mă tŭ lŏn tơnah jing kong ngăn, ƀu djơ̆ yua mơ̆ng tơlơi ñu gưt tơlơi juăt ôh, samơ̆ yua kơ tơlơi tơpă mơ̆ng tơlơi ñu đaŏ. 14Yua kơ tơdah mơ̆ng tơlơi gưt kơ tơlơi juăt kah arăng dưi mă tŭ kong ngăn, tui anŭn tơlơi đaŏ jing hĭ đôč đač laih anŭn tơlơi ƀuăn jing ƀu tŭ yua ôh.#Gal 3:18. 15Yua kơ tơlơi juăt ba rai tơlơi hil, samơ̆ pơpă anih ƀu hmâo tơlơi juăt, pơ anŭn ăt ƀu hmâo tơlơi gao tơlơi juăt ôh.

16Yua kơ anŭn, mơ̆ng tơlơi đaŏ yơh tơlơi ƀuăn tơbiă mơ̆ng tơlơi pap či dưi truh sĭt kơ abih bang ană tơčo Abraham, ƀu djơ̆ kơnơ̆ng kơ ană tơčo gah yŭ kơ tơlơi juăt đôč ôh, samơ̆ wơ̆t kơ abih bang ană tơčo gah kơ tơlơi đaŏ Abraham. Yua kơ ñu ăt jing ơi adon kơ abih bang ƀing ta mơ̆n.#Gal 3:7. 17Kar hăng hră Ơi Adai hmâo čih laih: “Kâo hmâo pơjing ih jing ama kơ lu djuai mơnuih.” Tui anŭn tơlơi ƀuăn anŭn ăt dŏ tŭ yua ƀơi anăp Ơi Adai, Pô ñu đaŏ, jing Pô brơi tơlơi hơdip kơ ƀing djai, laih anŭn pơjing mơnơ̆ng mơ̆ng mơnơ̆ng aka hmâo hlâo ôh.#Čơd 17:5. 18Abraham hmâo đaŏ laih anŭn čang rơmang wơ̆t dah ƀu hmâo tơlơi čang rơmang dơ̆ng tah, kiăng kơ ñu dưi jing ama kơ lu djuai mơnuih, kar hăng Ơi Adai hmâo pơhiăp laih kơ ñu: “Ƀing ană tơčo ih či jing kar hăng anŭn yơh.”#Čơd 15:5. 19Ñu ƀuh drơi jan ñu jĕ či djai yua kơ ñu giăm hmâo sa rơtuh thŭn laih, laih anŭn ƀuh HʼSara ƀu dưi tơkeng dơ̆ng ôh, samơ̆ tơlơi đaŏ ñu ƀu tơdu ôh.#Čơd 17:17. 20Ñu ƀu đing ôh kơ tơlơi Ơi Adai ƀuăn, samơ̆ jing kơtang hloh dơ̆ng amăng tơlơi đaŏ laih anŭn pơpŭ bơni hơơč kơ Ơi Adai. 21Yua kơ ñu đaŏ hăng abih pran jua Ơi Adai dưi ngă pơgiơ̆ng hơgĕt tơlơi Ñu hmâo ƀuăn laih. 22Yua kơ anŭn yơh Ơi Adai yap tơlơi ñu đaŏ jing tơlơi tơpă kơ ñu. 23Samơ̆ boh pơhiăp “Ơi Adai yap tơlơi tơpă kơ ñu” arăng ƀu kơnơ̆ng čih kơ hơjăn ñu đôč ôh, 24samơ̆ wơ̆t kơ ƀing ta kar kaĭ mơ̆n. Ƀing ta hmâo yap tơpă yua mơ̆ng tơlơi đaŏ, jing ƀing mơnuih đaŏ kơ Pô hmâo pơhơdip glaĭ Yêsu, Khua Yang ƀing ta hơdip glaĭ mơ̆ng tơlơi djai. 25Arăng hmâo pơdjai laih Ñu yua kơ tơlơi soh ƀing ta laih anŭn Ơi Adai hmâo pơhơdip glaĭ Ñu kiăng kơ ƀing ta dưi hmâo tơlơi yap tơpă.#Êsai 53:4-5.

Currently Selected:

Rôm 4: JRA2016

Highlight

Copy